Yoshua 10:6 - MUKANDA USANDU WA ZAMBI 1975

⁶ Malunga a Ngibeone yatuma kuli Yoshua mu chilombo cha Ngilingali ngwo, Kanda nwecha yetu ngamba jenu ku kwoko lienu. Tweyenu kuli yetu fuji nutulamwine, nutukwase mumu mianangana eswe a A-Amore wano atwama mu milundu hanalikungulula kulimika ni yetu.

Mukanda Wa Zambi 1970

⁶ Malunga ja Gibeone yaatumina Yoshua liji ku musumba wa Gilgale, ngwo: “Kanda nutwehuka kama, yetu ngamba jenu! Tweyenu nikawashi nutukwase! Tulamwinenu tunalembe! Mianangana ja Aamore eswe a ku chifuchi cha milundu haalikungulula ni kwasa jita ni yetu!”

Yoshua 10:6 Iomraidhean Croise

1 MIANANGANA 4:24

Yalulika chimbulu, yamba kuli ngamba ngwenyi, Enda! tambuka! kanda ukokolola je fuji shina mungukwambacho.

Miaso (Masamu) 125:2

Chizechene ngwe milundu yajingilika Yerusaleme, chocho Yehova kajingilika atu jenyi, chize ku tangwa lia musono ndo ku miaka ya mutolo.

Izaya 33:22

Mumu Yehova iye ngaji yetu, Yehova iye mukwa kutuyula; Yehova iye mwanangana wetu, makatulamwina.

Kwalula 13:29

A-Amaleke katwama mu chifuchi cha Negeve; ni A-Hete, ni A-Yepushe, ni A-Amore katwama ku milundu; ni A-Kanana katwama ku mbaka ni mu chikulo cha Yordau.

Luka 1:39

Maria wakatukile ha matangwa aze, wayile kapupushi ku chifuchi cha milundu, ku limbo lia mu Yunda.

Shimbi 1:15

Mba yinguchiza akwa lutwe ja minyachi yenu, akwa mana, akwa lufuma, hikwaapwisa akwa lutwe jenu, miata ja tununu, miata ja kulakaji, miata ja makumi atano, miata ja kumi, yilolo, nikulita ni minyachi yenu.

Yoshua 10:5

Mba e mianangana atano a A-Amore, mukwo mwanangana wa Yerusaleme, mukwo mwanangana wa Heprone, mukwo mwanangana wa Yaramuta, mukwo mwanangana wa Lakishi, mukwo mwanangana wa Eglone yakungulula tujita two, yakanduka ni maswalale jo eswe, yasa chilombo cho kulutwe lia Ngibeone nikwasa no jita.

Yoshua 10:7

Kashika Yoshua yakatuka ku Ngilingali, iye ni tujita eswe hamwe nenyi, ni akwa hamu eswe a tachi.

Yoshua 21:11

Aahele Kiriate-Arpa, Arpa te iye tato ya Anake (acho ngwetu, Heprone) mu chifuchi cha Yunda ku milundu hamwe ni ulilo wa kujingilika.

Yoshua 5:10

Shimbu A-Izalele achili ku Ngilingali mu chilombo, afungile Chizomboka ha tangwa kumi ni liamuchiwana ha chingoloshi, ha yana ya Yeriku.

Yoshua 9:15

Yoshua wawanyine no. Yakolesa no usendo akatwame ni mwono. Akwa lutwe a chikungulwila alalikenyene no ni shingo.

Yoshua 9:6

Chocho ayile kuli Yoshua mu chilombo ku Ngilingali, yamba kuli iye ni malunga a Izalele ngwo, Etu twakatuka ku chifuchi chisuku, kashika kolesenu usendo ni yetu.

Yoshua 9:8

O yamba kuli Yoshua ngwo, Tuli ngamba jenu. Yoshua yamba kuli ayo ngwenyi, Yenu aya? Kulihi nunakatuka?