Zakaria 10:7 - MUKANDA USANDU WA ZAMBI 1975

⁷ Henaho Eframe malumuka ngwe kajita wa ndundo, ni mbunge jo mujikapwa ni chiseke ngwe cha vinyu. Ana jo makachimona; makawahilila, ni mbunge jo mujikalikwiza muli Yehova.

Mukanda Wa Zambi 1970

⁷ Aisraele maakatakama ngwe tujita a tachi, maakabwa ni chiseke ngwe waze haanwa vinyu. Ana jo kumaakewuluka kukumba chino, kumaakawahilila ha chize Mwene Zambi halinga.

Zakaria 10:7 Iomraidhean Croise

Ubutukilo 18:19

Mumu hingunamunyingika hanga akayule ana jenyi ni munyachi wenyi kulutwe, akafunge jila ya Yehova akalinge ni ululi ni upatwilo, hanga Yehova akalinge kuli Apalahama yuma yize hamushindakenya.

Ubutukilo 43:34

Yanda nawa kulia ku mesa yenyi nikuchituma kuli ayo, alioze kulia cha Mbenjamine chahianyine nicho yisuho yitano. Chocho anwine nikusehejela nenyi.

Miaso (Masamu) 102:28

Ana ja tuvumbi twe kumakalinduluka. Munyachi wo kumakaukolesa kumeso je.

Miaso (Masamu) 104:15

ni vinyu yiza ya kuwahisa mbunge ya atu, ni maji a kulejimisa meso jenyi, ni kulia cha kutakamisa mbunge yenyi.

Miaso (Masamu) 13:5

Alioze kunafuliela mu utu wa zango lie. Mbunge yami muyiwahilila mu ulamwino we.

Miaso (Masamu) 28:7

Yehova iye tachi jami ni lukepwe wami. Mbunge yami kuyamufuliela; kangukwasa. Kashika mbunge yami yinawahilila chikolo, mungumunalisa ni mwaso wami.

Miaso (Masamu) 33:21

Mumu mbunge jetu mujiwahilila muli iye, se twafuliela jina lienyi lisandu.

Miaso (Masamu) 90:16

Yitanga ye yikasoloke kuli tuvumbi twe. Uhenya we ukapwe hali ana je.

Izaya 25:9

Ha tangwa lize mamba ngwo, Mwe Zambi yetu yono! Twamutwaminyinyine atulamwine. Mwe Yehova yono twatwaminyinyine tuwahililenu ni kulikwiza ni ulamwino wenyi.

Izaya 38:19

Wa mwono mwe wa mwono kakukusakwila, chize yami ngunalingi musono. Mutu kakulumbunwina mwanenyi umwenemwene we.

Izaya 54:13

Ana je eswe a malunga maalongesa kuli Yehova, ni ana je eswe mapwa ni uhwimino wunji.

Izaya 66:14

Munukamona mba mbunge jenu mujikawaha; yifwaha yenu muyikawaha ngwe mwambu. Muchikafumana ngwo, Kwoko lia Yehova lili hamwe ni tuvumbi twenyi; utenu wenyi unalimika ni akwa kole jenyi.

Jeremia 32:39

Mungukaaha mbunge yimuwika ni jila yimuwika hanga akanguvwile woma ndo ku miaka hanga akawahe ene ni ana jo waze maakaula.

Ezekiel 37:25

Kumakatwama mu chifuchi kuze tulamba twenu atwamine, chize nahanyine kuli kavumbi kami Yakomba. O, ni ana jo, ni ana ja ana jo kumakatwamamo ndo ku miaka yeswe, ni kavumbi kami David kumakapwa mwe mulemu ndo ku miaka yeswe.

Joele 2:23

Enu ana ja Zaione, Wahililenu. Likwizenu muli Yehova Zambi yenu, mumu kakunwaha vula musazu nikulita. Kakunutuma vula, ni vula musazu, ni vula wa samakwasa ha kakweji mutangu.

Habakuke 3:18

hindu munguwahilila muli Yehova; mungulikwiza muli Zambi ya ulamwino wami.

Zefania 3:14

Ena mwana-pwo Zaione, imba ni liji linene. Ena Izalele, kololoka! Ena mwana-pwo Yerusaleme wahilila ni kulikwiza ni mbunge ye yeswe.

Zakaria 12:8

Ha tangwa lize Yehova majingilika akwa Yerusaleme ni lukepwe, chocho chipwe alelu chikolo hakachi ko ha tangwa lize makapwa ngwe David, mba akwa munyachi wa David makapwa ngwe Zambi, ngwe mungelo wa Yehova kulutwe lio.

Zakaria 9:15

Yehova-wa-Tujita maafunga; makashiha ni kuliata akwa kukonga mawe. Makanwa manyinga jo ngwe vinyu. Makazala ngwe misenge, ngwe mbango ja chilumbilo ja pwocha ni manyinga.

Zakaria 9:17

Ewa muchikapwa chipema, cha uhenya. Mbuto muyikawahisa akweze ni vinyu yaha muyikawahisa ana-mapwo.

Luka 1:47

Spiritu yami hiyinalikwiza muli Zambi Chilamwina chami.

Yoano 16:22

Ni yenu kashika haliapwila chinyengo nuli nacho, alioze mungukanumona cheka nawa, ni mbunge jenu mujikawahilila, ni uwahililo wenu niumwe manuchizawo.

Yilinga 13:33

ngwo, Zambi hanachimanununa kuli yetu ana jo, se wasolwele Yesu; ngwe chinasonewa nawa mu Samu liamuchiali ngwo, Mwanami Yena, tangwa lino hingunakuseme.

Yilinga 2:26

kashika, mbunge yami yevwile chiseke, ni limi liami lialikwijile; ewa, musunya wami nawa kumuukahwima ni kutalatala:

Yilinga 2:39

Mumu kuli yenu chilakenyo kuchili, ni kuli ana jenu, ni kuli waze atwama kusuku, ni kuli waze eswe mwe Mwene Zambi yetu makatambika kuli iye.

Filipu 4:4

Wahililenu muli Mwene matangwa eswe: cheka nawa mungwamba ngwami, Wahililenu.

1 Petulu 1:8

yoze chipwe kunwamumwene, hindu nwakumuzanga; chipwe haliapwila kunushi kumumona, hindu se nunamufuliela, nwakulikwiza ni uwahililo uze keshi kuhasa kuuhanjika, wa tò ni uhenya.

1 Samuel 2:1

Mba Hana walembele ngwenyi, Mbunge yami yinawahilila muli Yehova, mbinga yami yazunduka muli Yehova. Kanwa liami hiliatoha helu lia akwa kole jami, mumu ngunawahilila mu ulamwino we.