Yilinga 17:3 - MUKANDA USANDU WA ZAMBI 1975

³ Nikulumbununa pundu nikulweza ngwe chatamba Kristu kwivwa lamba, nikuhinduka hakachi ka afu; ngwenyi, Yono Yesu ngunanwambulwilayo, iye mwe Kristu.

Mukanda Wa Zambi 1970

³ yaalumbunwina pundu nikwalweza ngwenyi, Kristu chamutamba kumona lamba ni kuhinduka ku kufwa. Ngwenyi: “Yono Yesu, yoze ngunanwambulwila, mwe Chilamwina yoze Zambi alakenyene.”

Yilinga 17:3 Iomraidhean Croise

Luka 24:32

O aliambile umwe kuli mukwo ngwo, Mbunge jetu kujevwile chivukuminya muli yetu shimbu ahanjikanga kuli yetu mu jila, shimbu alumbununanga kuli yetu ye yisoneko, nyi?

Luka 24:44

Iye wambile kuli ayo ngwenyi, Wano e maliji aze nahanjikile kuli yenu shimbu napwile hamwe ni yenu, ngwami, Chatamba yuma yeswe kumanunuka yize yinasonewa mu shimbi ya Mose ni mu mikanda ya aprofeta ni ya masamu, ya kutwala kuli yami.

Luka 24:46

Iye wambile kuli ayo ngwenyi, Chocho chinasonewa, ni chocho chatamba Kristu kwivwa lamba ni kuhinduka hakachi ka afu ha tangwa liamuchitatu;

Yoano 20:9

Mumu te kanda achinyingika chisoneko ngwe chamutamba kuhinduka hakachi ka afu.

Yilinga 1:4

Iye, nikukunguluka hamwe no, waahele koki ngwenyi, Kanda nukakatuka ku Yerusaleme, alioze nukatwaminyine chilakenyo cha mwe Tata, chize ngwenyi, Nwevwile kuli yami:

Yilinga 18:28

Mumu wakumikine chikolo A-Yunda, ni chize kumeso ja atu eswe, nikulweza ku Yisoneko Yesu iye mwe Kristu.

Yilinga 18:5

Muze Saila ni Timoteu apalumukine ku Masendoniya, lie liji lialemene Paulu, nikushindakenya chikolo ni mbunge yeswe kuli A-Yunda, ngwenyi, Yesu iye mwe Kristu.

Yilinga 3:18

alioze Zambi chocho hanamanununa chize ambulwile Shimbu-kanda ku makanwa ja aprofeta jenyi eswe ngwo, Kristu yenyi makevwa lamba.

Yilinga 9:22

Alioze Saulu wahianyine ni tachi, watupiekesele A-Yunda waze atwamine ku Ndamaseku, nikwasolwela yinyingi ngwenyi, Yono mwe Kristu.

Galashia 3:1

Yenu A-Ngalashia nunahepuka, iya hananwongo, yenu, kwe kumeso jenu, asolwele pundu Yesu Kristu wa kuliachila ha kulusu?