Yilinga 1:14 - MUKANDA USANDU WA ZAMBI 1975

¹⁴ Wano eswe anyongonwene ni mbunge yimuwika ni kulemba ni kuliumba, hamwe ni mapwo, ni Maria, naye ya Yesu, ni hamwe ni anakwo.

Mukanda Wa Zambi 1970

¹⁴ Wano eswe hamwe ni Maria, naye ya Yesu, ni mapwo akwo, ni anakwo ja Yesu yaanyongonona nikuwayila Zambi ni mbunge yimuwika.

Yilinga 1:14 Iomraidhean Croise

Mateu 12:46

Shimbu te machihanjika ku mbunga, kumanyi, naye ni ana-akwo amanyine haze nikufupa kuhanjika nenyi.

Mateu 21:22

Ni yuma yeswe munwita ni Ufulielo ha kulemba, kumunukatambula.

Mateu 27:55

Kwapwile kuze mapwo anji, kanamutalila kusuku, waze te akawile Yesu katu ku Ngalileya, nikumuvumbika.

Marku 15:40

Kwapwile mapwo nawa nikutalila kusuku, hakachi ko apwile Maria Ka-Mandala, ni Maria naye ya Tiangu mukepe ni ya Jose, ni Salome;

Marku 16:1

Muze te tangwa lia Sambata hiliapalika, Maria Ka-Mandala, ni Maria naye ya Tiangu, ni Salome, alanjile mbuto ya vumba lipema, hanga akaye, akamuwayise nayo.

Luka 11:13

Mba kachi yenu nuli api, nunanyingika kuhana yawana yipema kuli ana jenu, Shinaho chikolo Tatenu wa mwilu mahana Spiritu Musandu kuli waze mamwita, nyi?

Luka 18:1

Iye wahanjikile nawa chishima kuli ayo, ngwe chaatamba kulemba matangwa eswe, kanda akalezumuka;

Luka 23:49

Ni waze eswe amunyingikine, ni mapwo waze amukawile ku Ngalileya, amanyine kusuku, nikumona yino yuma.

Luka 23:55

Mapwo waze akatukile hamwe nenyi kulu ku Ngalileya, akawile kunyima, amwene fuka, ni ngwe chize asele mujimba wenyi.

Luka 24:10

Achi, kwapwile Maria Ka-Mandala, ni Yoana, ni Maria naye ya Tiangu, ni mapwo akwo hamwe no ambulwile yino yuma kuli apostolo.

Luka 24:33

O akutukile ha ola yize yene, ahilukilile ku Yerusaleme, awanyine kumi ni kashi kanakungama, ni waze apwile hamwe no.

Luka 24:53

O apwile matangwa eswe mu tembele nikuhalisa nikufumanyisa Zambi.

Luka 8:20

Mba amulwezelecho ngwo, Noko ni anaakwenu kanamana haze kanazange kukumona.

Yilinga 2:1

Muze tangwa lia Pentekoste hiliaheta, o eswe apwile hamuwika ni mbunge yimuwika muma mumuwika.

Yilinga 2:42

O anyongonwene mu longeso lia apostolo, nikuliendela, ni upatwilo wa mbolo, ni kulemba.

Yilinga 2:46

O, tangwa ha tangwa, nikunyongo nona ni mbunge yimuwika mu tembele, nikupatula mbolo ku zuwo ni zuwo, alile kulia cho ni uwahililo ni kutuwika cha mbunge,

Yilinga 6:4

Alioze yetu mutunyongonona kulemba ni ku uvumbiko wa liji.

A-ROMA 12:12

Ha kutalatala, nukawahilile; ha luyinda, nukanyongonone; ha kulemba, nukalikoleze.

1 Korintu 14:13

Kashika yoze mahanjika mu limi, alembe hanga akahase kulilumbununa.

Efesu 6:18

Lembenu matangwa eswe ni kuliumba cheswe ni kuliondela cheswe muli Spiritu, nikulayilako, ni kunyongonona cheswe, nikuliumba hali asandu eswe.

Kolosu 4:2

Nyongononenu ni kulemba, ni kulámo hamwe nikusakwila.