Yilinga 2:1 - MUKANDA USANDU WA ZAMBI 1975

¹ Muze tangwa lia Pentekoste hiliaheta, o eswe apwile hamuwika ni mbunge yimuwika muma mumuwika.

Mukanda Wa Zambi 1970

¹ Muze tangwa lia chiwanyino cha Pentekoste hiliaheta, ayo eswe yaabwa hamuwika, muma mumuwika.

Yilinga 2:1 Iomraidhean Croise

2 Sango Ja Mianangana 30:12

Ni mu Yunda nawa Zambi yaaha mbunge yimuwika akalinge nikulita ni liji lia mwanangana ni alemu, ku liji lia Yehova.

2 Sango Ja Mianangana 5:13

mba muze akwa yitavwi ni njimba apwile ngwe mutu umuwika nikuhana liji limuwika lia kuhalisa ni kusakwila Yehova, ni muze liji lio liahiohiele hamwe ni yitavwi, ni sembalu, ni yisaji nikuhalisa Yehova, ngwo, Mumu iye mupema, mumu utu wa zango lienyi wa mutolo: henaho zuwo lieswe, lie zuwo lia Yehova liazalile ni lelwa.

Miaso (Masamu) 133:1

Talenu cho kupema, cho kuwaha, muze mandumbu matwama hamuwika ni mbunge yimuwika.

Kutuhuka 23:16

Chiwanyino cha kuhela mbuto, (mbuto yitangu ya ku kuhondangana che), wakulima ku munda, ni chiwanyino cha kukungila mbuto ha kuhwa cha mwaka, muze mukunga ya ku kuhondangana che ku munda.

Kutuhuka 34:22

Ukafunge chiwanyino cha masemana, cha tiliku yitangu ya kulianga kuhia. Ukafunge nawa chiwanyino cha kukungila mbuto ha kuhwa cha mwaka.

Jeremia 32:39

Mungukaaha mbunge yimuwika ni jila yimuwika hanga akanguvwile woma ndo ku miaka hanga akawahe ene ni ana jo waze maakaula.

Zefania 3:9

Ha mwaka uze mungwalumuna kuhanjika cha mavungu chikapwe kuhanjika chipema hanga eswe akatongole jina lia Yehova nikumulingila ni mbunge yimuwika.

Yilinga 1:5

mumu, Yoano chamwenemwene wapapachishile mu meya; alioze kumakanupapachisa muli Spiritu Musandu, kulutwe lia matangwa akepe.

Yilinga 1:8

Alioze kumunukatambula tachi, muze Spiritu Musandu heza hali yenu: kumunukapwa yela jami, ni mu Yerusaleme, ni mweswe mu Yundeya, ni Samaria, ni ndo ku kasula-songo lia hashi.

Yilinga 2:46

O, tangwa ha tangwa, nikunyongo nona ni mbunge yimuwika mu tembele, nikupatula mbolo ku zuwo ni zuwo, alile kulia cho ni uwahililo ni kutuwika cha mbunge,

Yilinga 20:16

Mumu Paulu te hahala kuhiana Efwesu, hanga kechi katwama shimbu mu Eshia; mumu walipupwishile, hanga kachi mahasa, akahete ku Yerusaleme ha tangwa lia Pentekoste.

Yilinga 4:24

O, muze achivwile, ahetwile liji lio ni mbunge yimuwika kuli Zambi, akambe ngwo, Mwene, mwe Zambi yena, yoze watangile lilu ni hashi ni kalunga-lwiji, ni yize yeswe yilimo;

Yilinga 4:31

Muze te halemba, muma muze akungulukile mwanyikine; o eswe azalile tò ni Spiritu Musandu, mba ahanjikile liji lia Zambi ni hamu.

Yilinga 4:32

Chizavu cha waze afulielele, apwile ni mbunge yimuwika ni kunyonga chimuwika: mba niumwe wa kuli ayo wambile ngwenyi, Chuma chize nguli nacho nichami mwene; alioze yuma yeswe yapwile ya mbunga.

Yilinga 5:12

Mba ku moko ja apostolo alingile yilayi yinji ni yipekesa hakachi ka atu: o apwile ni mbunge yimuwika mu Senge lia Solomone.

A-ROMA 15:6

hanga ni mbunge yimuwika ni kanwa limuwika, nukachichimieke Zambi kanda Tato ya Mwene wetu Yesu Kristu.

1 Korintu 16:8

Alioze mungukatwama mu Efwesu ndo ku Pentekoste.

Filipu 1:27

Chino wika, kwenda chenu chikapwe ngwe chinatela sango lipema lia Kristu: hanga chipwe mungwiza ni kunumona, chipwe chishiko, ngukevwe ha kutwala kuli yenu, ngwe nwakumana ngú, ni kunyonga chimuwika, ni mbunge yimuwika, nikulinjika hamuwika ha Ufulielo wa sango lipema.

Filipu 2:2

zalisenu uwahililo wami, hanga nukapwe ni manyonga amuwika, ni zango limuwika, ni kulikunda chimuwika, ni kunyonga chimuwika.