Yoano 5:10 - MUKANDA USANDU WA ZAMBI 1975

¹⁰ Kashika A-Yunda ambile kuli yoze wahindukile ngwo, Musono lie tangwa lia Sambata; kuchalitele ni shimbi kumbata chalo che.

Mukanda Wa Zambi 1970

¹⁰ Kashika Ayuda yambila mutu yoze ngwo: “Musono tangwa lia kuhwima. Kuchalitele ni Shimbi kumbata muhela we.”

Yoano 5:10 Iomraidhean Croise

Izaya 58:13

Nyi munuchiza yiliato yenu ku Sambata, ni kulitwamina kulinga upale wenu ha tangwa liami lisandu, ni kuvuluka Sambata tangwa lia kuwahilila, ni tangwa lisandu lia Yehova mulipwa lilemu; nyi munulilemesa, kunwayile mu majila ja yenwene, nyi kunuchi kufupa kuliwahisa yenwene hanji kuhanjika yuma yamokomoko;

Jeremia 17:21

Yehova kanambe ngwenyi, Kanyamenu mumu ha mwono wenu, kanda nuzundula chiteli ha tangwa lia Sambata, hanji kuchinjishila ku yikolo yino mu Yerusaleme.

Jeremia 17:27

Alioze nyi kunuchi kungupanjika, kufunga Sambata nikulitwamina kumbata chiteli nikunjila ku yikolo ya Yerusaleme ha Sambata, munguwika kahia mu yikolo yayo, mba mukalalisa palasiu ja Yerusaleme ni kujima ka.

Mateu 12:10

Kumanyi, mwapwilemo mutu ni kwoko lia kusosewa, amuhulile ngwo, Muchilita ni shimbi kuwuka ha tangwa lia Sambata, nyi? Hanga akamusume mutonga.

Marku 2:24

A-Fwariseu ambile kuli iye ngwo, Tala, kuchi te analingi ha tangwa lia Sambata chize kuchalitele ni shimbi?

Marku 3:4

Mba yamba kuli ayo ngwenyi, Muchilita ni shimbi kulinga yipema ha tangwa lia Sambata nyi, shina kulinga yipi? Shina kulamwina mwono, nyi shina kushiha? Alioze aholele kulungunga kwo.

Luka 13:14

Alioze mukwa kuyula sunangonga te kanevu kupiha, mumu Yesu wawukile ha tangwa lia Sambata, wakumbulwile ku mbunga ngwenyi, Kwali matangwa asambano a milimo, kashika nwize ha matangwa aze anuwuke, hi ha Sambata ko.

Luka 23:56

O ahilukile, alulikile mbuto ya vumba lipema ni yitumbo yipema ya kukwita. Ha tangwa lia Sambata anamine nikulita ni liji lia shimbi.

Luka 6:2

Alioze amwe a kuli A-Fwariseu ambile kuli ayo ngwo, Kuchi te nunalingi chize kuchalitele ni shimbi kulinga ha tangwa lia Sambata?

Yoano 1:19

Yino ye Shindakenyo ya Yoano, muze A-Yunda atumine ku Yerusaleme asasendote ni A-Levi, hanga akamuhule ngwo, Yena iya?

Yoano 5:11

Waakumbulwile ngwenyi, Yoze wangupwisanga mungunu, mwenawo kambanga kuli yami ngwenyi, Anda chalo che, wende.

Yoano 5:15

Yoze mutu wayile, wambulwilile A-Yunda ngwenyi, Iye Yesu yoze wangupwisanga mungunu.

Yoano 5:16

Ha chikuma chino A-Yunda ahungumionene Yesu, mumu walingile yino yuma ha tangwa lia Sambata.

Yoano 7:23

Kachi mutu matambula ungalami ha tangwa lia Sambata, hanga kechi katangula shimbi ya Mose; nunevu matoto ni yami, mumu napwishile mutu mungunu liakulu ha tangwa lia Sambata, nyi?

Yoano 9:16

Amwe a kuli A-Fwariseu ambile kashika ngwo, Yono mutu hi wa kuli Zambi ko, mumu keshi kufunga tangwa lia Sambata. Alioze akwo ambile ngwo, Ngwe kuchi chivulumunyi mahasa kulinga yilayi ngwe yino? Kwapwile kulihandununa hakachi ko.