A Sb'ab'el Carta San Pedro 4:11 - Chuj San Sebastian Bible

¹¹ Toto 'ayn̈ec tztac' caln 'eli, a cab' spaxti Dios tzcalc 'eli. Toto 'ayn̈ec pax tzon̈ 'a'w servil, caw yelc'ojlal tzon̈ munljec, yujto a Dios tz'a'n quip. Wach' tzcutjec qui b'on smasnil tas, sec 'oj alxoc wach' paxti 'a Dios yuj Jesucristo. Alx cab'i' to caw niwn yel'chi, niwn spoder 'a smasnil tiempo. 'Ixta cab' tz'aji.

Chuj San Mateo Bible

¹¹ Tato ayon̈ scalel slolonel Dios, nachajocab' el cuuj to ton̈ej van on̈ yac'lab'an Dios calanel slolonel chi'. Tato ay on̈ syal cac'an servil, munlajoc on̈ d'a smasanil co c'ool, yujto a Dios tz'ac'an quip. Vach'n̈ej scutej smasanil, yic ol aljoc vach' lolonel d'a Dios yuj Jesucristo, yujto te nivan yelc'ochi, te ayn̈ej pax spoder d'a masanil tiempo. Amén.

A Sb'ab'el Carta San Pedro 4:11 Iomraidhean Croise

Salmos 145:13

A opiso cha, 'ayc'n̈ej 'a jun 'ejmn̈ej, Yajl 'ach 'a smasnil tiempo. Tzac' 'el'choc tas tzala, 'ay a chamc'ojlal 'a smasnil tas b'ob'il o'oj.

Is 8:20

Tze say eyila', tas xchi ley yet' spaxti Dios, xe chi 'a eb'. Toto 'oj yal eb' 'icha jun tzo'n̈ tzwal tic, toto 'ixta', 'icha to scal q'uic'q'uinl to 'ayc' eb', mant 'a sacq'uinl 'a spixn eb'.

Jeremías 23:22

Comnoc wal xyojquej 'el eb' tas nab'il wu'uj, toto a in paxti 'ix yal-l eb' 'a eb' in chon̈ab', to 'ixta', tox 'ix yij 'el sb'a am eb' 'a scal smaysch'olnilal, 'ix yactj am eb' sb'on tas tu'.

Dn 4:3

¡Man̈x jantcoc satjub'tacl jun tzo'n̈ tas tzb'o'o, yet' jun tzo'n̈ milagro tzch'oxo! Yajl 'a smasnil tiempo, 'oj b'eyn̈j yopiso 'a yib'n̈ junjn macn̈il 'anma'.

Dn 4:34

'Ix yaln pax win rey chi 'ixtic: A yic xtz'acw stiempoal jun yailal 'aych 'a wib'an̈, in q'ue q'ueln 'a satcha'an̈, 'ix tojlb'i can pax in nab'en. Xlajw cha, xwaln wach' paxti 'a jun Dios caw niwn yel'chi, 'ix wi'n chan̈ sb'i Dios jun mach 'ayc' 'a jun 'ejmn̈ej. Yajl yaj 'a jun 'ejmn̈ej. 'Oj b'eyn̈j yopiso 'a yib'n̈ junjn macn̈il 'anma'.

Dn 7:14

'Ix 'ajx yopiso yet' sb'inab'ilal yic tzya'n reyal. Smasnil 'anma 'a junjn nacion̈ yet' 'a junjn ti'al, c'uxn tz'a'w servil eb' 'a 'a. A yip 'ayc' 'a jun 'ejmn̈ej, ax yopiso cha, caw may xon b'a'n̈ 'oj lajwc 'ejmi.

Mt 6:13

Man̈ on̈ a cha 'ejmc yuj maysch'olnil on̈. Tzon̈ a coln can pax 'el 'a yol sc'ab' win syajlil maysch'olnil on̈. [Yujto smasnil tiempo cojn ach yajl ach. Caw niwn a poder, caw niwn el'chi. B'o cab' 'ixta', xe chi.]

Jn 13:31

Xlajw xoj yi'n 'el sb'a win Judas cha, 'ix yaln pax Jesús 'ixtic: —A ticnec, 'oj checljoc 'eli to caw niwn wel'ch an 'Ochnc in 'Anmal tic. Ax in ch'oxn pax 'eli, chajtlto caw niwn yel'ch Dios.

A Tas Sc'ulejnac Eb' Schecab' Jesús Hechos 7:38

Atn Moisés chi 'e'nc yet' eb' 'anma 'a lum cusltac lu'um. 'Ayc' pax jun ángel yet' eb', atn jun xpaxtin yet' Moisés chi 'a lum Sinaí. Ata 'ayc' pax eb' qui mam quichmec yet'oc. A 'a Moisés cha, ata ya'jnac can Dios jun tzo'n̈ spaxti tzyal yuj qui q'uinlec. Yuj cha, a 'a'jnac can pax 'ayn̈ec.

Ro 11:36

Yujto smasnil tas, an̈j 'a Dios tzcoti. Smasnil tas b'ob'il yu'uj, sec tzcheclj 'el swach'il. Niwn cab' yel'ch Dios 'a smasnil tiempo. 'Ixta cab' tz'aji.

Ro 12:3

A Dios, 'a'jnac wopiso tic yuj swach'c'ojlal. Yuj cha, tzwaln 'at jun tzo'n̈ tic 'ayx e masnil. Matz tac' qui nan junjn on̈ec, to caw jeln on̈. Yowlal 'emmquilal tzcutjec qui nan qui b'a, a tzyala tas 'opiso tzyac' Dios 'ayn̈ junjn on̈ec, yujto 'aych qui c'ojlec 'a 'a.

Ro 16:27

Cojxn Dios 'ojtnac smasnil tas. Smasnil tiempo calc wach' paxti 'a yuj Jesucristo. Ya' cab'i'.

Ro 3:2

Ma'ay, 'oj walb't 'ayex tas yaji. A wal 'a eb' 'aj ya'jnac Dios spaxti'.

1 Co 10:31

Palta tzwal't 'ayex, wach'xam tzon̈ wa'ec, mto tzcu'jec junc tas, tzann̈j cab' junc xo tas tzqui b'o'ec, yowlal caw wach' tzcutjec qui nab'en, sec wach' 'oj checljoc 'el swach'l Dios.

1 Co 12:4

An̈ec tic, chucchc 'opiso tzqui chaj junjn on̈ec, palta junn̈j mach tz'a'n 'ayn̈ec, atn Yespíritu Dios.

1 Co 3:10

An xo tic, 'icha junc b'om n̈a tznachj 'el sb'on junc n̈a cha, 'ixta 'in yuj swach'c'ojlal Dios. An tic, yic wec' 'a e cal ta', 'icha to 'ec' wa'jnac 'ejm yipnub'al yich junc n̈a. Ax ticnec, chucx mach wan smunlj 'a e cal. 'Icha to wan ya'n q'ue xamit 'a yib'n̈ jun yipnub'al yich cha. A junjn mach tzmunlj ta', yowlal caw tzyila, chajtl tzyutj ya'n q'ue jun tzo'n̈ xamit cha.

1 Co 6:20

yujto manb'iln̈ec xo 'eli. Yuj cha, yowlal caw wach' tzcutjec ca'n cuenta qui niwnalec tic, tzqui ch'oxnec 'el qui b'a, to caw niwn yel'ch Dios.

2 Co 2:17

An̈ tic on̈, man̈ yujoc ca'n ganar 'a spatc spaxti Dios, tz'ec' calnc 'el on̈, 'icha tzyutj sb'a nan̈l xo eb'. Tz'ec' cob' sb'al alnc 'el eb'. Palta an̈ xo tic on̈, caw yelc'ojlal tz'ec' cal-l on̈, yujto 'ac'b'il copiso yuj Dios on̈. Tz'ec' cal-l on̈, sec tzalj Dios quet' 'on̈, yujto schecb' on̈ Cristo on̈.

2 Co 9:13

'Oj yal eb' wach' paxti 'a Dios, yujto a jun eyofrenda chi 'oj ch'oxnoc, to wan eyiclni tas tzyal wach' 'ab'x yic Cristo. An̈jtona', 'oj yal pax eb' wach' paxti 'a 'a, yuj jun niwn colwal chi 'oj eyac' 'a eb'. Yujto a jun cha, 'oj colwjoc 'a eb' quit creyenteal smasnil.

Ef 1:19

Tzin c'ann pax 'a 'a, sec 'oj eyojcoc 'eli, to caw niwn yel'ch spoder, tztac' yuj smasnil. Atn jun chi 'aych 'ayn̈ec, yujto tzca'c 'och qui c'ojl 'a 'a. Sch'oxjnac, to caw niwn spoder si'mb'il,

Ef 4:29

Man̈x eyal jun tzo'n̈ comn tu paxti'al. Cojn jun tzo'n̈ paxti wach' tzlaj eyala', sec 'oj laj b'o snab'en eb' tz'ab'xni 'ayex, ax swach' 'och ste'nal eb' eyu'uj.

Ef 5:20

Smasnil tiempo, tzlaj eyac' yuj diosal 'a qui Mam Dios yuj jantcn̈ej tas tzlaj 'ec' 'ayex. A 'a sb'i Cajlil Jesucristo tzlaj eyac' yuj diosal.

Ef 6:10

A ticnec ex wu'tac, ex wanab', caw te'n tzcutjec qui b'a 'a yol sc'ab' Cajlilec. 'Och cab' qui te'nalec yuj spoder.

A Scarta San Pablo D'a Eb' Aj Filipos 1:11

'Oj wach' 'och wal Jesucristo eyet'oc, sec wach' tojln̈ej 'oj eyutc e b'eyb'al. Toto 'ixta', eyu'uj 'oj checljoc 'eli, chajtlto caw niwn swach'l Dios, ax yalx wach' paxti 'a 'a.

A Scarta San Pablo D'a Eb' Aj Filipos 2:11

Ax yaln eb' smasnil 'ixtic: Atn Jesucristo Cajlilec, 'oj schic eb'. 'Ixta 'oj 'aj scheclj 'eli, chajtlto caw niwn yel'ch qui Mam Dios.

A Scarta San Pablo D'a Eb' Aj Colosas 4:6

Wach'n̈j tzeyutj e paxtini, tze ch'oxn e wach'c'ojlal 'a eb'. Toto 'ixta', 'oj nachjc 'el eyu'uj, tas 'oj eyutc e pacn tas tzc'anb'j junjn eb' 'ayex.

1 Ts 2:4

'Icha tznib'j Dios, 'ixta xcutj 'ec' calnc 'el on̈, yujto xyil Dios, to smoj xya'ch copiso caln 'el wach' 'ab'x yic colnb'il on̈. Man̈ yujoc stzalj eb' 'anma quet' 'on̈, tz'ec' calnc 'el on̈, palta yuj wal stzalj Dios. Yujto a tz'iln qui nab'en junjn on̈ec, toto wach', mto ma'ay.

1 Ti 1:17

A Dios, Rey 'a smasnil tiempo. May b'a'n̈ tzchami. May junc mach tztac' yilni. Cojxn jun Dios tic, may junc xo. [Cojn 'ojtnac smasnil tas.] Caw niwn cab' yel'ch 'a qui sat. Smasnil cab' tiempo, cal wach' paxti 'a 'a. 'Ixta cab' tz'aji.

1 Ti 6:16

Dios chi may b'a'n̈ tzchami. Sacq'uinl 'aj 'ay. May junc mach tztac' sc'och 'a stz'ey. May xon junc mach tz'iln Dios, yujto may mach tztac' yilni. Caw niwn cab' yel'ch Dios 'a qui sat. 'Ay spoder 'a smasnil tiempo. 'Ixta cab' tz'aji.

Tito 2:1

Ach xo, tzach cuywj 'a tas smoj scuyxi. A jun tzo'n̈ cuynb'il caw yel, a tzala.

Tito 2:15

Caw tzal-l wal jun tzo'n̈ tic 'a scal eb' creyente ta'. Tzac' wal snab'enoc eb'. Caw tza tench wan eb' maysch'olnil sb'eyb'al, yujto atn opiso chi ta'. Caw wach' tzotj a b'a, sec may eb' tztac' yaln o'oj, to may opiso.

A Ch'an̈ Carta D'a Eb' Hebreo 13:7

Tze na cot eb' laj 'e'nc ex scuyu', eb' laj aljnac 'el spaxti Dios 'ayex. Tze na coti, tas 'ajnc eb' yuj swach' b'eyb'al. 'Icha yutjnac eb' ya'n 'och sc'ojl 'a Dios, 'ixta tzeyutj e b'a jun xo.

A Ch'an̈ Carta D'a Eb' Hebreo 5:12

'In 'ayx stiempoal eya'n 'och 'a e c'ojol. Smoj to cuywjumx xo ticnec. Palta an̈j jun tzo'n̈ b'ab'l cuynb'il yic Dios, yowlal an̈ja tzat alx 'ayex. Mant 'a e te'nal, lajn ex 'icha junc tz'ulc 'unn tzat chuwi, mant 'a jac tas tzc'uxu.

Santiago 1:19

Ex wu'tac, ex wanab', chamc'ojlb'ilx wu'uj. Eyojc xon jun tzo'n̈ tic tzwal tic. Yuj cha, caw lista tzeyutj e b'a eyab'xni. Man̈ comnoc tzeyal eyic muc'uc. An̈jtona', man̈ comnoc tzcot eyowal.

Santiago 1:26

Toto 'ayn̈ec tzqui na'a, to 'aych qui c'ojl 'a Dios, palta matz qui tench wan qui b'a 'a tas tzcala, nab'an̈ej tzqui na'a, to 'aych qui c'ojl 'a 'a. Mun tzquixtj paxti qui b'a qui nan 'ixta'.

A Sb'ab'el Carta San Pedro 2:12

Caw wach'n̈j tzcutjec qui b'eyb'al yil eb' mant 'ojtnacoc Dios. A ticnec, tzyal eb' to maysch'olnil tzcutjec qui b'a. Palta toto tzyil eb' qui wach' b'eyb'alec, 'oj yal eb' wach' paxti 'a Dios yic 'oj jawoc.

A Sb'ab'el Carta San Pedro 4:10

Tzlaj ca'laquec servil 'ayn̈ junjn on̈ec, a tzyala, tastc copiso tz'ajx yuj Dios. Toto 'ixta', wach' tzcutjec qui c'anlb'an copiso cha. Yujto chucch copiso tzyac' 'ayn̈ junjn on̈ yuj swach'c'ojlal.

A Sb'ab'el Carta San Pedro 4:16

Palta toto 'ayn̈ec, yujn̈ej to yic on̈c Cristo tzcab'nec syail, man̈ on̈ q'uixwoc. Calc wach' paxti 'a Dios, yujto yic on̈c xo Cristo.

A Sb'ab'el Carta San Pedro 5:11

A Dios caw niwn yel'chi, Yajl yaj 'a smasnil tiempo. 'Ixta cab' tz'aji.