Zefania 1:17 - MUKANDA USANDU WA ZAMBI 1975

¹⁷ Hali atu mungukokela kupinda, chocho kumakenda ngwe tupuputa, mumu hanavulumuna Yehova. Makazukula manyinga jo ngwe fufuta, ni musunya wo ngwe tuji.

Mukanda Wa Zambi 1970

¹⁷ Mwene Zambi kanambe ngwenyi: “Mungutuma lamba lieka ni lieka hali akwa hashi, mba mutu mweswe mapapata ngwe kapuputa. Haanguvulumuna, kashika manyinga jo maamwangana ngwe meya, ni mijimba yo muyikupuka vumba libi.”

Zefania 1:17 Iomraidhean Croise

Miaso (Masamu) 83:10

Anongene ku Endore. Alumukine ngwe wilo wa kusa ha mavu.

Izaya 29:10

Mumu Yehova hanazukula hali yenu Spiritu ya kuya tulo anji. Hanajiki meso jenu, ngwami, aprofeta, hanafuku mitwe yenu, ngwami, akwa kumona.

Izaya 50:1

Yehova kanambe ngwenyi, Mukanda wa noko, wa kumulakula ulihiwo, uze namulakwile nawo? Nanuhanyine tombo kuli iya hakachi ka akwa mikuli yami? Nwalanjiwile mumu ha uhenge wenu; ha Utanguko wenu ahumine noko.

Jeremia 10:18

Mumu Yehova kanambe ngwenyi, Nyingikenu mungunyasa haze akwa chifuchi mwakono. Mungwakokela huli hanga akalivwe.

Jeremia 15:3

Yehova kanambe ngwenyi, Mungusa hali ayo yonwonyi awana ngwami, Katana kushiha, ni tuwa kuwumbula, ni tujila a mu tetela, ni tushitu a hashi kulia ni kwonwona.

Jeremia 18:21

Kashika kunjika ana jo ku kapunga; wakunjike ku chiyulo cha katana. Mapwo jo apwe ndumba ni tuliwa. Malunga jo akafwe ni chilungo, ni akweze jo akaashihe ni katana mu jita.

Jeremia 2:17

Yena mwene walikokela chuma chino ha kwehuka Yehova Zambi ye shimbu te makusongwela mu jila.

Jeremia 2:19

Ungulungulu we muukakufumba kukatuka che kuli yami muchikakukanjisa. Nyingika umone chinapu chipi chisasu kukatuka kuli Yehova Zambi ye, woma wa yami wakuhi muli yena. Chocho kanambe Mwene Yehova-wa-Tujita.

Jeremia 3:25

Tupombenu mu sonyi jetu, ulelu wetu utufuke mumu hitwavulumuna Yehova Zambi yetu, ni yetu ni tulamba twetu chize ku ukweze wetu ndo musono. Kutwononokene ku liji lia Yehova Zambi yetu.

Jeremia 4:18

Ndako jenu ni yitanga yenu hiyanukokela chuma chino. Chino upatwilo wenu usasu chikolo; mba hiwanuheta ndo ku mbunge.

Jeremia 8:2

Mayimwanga kumeso ja tangwa ni kakweji ni mbunga yeswe ya mwilu, aze azangile nikwalingila, nikwakaula, nikwafupa, nikwawayila. Kechi kayikungulula chipwe kuyifunda. Kumuyikapwa ngwe wilo ha mavu.

Lungungu 1:14

Hakasa milonga yami ngwe kanga, ni kwoko lienyi hayijichika. Hayisa ha kota yami, hahongesa tachi jami. Mwene wangukunjikile kuli waze Chahashile kwakumba.

Lungungu 1:18

Yehova kanasambe, mumu nakolemene liji lienyi; alioze ivwenu enu mavungu eswe nukamone yikola yami. Anami a mapwo ni akweze jami hanayi funge.

Lungungu 1:8

Yerusaleme wavulumwine chikolo kashika walichishile. Waze eswe amulemesene haliapwila kanamulelesa mumu hamona uselesele wenyi. Ewa iye mwene kanatu mikuma ni kufuka meso jenyi.

Lungungu 2:21

Akweze ni makulwana kanapombo mu fufuta ya mu matapalo. Ana jami a mapwo ni akweze jami hanafu ni katana. Ha tangwa lia utenu we hiwaashihisa; Hiwaaliana ni keke yakuhi.

Ezekiel 16:38

Mungukakupatwila ngwe akupatwila mapwo aze akutangula ulo wo, ni waze akushiha atu. Mungukakukokela manyinga a ufwatulo ni ukwa.

Ezekiel 24:7

Mumu manyinga aze amwangine achili hakachi ko. Yaasa ha luliwe lwamokomoko; kasele ha mavu akaafuke ni fufuta.

Ezekiel 24:8

Hinasa ha luliwe manyinga aze hamwanga hanga kechi kaafuka, akavundule ufwatulo wami ngukaafwetese.

Amose 4:10

Natumine hakachi kenu chilungo ngwe chize cha Engitu; nashihile akweze jenu ni katana; nambachile tuvwalu twenu; napwishile yilombo yenu ya kukupuka vumba lipi mu mazulu jenu. Hindu kunwahilukile kuli yami. Chocho kanambe Yehova.

Mika 7:13

Alioze hashi muhapwa ha kwenyeka ha mukunda wa enyaho mumu ha mihuko ya yitanga yo.

Mateu 15:14

Ahichikenu: tupuputa kanafupu kusongwela tupuputa, nyi kachi kapuputa masongwela kapuputa, eswe aali kumakalimbukila mu wina.

A-ROMA 11:25

Mumu chazangile yenu, mandumbu, kwalajala ha chijimbikilo chino, kuchina munukanyama ni kutaka cha yenwene, ngwe kukalisa ha chihanda hichawana A-Izalele, ndo ku kuzala tò cha akwa mavungu muchiza:

A-ROMA 11:7

Mba kuchi? Chize A-Izalele akufupa, kachizukileko; alioze waze aatongwele hanachizuku, akwo hanakale:

2 Korintu 4:4

muli ayo zambi ya mwakono hanapupuchisa manyonga ja waze keshi kufuliela, hanga kupanguka cha sango lipema lia uhenya wa Kristu, Mwenawo che kulifwa cha Zambi, kuchichi kapanguka hali ayo.

2 Petulu 1:9

Mumu yoze wakuhona yino yuma iye kapuputa, chitalawili, se hanavulama chize amupemesene ku milonga yenyi yikulu.

1 Yoano 2:11

Alioze yoze mavwila kole ndumbwenyi mu milima ali, kakwenda mu milima, kanyingikine kuze maya, mumu milima hiyinapupuchisa meso jenyi.

Usolwelo 3:17

Mumu yena wakwamba ngwe, Nguli pichi, hingunapichi upite, chishi kuhona nichimwe; kwanyingikine yena uli mwe mukwa kulungajala, ni mukwa hunya, ni chiswale, ni kapuputa, ni uselesele uli nawo.