Yoano 4:14 - MUKANDA USANDU WA ZAMBI 1975

¹⁴ alioze mweswawo manwa meya aze mungumwaha yami, kechi kevwa pwila nichimwe ku miaka ya mutolo; alioze meya aze mungumwaha kumakapwa muli iye fuji lia meya lia kuvwelwoka ku mwono wa mutolo.

Mukanda Wa Zambi 1970

¹⁴ Mumu meya waze mungumwaha maakavelwoka muli iye ngwe mu shima lia meya a mwono wa miaka yeswe.”

Yoano 4:14 Iomraidhean Croise

Izaya 49:10

Kechi kevwa zala hanji pwila; kechi kalambiwa ni fuji ya chivukuminya chipwe ni mwalwa, mumu mukwa kwavwila keke kumakaatetekela, kumakaasongwela ku mafuji a meya.

Izaya 55:1

Mweswawo uli ni pwilé! Eze ku meya. Yoze keshi mbongo, tweya ulande ukalie! Tweya ulande vinyu ni yamwa ni mbongo ka, ni ndando ka.

Izaya 58:11

Ni Yehova makanusongwela matangwa eswe, ni kunuyukisa ni yuma yipema, ni kutakamisa yifwaha yenu. Kumunukapwa ngwe chala cha kutuchika, ngwe fuji lia meya lize kulichi kuma.

Jeremia 2:13

Mumu atu jami halinga yuma yipi yiali. Hanangwehuka, yami lie fuji lia meya a mwono, mba hanalitotela mashima ene, mashima a miaji, kahashile kupwa ni meya.

Jeremia 31:25

Mumu munguyukisa mbunge ya yikatalo; munguzalisa mbunge yeswe yinahongo.

Ezekiel 47:9

Kweswako lwiji matalikisa tushitu eswe akulisunga matwama ni mwono. Kumukupwa nawa yishi anji, mumu meya wano kanayiko hanga meya a kalunga-lwiji akayeme, hanga yuma yeswe yikapwe ni mwono kuze lwiji anayi.

Alevi 11:36

Alioze fuji lia meya hanji shima lia meya anji o makapema, alioze mweswawo makakwata ku mijimba yo ya kufwa halichisa.

Mateu 25:46

Wano kumakaya ku lamba lia mutolo, alioze akwa ululi ku mwono wa mutolo.

Mateu 5:6

Kawaha waze akwivwa usona ha ululi, ngwe zala ni pwila anevu, mumu kumakakuta.

Yoano 10:10

Mwiji keshi kwiza shina ha kwiya, akashihe, akonwone: yami nejile hanga akapwe ni mwono, hanga akapwe nawo wa kulumbama.

Yoano 11:26

Ni mweswe uli ni mwono, mangufuliela, kechi kafwa nichimwe ndo ku miaka ya mutolo; Unafuliela chino, nyi?

Yoano 4:10

Yesu wamukumbulwile, ngwenyi, Kachi yena wanyingika chawana cha Zambi ni yoze unambe kuli yena ngwenyi, Ngwehe kama meya ngunwe; kachi wamwita ni kachi wakwaha meya a mwono.

Yoano 4:11

Pwo yamba kuli iye ngwenyi, Mwene, yena kushi nichimwe cha kuswita nacho, ni shima lisuku, mba kulihi unatambula meya a mwono?

Yoano 4:13

Yesu wamukumbulwile, ngwenyi, Mweswawo manwa meya ano mevwa pwila cheka nawa:

Yoano 4:36

Yoze macha matambula fweto, iye mahela mihuko ya kutwala ku mwono wa mutolo; hanga ni yoze makuwa ni yoze macha akawahilile hamuwika.

Yoano 6:27

Kanda nukalinga milimo ha kulia chize cha kutoka, alioze nukalinge milimo ha kulia chize chili ni mwono wa mutolo, chenacho mwe Mwana Mutu makanwaha: mumu iye, Zambi mwe Tata hanamujiki ni Chijikilo.

Yoano 6:35

Yesu wambile kuli ayo ngwenyi, Mbolo ya mwono yami; yoze meza kuli yami kechi kevwa zala nichimwe, ni yoze mangufuliela yami kechi kevwa pwila nichimwe ha mwaka niumwe.

Yoano 6:58

Yino ye mbolo yahulumukine mwilu: kuchapwile ngwe tulamba twenu alile maná, afwile; yoze malia mbolo yino kumakapwa ni mwono ndo ku miaka ya mutolo.

Yoano 7:37

Achi, ha tangwa lia kusula, lie tangwa linene lia chiwanyino, Yesu wamanyine nikukololoka ngwenyi, Kachi umwe mevwa pwila, eze kuli yami, anwe.

A-ROMA 5:21

Hanga chizechene ngwe shili yayulile mu kufwa, chocho nawa vumbi likayule ku ululi ndo ku mwono wa mutolo mumu hali Yesu Kristu Mwene wetu.

A-ROMA 6:23

Mumu fweto ya shili kufwa; alioze chawana cha vumbi lia Zambi, mwono wa mutolo muli Kristu Yesu Mwene wetu.

2 Korintu 1:22

iye watujikile ni Chijikilo chenyi, watuhele chifungo cha Spiritu mu mbunge jetu.

Efesu 4:30

Kanda nuvwisa chinyengo Spiritu Musandu wa Zambi, yoze muli iye hananujiki ni Chijikilo ndo tangwa lia ukule.

1 Petulu 1:22

Se hinunatomesa mbunge jenu ha kwononoka chenu ku umwenemwene, hanga nukafwile mandumbu ni kufwila chize kuchishi ulembekese, lizangenu umwe mukwo ni mukwo ku mbunge yipema ni mbunge yeswe.

1 Yoano 5:20

Tunanyingika mwe Mwana Zambi haneza, iye hanatwehe malinjekela, hanga tukanyingike yoze wamwenemwene; te muli Mwanenyi Yesu Kristu, iye mwe Zambi wamwenemwene ni we mwono wa mutolo.

Usolwelo 7:16

O kechi kevwa zala nawa, chipwe kechi kevwa pwila nawa; chipwe tangwa kulichi kaatwila nichimwe, chipwe chivukuminya chimwe, ka:

Usolwelo 7:17

Mumu mwe Mwana-panga yoze uli mukachi ka ngunja kumapwa kafunga ko, maasongwela ku mafuji ja meya a mwono: Zambi makusumuna masoji eswe ku meso jo.