Zakaria 2:6 - MUKANDA USANDU WA ZAMBI 1975

⁶ Ivwenu! Ivwenu! Yehova kanambe ngwenyi, Chinenu chifuchi cha ku Norte. Mumu nanumwangine mwamwa ngwe fuji jiwana ja malilu. Chocho kanambe Yehova.

Mukanda Wa Zambi 1970

^6-7 Mwene Zambi yambila atu jenyi ngwenyi: “Hingunanumwangina mu yifuchi yeswe sali ni sali. Alioze haliabwila, yenu njize, katukenu mu Babilonia, nuhiluke ku Yerusaleme.

Zakaria 2:6 Iomraidhean Croise

Ubutukilo 19:17

Mba muze hamukatwisa hamuneha haze yamba ngwo, China, ulamwine mwono we. Kanda utala kunyima. Kanda ulaluka mu chana. Chinyina ku mulundu kuchina mununonga.

Miaso (Masamu) 44:2

Yena ni kwoko lie wahumine akwa mavungu, alioze o waatumbile. Wapinjishile e mavungu alioze o waatuswile.

Izaya 48:20

Katukenu ku Babilonia! Chinenu Kaletea! Ambululenu chino ni liji lia kulikwiza, chivwisenu! Tumenu liji lino ndo ku songo lia hashi. Ambenu ngwenu, Yehova hakula kavumbi kenyi Yakomba.

Izaya 55:1

Mweswawo uli ni pwilé! Eze ku meya. Yoze keshi mbongo, tweya ulande ukalie! Tweya ulande vinyu ni yamwa ni mbongo ka, ni ndando ka.

Jeremia 1:14

Yehova yamba kuli yami ngwenyi, Ku Norte chipi muchikatuka ni kuhulumukina hali akwa chifuchi eswe.

Jeremia 15:4

Mungwapwisa chuma cha lwaji kuli akwa mawanangana eswe a hashi mumu ha yize yuma Manase, mwana Hezekia, mwanangana wa Yunda walingile mu Yerusaleme.

Jeremia 3:18

Ha matangwa aze munyachi wa Yunda muulinunga ni munyachi wa Izalele mba hamuwika makatuka ku chifuchi cha Norte ni kwiza ku chifuchi chino nahanyine chihinga kuli tulamba twenu.

Jeremia 31:10

Enu mavungu, panjikenu liji lia Yehova nukaliambulule ku yifuchi ya mbaka kusuku. Ambenu ngwenu, Yoze wamwangine Izalele kumakamukonga nawa ni kumufunga ngwe kafunga kakuhinga mapanga jenyi.

Jeremia 31:38

Yehova kanambe ngwenyi, Matangwa kaneza muze matungila Yehova chihunda chino chize ku kaposhi ka Hananele ndo ku chikolo cha mbango.

Jeremia 31:8

Mungwachiza ku chifuchi cha ku Norte, mungwakonga chize ku kusula-songo lia hashi. Hakachi ko kumukukapwa afwa-meso ni yitonji, ni tufumba ni tufumbakaji hamuwika, mbunga yinene, eswe makahiluka kuno kwene.

Jeremia 50:8

Chinenu hakachi ka Babilonia. Tuhukenu mu chifuchi cha A-Kaletea nukapwe ngwe kuji ja pembe kulutwe lia mbunga.

Jeremia 51:45

Enu atu jami katukenu muli iye! Mutu mweswe alamwine mwono wenyi ku utenu usasu wa Yehova!

Jeremia 51:50

Enu kunwafwile ni katana yénu, kanda numana chizechene! Iwulukenu Yehova chipwe nuli kusuku. Yerusaleme nuyiwuluke mu manyonga jenu ngwenu,

Jeremia 51:6

Chinenu hakachi ka Babilonia, mutu mweswe alamwine mwono wenyi! Kanda anusutula mu kastigu yenyi mumu mwaka wa kukala wa Yehova, uno, che kufwetesa chenyi kuli iye.

Ezekiel 11:16

Kashika amba ngwe, Mwene Yehova kanambe ngwenyi, Chipwe naatwalile kusuku hakachi ka mavungu, chipwe naamwangine hakachi ka yifuchi, hindu hinapwa kuli ayo chiswamo ha shimbu lino mu yifuchi kuze ayile.

Ezekiel 17:21

Ni akwa kuchina a ku maswalale jenyi makafwa ni katana, ni waze malisalaho makamwangana ku fuji jeswe, mba munukanyingika yami Yehova nachambile.

Ezekiel 5:10

Kashika malunga malia ana jo a malunga hakachi kenu; ni ana a malunga malia atato, mba mungulinga upatwilo hali yenu, ni waze malisalaho mungukanumwangina ku fuji jeswe.

Ezekiel 5:12

Chihanda chamuchitatu cha yenu muchifwa ni chilungo ni kunonga ni kapunga hakachi kenu; chihanda chamuchitatu muchifwa ni katana kwa kunujingilika; chihanda chamuchitatu mungumwangina ku fuji jeswe ni kutomona katana kunuhanga.

Daniel 11:4

Mba muze hatatuka, wanangana wenyi maumakuna ni kuupangila ku mafuji awana a mwilu alioze hi kuli ana jenyi ko; ni kuyula kechi kayula nikulita ni chiyulo chenyi, mumu wanangana wenyi mautukula akauhane kuli akwo nawa helu lia wano.

Amose 9:9

Mumu mungukatuma kusakumuna munyachi wa Izalele hakachi ka mavungu ngwe umwe kakusakumuna musalo wa masekeseke, alioze nikamwe kaliwe mukaholoka hashi kakuhi.

Zakaria 1:16

Kashika Yehova kanambe ngwenyi, Hinahiluka ku Yerusaleme ni keke. Yehova-wa-Tujita kanambe ngwenyi, Zuwo liami malitungamo; muhipu wa kweseka mautachika ha Yerusaleme.

Zakaria 2:7

Ivwenu yenu nwakutwama mu mwana-pwo Babilonia, chinyinenu ku Zaione.

Mateu 24:31

Kumakatuma angelo jenyi ni liji linene lia chitavwi, no makakungulula waze hanaatongola kuli iye ku fuji jiwana, ku songo limwe lia malilu ndo ku songo likwo.

Marku 13:27

Hohene makatuma angelo jenyi, akakungulule waze hanaatongola iye, ku fuji jiwana, ku kusula songo lia hashi ndo ku kusula songo lia lilu.

Shimbi 28:64

Yehova makanumwanga hakachi ka mavungu eswe, katuke ku songo limwe lia hashi ndo ku songo likwo lia hashi. Munukavumbikako tuzambi tweka, kunwatunyingikine chipwe yenu, chipwe tulamba twenu, te mitondo ni mawe.

Usolwelo 18:4

Mba nevwile liji likwo lia kukatuka mwilu, ngwo, Tuhukenumo, atu jami, hanga kunuchi kaliendela ni milonga yenyi, hanga kunuchi katambula ya ku lamba lienyi;

Rute 4:1

Mba Mboaze wayile ku chikolo cha chihunda, yatwamako. Kumanyi mwe usoko wa ha muchima yoze Mboaze hamuvuluka yapalika. Mba Mboaze yamba ngwenyi, A mukwetu tweya ku kuno Utwame. Iye yeza, yatwama.