Zefania 3:4 - MUKANDA USANDU WA ZAMBI 1975

⁴ Aprofeta jenyi alelu, akwa mafwefwe; asasendote jenyi kakuchisa yuma yisandu ni kutangula shimbi.

Mukanda Wa Zambi 1970

⁴ Akwa munanyi kaali atu alelu kanda akwa mafwefwe. Mahako kaakuchisa yuma ya chijila, kaakubinjisa Shimbi ja Zambi ha kufumbula cho ene.

Zefania 3:4 Iomraidhean Croise

Izaya 9:15

Mukulwana mulemu iye we mutwe, profeta wa mahuza iye muchila;

Jeremia 23:32

Yehova kanambe ngwenyi, Kunalimika ni waze akuprofeteza yilota ya mahuza nikuyaula ni kupiangula atu jami ni mahuza jo, ni kulizelula cho, muze ami chaatumine chipwe kwaaha chiyulo, kashika kakwashile wano atu nichimwe. Chocho kanambe Yehova.

Jeremia 34:19

ni alemu ja A-Yunda, ni alemu ja Yerusaleme, ni aunuku, ni asasendote, ni akwa chifuchi eswe aze apalikile hakachi ka yihanda ya mwana-ngombe,

Jeremia 5:31

Aprofeta kanaprofeteza mahuza, ni asasendote kanayulu nikulita ni liji lio. Atu jami kanazange chikolo chikapwe chocho, alioze chika munulinga muze songo mulikeza?

Jeremia 8:10

Kashika munguhana mapwo jo kuli akwo, ni minda yo kuli akwa kukumba, mumu chize kuli mukepe wahiana ndo kuli munene Wahiana, eswe kali ni chipululu cha kufumbuka cha uhenge. Chize kuli profeta ndo kuli sasendote eswe kakulinga ni mahuza.

Lungungu 2:14

Aprofeta je hakumwena usolwelo wa mahuza, wa kwonga. Kasolwele uhenge we akahilwise kuwaha che, alioze hakumwena yilayi ya mahuza ni ya kukupiangula.

Ezekiel 22:26

Asasendote jenyi hatangula shimbi jami ni kujilula yuma yami yisandu. Kasele chinyingi hakachi ka yuma yisandu ni yuma yeswayo; kalongesele atu kusa chinyingi hakachi ka yuma ya luchisa ni yuma yipema. Halelesa masambata jami, chocho yami napwa kuli ayo wa kujilula.

Ezekiel 22:6

Alemu ja A-Izalele muli yena, mweswe hakachi ko hasa mbunge yenyi, nikulita ni tachi jenyi, kumwanga manyinga.

Ezekiel 44:23

Makalongesa atu jami kuhandununa hakachi ka yuma yisandu ni yuma yeswayo, nikwalweza kusa chinyingi hakachi ka yuma ya luchisa ni yuma yipema.

Hosea 9:7

Matangwa a kastigu hanahete; matangwa a kufwetesa hanahete; mba Izalele makachinyingika. Profeta hanapu chihepuke; mutu wa Spiritu hanapu chizaluke, mumu ha uhenge wenu unene ni kole yenu yinene.

Mika 2:11

Nyi mutu mendangana nikwambulula fuji ni mahuza ngwenyi, Mungunulumbunwina yuma ya vinyu ni kunwa chisasu kachi mwenawo mapwa Chilumbununyi wa wano atu!

Mika 3:11

Akwa lutwe jako kakupatula ha chindo; asasendote jako kakulongesa ha fweto; aprofeta jako kakutaha ha mbongo; hindu kakujamina hali Yehova nikwamba ngwo, Yehova hwali hakachi ketu; nichimwe chipi muchikatuwana.

Malaki 1:6

Mwana kakulemesa tato; ni kavumbi kakuvwila woma mwata wenyi. Nyi nguli tatenu ulemu wami ulihiwo? Nyi nguli mwata woma nwakunguvwila ulihiwo? Chocho kanambe Yehova-wa-Tujita kuli yenu asasendote nwakulelesa jina liami. Enu nunambe ngwenu, Kuchi twalelesa jina lie?

Malaki 2:7

Mumu mivumbo ya sasendote chatamba kufunga yinyingi. Chatamba atu akafupe shimbi ku kanwa lienyi, mumu iye kanganda ka Yehova-wa-Tujita.

Malaki 2:8

Alioze yenu hinwahambuluka mu jila; hinwatalingisa anji ni shimbi jenu; hinwalumbula usendo wa Levi. Chocho kanambe Yehova-wa-Tujita.

Mateu 7:15

Alioze keyelenu aprofeta a kwonga, waze akwiza kuli yenu ni mazalo ja mapanga, alioze muchima kanapu tungunga a kunuwumbula.

2 Korintu 11:13

Mumu wano kanapu apostolo ja mahuza, akwa kulinga tulimbalimba, nikulihipula ngwe apostolo ja Kristu.

1 Yoano 4:1

Akwetu a zango, kanda nufuliela maspiritu eswe, aiioze esekenu maspiritu, kachi mapwa maspiritu a kuli Zambi; mumu aprofeta a kwonga anji haneza hano hashi.

Usolwelo 19:20

Mba akwachile mwe ngongo, ni profeta wa kwonga hamwe nenyi, yoze walingile yilayi kumeso jenyi, yize wapiangwile nayo waze atambwile mufunda wa ngongo, ni waze awayilile kaponya kenyi: eswe ni aali aanyashine a mwono mu Chitende cha kahia chize cha kuyila ni fundanga.

Akwa Kuyula 9:4

Yamwaha makumi shimbiali a mbongo ja prata ja mu zuwo lia Mbale-Mberete mba iye yafweta najo amwe malunga amokomoko a kumukaula.

1 Samuel 2:22

Eli wapwile mukulwana chikolo. Iye wevwile yuma yeswe ana jenyi alingile kuli A-Izalele eswe; chize apombele ni mapwo aze avumbikile ku chikolo cha mbalaka ya chikungulwila.