Yuda 1:24 - MUKANDA USANDU WA ZAMBI 1975

²⁴ Haliapwila kuli yoze mahasa kunufunga hanga kunuchi kutalinga, ni kunumanyisa kulutwe lia uhenya wenyi ni kulikwiza kunushi kapalia.

Mukanda Wa Zambi 1970

^24-25 Mu jina lia Mwene wetu Yesu Kristu, uhenya, ni ulamba, ni ndundo, ni yiyulo ya Zambi yisoloke, chize ku miaka yize hiyabalika, ni musono uno, ndoo ku miaka yeswe! Zambi, Chilamwina chetu, kali umuwika lume. Iye mahasa kunufunga hanga kunuchi kalimbuka; mahasa kunusolola kunushi chibeka ni uwahililo kuhiana mu uhenya wenyi. Chibwe kama Chenacho.

Yuda 1:24 Iomraidhean Croise

Miaso (Masamu) 21:6

Mumu wakumu wahisa ku miaka ya mutolo; hiwamwaha chiseke cha uwahililo kumeso je.

Miaso (Masamu) 43:4

Mba munguheta ku chilumbilo cha Zambi; kuli Zambi iye uwahililo wami Wahiana. Yena Zambi, Zambi yami, mungukwalakana ni kalialia.

Alevi 14:11

Mba sasendote mukwa kupemesa matumbika yoze mamupemesa hamuwika ni yuma yino kumeso ja Yehova ku chikolo cha mbalaka ya chikungulwila.

Mateu 16:27

Mumu mwe Mwana Mutu kumakeza mu uhenya wa Tato hamwe ni angelo jenyi, hohene kumakahana kuli mweswe nikulita ni yilinga yenyi.

Mateu 19:28

Yesu ngwenyi, Pundu ngwami, Yenu hinunangukaula, ha kupwisa chaha cha yuma yeswe, muze mwe Mwana Mutu makatwama ha ngunja yenyi ya uhenya, ni venu nawa kumunukatwama ha kumi lia ngunja ni ngunja jiali, nikupatwila kumi lia mavungu ni mavungu aali a Izalele.

Mateu 25:31

Alioze muze mwe Mwana Mutu meza mu uhenya wenyi, ni angelo asandu eswe hamwe nenyi, hohene makatwama ha ngunja yenyi ya uhenya:

Mateu 5:12

Wahililenu, likwizenu, mumu kwononona chenu chinene mu malilu: mumu chocho ahungumionene aprofeta waze aliangilile.

Luka 9:26

Mumu mweswawo mevwa sonyi hali yami ni ha maliji jami, mwe Mwana Mutu kumakamuvwila sonyi, muze meza mu uhenya wenyi mwene, ni wa Tato, ni wa angelo asandu.

A-ROMA 14:4

Yena iya, wakupatwila ngamba ya mbala? Kuli Mwene wenyi mamana, hanji malimbuka. Iye mamumanyisa; mumu Mwene mahasa kumumanyisa.

A-ROMA 8:31

Kuchi mutwamba ku yino yuma? Ngwetu, Kachi Zambi mapwa hamwe ni yetu, iya malimika ni yetu?

2 Korintu 11:2

Mumu ngunanuvwila ukwa umwe wa kuli Zambi: mumu nanulakenyene kuli lunga umuwika hanga ngukanutumbikile kuli Kristu ngwe *virgem wa kulinanga.

2 Korintu 4:14

tunanyingika yoze wahindwishile Mwene Yesu Kristu, makatuhindwisa yetu nawa hamwe ni Yesu, kumakatuhetesa kumeso jenyi hamwe ni yenu.

2 Korintu 4:17

Mumu luyinda wetu mulelu, wa kashimbu kano kakepekepe, kakulinga hali yetu kulumbama chahiana cha uhenya wa mutolo;

Efesu 3:20

Haliapwila kuli yoze wakuhasa kulinga kuhiana chikolo chize cheswe mutwita, hanji mutunyonga, nikulita ni tachi jize jakulinga muli yetu,

Efesu 5:27

hanga akatumbikile chikungulwila kuli iye mwene, cha uhenya, kuchishi chipeka, hanji mukanya, hanji chuma chimwe ngwe chino; alioze hanga chikapwe chisandu, kuchishi kapalia.

Kolosu 1:22

hindu haliapwila hananuwanyisa mu mujimba wa musunya ku kufwa, mukunutumbikila ku usandu, kunushi kapalia, akwa kusamba kumeso jenyi.

Kolosu 1:28

Iye twakumwambujola, nikukanyamisa mutu ni mutu, nikulongesa mutu mweswe ni mana eswe, hanga tukatumbikile mutu ni mutu mungunu muli Kristu.

Kolosu 3:4

Muze makasolola Kristu, iye mwono wetu, hohene ni yenu nawa makanusolola hamwe nenyi mu uhenya.

2 Timoteu 4:18

Mwene kumakangupulula ku yitanga yeswe yipi, makangulamwina ndo ku wanangana wenyi wa mwilu: uhenya ukapwe kuli iye ndo ku miaka yeswe ya mutolo. Amene.

Tiangu (Jake) 2:10

Mumu mweswe mafunga shimbi jeswe lukombo, hindu matangula chihanda chimuwika, hahia ha jeswe.

1 Petulu 4:13

Alioze se nuli akwa kuhangana ni lamba lia Kristu, wahililenu; hanga ha usolwelo wa uhenya wenyi nawa nukawahilile nikulikwiza.

2 Petulu 1:10

Kashika, mandumbu, lipupwisenu kukolesa chinyingi cha kwamba ngwenu, Hanatutambika, hanatutongola; mumu kachi munulinga yino yuma kachi kunuchi kalimbuka nilimwe tangwa.

Yuda 1:21

Lifungenu mu zango lia Zambi, nikutalatala keke ya Mwene wetu Yesu Kristu ndo ku mwono wa mutolo.

Usolwelo 14:5

Mu makanwa jo kawanyine mahuza niamwe, keshi kapalia.