Ex 16:3 - Chuj San Mateo Bible

³ Ix yalan eb' icha tic: —Comonoc ix el d'a sc'ol Dios to a d'a Egipto on̈ chamcani. Ata' tzon̈ em c'ojan d'a stz'ey lum chenal chib'ej, tzon̈ va'i, masanto tzon̈ te b'ud'ji. Palta a exxo tic ix on̈ eyic'cot d'a taquin̈ luum tic yic tzon̈ cham co masanil yuj vejel, xchi eb'.

Chuj San Sebastian Bible

³ Xlaj yalnc eb' 'a 'ixtic: —Comnoc on̈ smilc can Jehová 'a Egipto, 'a 'aj caw wach' qui chinec chib'ej, 'aj caw tzon̈ b'ut'jec wal si'mb'il. Ocxo jun, ax on̈ eyij cot 'a lum cusltac lum tic; 'in a 'a tic 'oj qui chamc yuj wejl qui masnil, xchi eb'.

Ex 16:3 Iomraidhean Croise

A Ch'an̈ Schab'l Libro Samuel 18:33

Ayic ix yab'an jun chi' vin̈ rey chi', ix och pitz'an d'a spixan vin̈, ix q'ue vin̈ d'a yib'an̈ b'aj ay spuertail jun chon̈ab' chi'. Van sb'ey vin̈, ix yalan vin̈ icha tic: Ay, ay ach vuninal aj Absalón. Comonoc a in ix in cham a q'uexuloc, xchi vin̈.

Job 3:1

Ayic ix lajviec' juntzan̈ chi', ix scatab'an vin̈aj Job chi' jun c'u b'aj aljinac. Ix yalan vin̈ icha tic:

Job 3:10

Tzin catab'ej jun ac'val chi', yujto maj syamoch vaan valjub'al. Tato maay, tecan max vil jantac yaelal yed' cusc'olal tic.

Job 3:20

¿Tas yuj syac' Dios saquilq'uinal yil eb' tz'ixtaji? ¿Tas yuj syac' sq'uinal eb' ayoch d'a syaelal,

Salmos 107:5

Ay svejel eb', ay staquin̈tial eb', toxo val scham eb'.

Salmos 78:19

Ix yalan specal Dios eb' icha tic: ¿Maxto ol yal-laj yac'ji co vael yuj Dios d'a tz'inan luum tic?

Salmos 78:25

A svael eb' ángel ix sva eb'. Cham ix va eb' yuj Dios.

Ex 14:11

Ix yalan eb' d'a vin̈aj Moisés chi': —¿Tom malaj campusante d'a Egipto, yuj chi' a d'a jun lum taquin̈ luum tic ix on̈ ic'coti yic tzon̈ cham d'a tic? ¿Tas val yuj ix on̈ iq'uelta d'a Egipto?

Ex 17:3

Palta axo eb' chon̈ab' yelc'olal scham eb' yuj taquin̈tial, yuj chi' ix q'ue yav eb' d'a vin̈aj Moisés chi', ix yalan eb': —¿Tas yuj ix on̈ iq'uelta d'a Egipto? ¿Tom yuj co cham yuj taquin̈tial yed' eb' cuninal yed' pax noc' co molb'etzal noc'? xchi eb'.

Ex 2:23

Ayic ayxo tiempo yajec' vin̈ d'a Madián chi', ix cham vin̈ sreyal Egipto. Palta axo eb' israel an̈eja' yab'an syail eb' yujto checab' yaj eb' ta'. Ichato chi' b'ian, ix ab'ji scusc'olal eb' yed' syaelal yuj Dios.

Ex 5:21

Ix yalan eb' vin̈ caporal chi': —Olxom yil Jehová tas ol ex yutoc, yujto a ex ay e mul, yuj chi' a vin̈ rey yed' eb' vin̈ ay yopisio yed' vin̈, tzon̈ syaj val eb' ticnaic. Ichato a ex ix eyac' q'uen espada d'a eb' vin̈ yic tzon̈ smilancham eb' vin̈, xchi eb' vin̈.

Jeremías 2:6

Majxo in snacot eb', vach'chom a in ix viq'uelta eb' d'a Egipto, ix vic'an b'ey eb' d'a lum tz'inan luum, lum taquin̈ sat, lum pac'quiltac, lum malaj mach cajan d'ay, lum malaj mach tz'ec' d'a sat.

Jeremías 42:14

Ol on̈ b'at d'a Egipto. Ata' ol on̈ cajnajoc, b'aj man̈xo ol quil oval, man̈xo ol cab' yoc' q'uen trompeta, man̈xo ol on̈ cham yuj vejel, tato xe chi,

Jeremías 44:17

An̈ej tas sco na' an̈ej ol co b'eyb'alej. Ol co n̈usn̈ej incienso, ol cac'n̈ej pax vino silab'il d'a ix yajalil satchaan̈, icha van co c'ulan ticnaic, icha sc'ulejnac pax eb' co mam quicham yed' eb' co reyal yed' eb' yajalil d'a yoltac juntzan̈ chon̈ab' d'a Judá yed' d'a yoltac scalleal Jerusalén. Yujto a d'a peca' chi', ay co vael, tzalajc'olaln̈ej ec'nac on̈, malaj yaelal javinac d'a quib'an̈.

Lm 4:9

Te vach' yic mach ix cham d'a oval d'a yichan̈ mach c'ojanc'olal ix cham yuj vejel.

Nm 11:15

Tato ol ac'n̈ej jun yaelal tic d'ayin, vach' ama tzin ac' chamoc. Tato xajan in uuj jun, iq'uinel d'a scal tzijtum yaelal tic, xchi vin̈.

Nm 11:20

palta jun ujal ol schi noc' chib'ej chi' eb'. Ol schi noc' eb' masanto ol xej eb' yuj noc'. Ol laj ja noc' d'a yoltac sn̈i' eb', masanto ol syaj noc' eb'. Yujto emnaquiltac ix in yutej eb' a in Jehová in ayinec' d'a e cal. Tz'oc' eb' d'a vichan̈ syalan eb': ¿Tas yuj ix on̈ iq'uelta d'a Egipto? xchi eb', xchi d'a vin̈.

Nm 14:2

Ix laj q'ue n̈ilnaj eb' yalan chucal lolonel d'a vin̈aj Moisés chi' yed' d'a vin̈aj Aarón, ix yalan eb' icha tic: Vach' am val tato a d'a Egipto on̈ chamcani, ma jun d'a tz'inan lum tic tzon̈ chami.

Nm 14:3

¿Tas yuj tzon̈ yic'b'at Jehová d'a jun lum luum chi', a am yuj co cham d'a scal oval ta', yic scan eb' ix quetb'eyum yed' eb' cuninal d'a yol sc'ab' eb' cajan ta'? Yelxom val vach' tato tzon̈ meltzaj d'a Egipto, xchi eb' israel chi'.

Nm 16:13

¿Tom jab'n̈ej tas tzon̈ utej? Ix on̈ iq'uelta d'a Egipto b'aj te vach', man̈ jantacoc tas ay d'a sat luum, ix on̈ ic'ancoti yic tzon̈ cham d'a tic. A gana to tzac'och a b'a yajalil d'a tic.

Nm 16:41

Axo d'a junxo c'u, masanil eb' israel ix och ijan yavaj chaan̈ d'a vin̈aj Moisés yed' d'a vin̈aj Aarón, ix yalan eb' icha tic: —A ex tic, ix e milcham eb' schon̈ab' Jehová, xchi eb'.

Nm 21:5

ix cot yoval eb' d'a Dios yed' d'a vin̈aj Moisés. Ix yalan eb' icha tic: —¿Tas yuj ix on̈ iq'uelta d'a Egipto? ¿Tom yuj co cham yuj vejel d'a taquin̈ luum tic? Malaj tas sco va'a, malaj pax tas scuq'uej. Maxtzac techaj co vaan juntzan̈ chucal vael tic, xchi eb'.

A Tas Sc'ulejnac Eb' Schecab' Jesús Hechos 26:29

Yuj chi', ix yalan vin̈aj Pablo chi': —Vach'chom yujn̈ej jab' ix val tic d'ayach, mato yujto tzijtumto tas ol eyab'i, comonoc tz'el d'a sc'ool Dios to icha ix in aj tic icha pax chi' tzach aj yed' jantac eb' ix ab'an tas ix val tic, palta max ex tzec'chajlaj d'a q'uen cadena icha vaj tic, xchi vin̈aj Pablo chi' d'a eb'.

1 Co 4:8

A exxo tic, ¿tom tz'acan exxo e naani? ¿Tom e chanacxo masanil yic Dios e naan ticnaic? Tecan yajal exxo e naani. Palta a on̈xo pax tic, man̈ on̈ yajaloclaj eyed'oc. Comonoc to d'a val yel yajal ex, yic a on̈ tic, tzon̈ ochpax yajalil chi' eyed'oc.

2 Co 11:1

Comonoc tzeyac' techaj juntzan̈ svalb'at tic d'ayex. Ichato malaj in pensar svalanb'ati, palta tzeyac' techajoc.

Dt 28:67

Ol ex te xiv val sic'lab'il yuj juntzan̈ te ay smay ol eyila'. A d'a q'uin̈ib'alil ol eyala': Tzoc val q'uic'b'i, xe chama. Axo d'ac'valil ol eyalanxi: Tzoc sacb'i, xe chama.

Dt 8:3

Ix quil syaelal yed' vejel yuj Jehová. Ix lajvi chi', ix yac'an maná co vaeloc, juntzan̈ vael to man̈ cojtacoc, man̈ yojtacocpax eb' co mam quicham. Icha chi' ix on̈ yutej yic vach' scojtaquejeli to man̈ yujocn̈ej tas vaji ay co q'uinal, palta to yuj masanil tas syal Jehová.

Josué 7:7

Ix yalan vin̈aj Josué chi' icha tic: —Ay Mamin Jehová, ¿tas yuj ix iq'uec'ta a chon̈ab' tic d'a sc'axepal a' Jordán tic? ¿Tom yuj on̈ satanel eb' amorreo, yuj chi' on̈ iq'uec'ta d'a jun lugar tic? Te vach' ama, ta ix on̈ can d'a sc'axepalec' a' Jordán chi'.