Titu 1:10 - MUKANDA USANDU WA ZAMBI 1975

¹⁰ Mumu kwali akwa kukolema anji, akwa kumbambula, ni akwa kwonga, ahiana hakachi ka akwa ungalami.

Mukanda Wa Zambi 1970

¹⁰ Mumu kwali anji akwa kukolema ni akwa kwonga, chibichibi mukachi ka Ayuda waze haalumuka ku mbunge. Kaakwonga atu ni maliji jo a uhepuke.

Titu 1:10 Iomraidhean Croise

Mateu 23:14

Lamba lienu, akwa kusonyeka ni A-Fwariseu, yilembese! mumu nwakuwumbula mazuwo ja twamishi ja mapwo, shimbu te, ha ulembekese, nwakulemba yipinji yisuku. Kashika kumunukatambula upatwilo Wahiana.

Yilinga 11:2

Mba muze te Petulu hakanduka ku Yerusaleme, waze a ku ungalami amuhangulwile.

Yilinga 15:1

Mba amwe atu a kukatuka ku Yundeya apalumukine kuze, o alongesele mandumbu ngwo, Kunwahashile kulilamwina shina manupwisa ngalami nikulita ni ndako ya Mose.

Yilinga 15:24

Mumu te hitunevu ngwo, Amwe a kukatuka kuli yetu, hananupikala ni maliji, nikulumbula mbunge jenu, ngwo, Chanutamba kupwa ngalami, nukatunge shimbi, alioze yetu kutwaahele poko niyimwe.

Yilinga 20:29

Mumu ngunanyingika muze hinaya yami, tungunga asasu makanjila hakachi kenu, waze kechi kavwila keke mbunga ya mapanga.

Galashia 2:4

Alioze mumu hali mandumbu a kwonga aanjishile ku tenga, eno anjilile ku tenga mukutala ngwe ngendeshi utuswilo uze tuli nawo muli Kristu Yesu, hanga akatutwale ku undungo;

Galashia 3:1

Yenu A-Ngalashia nunahepuka, iya hananwongo, yenu, kwe kumeso jenu, asolwele pundu Yesu Kristu wa kuliachila ha kulusu?

Efesu 4:14

hanga kutuchi kapwa ana-akemba nawa, ngwe tukahunguke ni mikanya ni kuhungumioka kweka ni kweka ni fuji yeswe ya longeso, ku kwonga cha atu ni unjiliji nikulita ni maliji a kuhengesa;

1 Timoteu 1:4

Chipwe kanda apanjika ku yishima yamokomoko, ni kujichika miya yize kuyishi songo, yenayo kuyakuneha mbandanga, alioze kuyishi kusenyesa kulutwe uselo wa Zambi, uze uli mu Ufulielo.

1 Timoteu 1:6

Ku yuma yino amwe se apiasukile, hanakondolokela ku pande jamokomoko.

1 Timoteu 1:9

Nikunyingika chino, shimbi kayikolesele hali mukwa ululi, alioze ayikolesele hali yihulia ni akwa kulolema, ni yitanganyanyi ni yivulumunyi, ni akwa luchisa ni yijiluke, ni akwa kulamba atato, ni akwa kulamba anaye, ni yingalwe,

2 Timoteu 3:13

Alioze yingulungulu ni akwa kwonga kumakapiha kuhiana, nikupiangula, nikupianguka.

2 Timoteu 4:4

Makatewulula matwi jo ku umwenemwene, makakondolokela ku yishima yamokomoko.

Titu 1:6

kachi umwe masamba ku kusuma cheswe, lunga wa pwo umuwika, kali ni ana a kufuliela, waze keshi kusumiwa ha kuhungumuka ni yipi, hanji kukolema.

Tiangu (Jake) 1:26

Kachi umwe malishinginyeka kupwa mukwa kuwayila, shimbu keshi kuhombola limi lienyi, aiioze kakwonga mbunge yenyi mwene, uwayilo wa yono wamokomoko.

1 Yoano 2:18

Yenu ana, haliapwila ye ola ya kusula: ngwe nwevwile ngwo, Mukwa kulimika ni Kristu kumeza, chipwe haliapwila akwa kulimika ni Kristu anji haneza; ku chino tunanyingika haliapwila ye ola ya kusula.

1 Yoano 2:4

Yoze mamba ngwenyi, Ngunamunyingika, aiioze keshi kufunga shimbi jenyi, iye mukwa mahuza, ni umwenemwene kuushimo muli iye;

1 Yoano 4:1

Akwetu a zango, kanda nufuliela maspiritu eswe, aiioze esekenu maspiritu, kachi mapwa maspiritu a kuli Zambi; mumu aprofeta a kwonga anji haneza hano hashi.

Usolwelo 2:14

Alioze yuma yikehe ngukuli nayo, mumu uli no koko waze akulalaminya ku longeso lia Mbalau, yoze walongesele Mbalake kutela chitalingiso kulutwe lia ana ja Izalele, mukulia yuma yize hanayitambula yitapo ku mahamba, mukulinga utanji.

Usolwelo 2:6

Alioze chino uli nacho, wakupihilila ni yitanga ya A-Nikoleta, yize ni yami nawa nakupihilila nayo.