Shimbi 9:3 - MUKANDA USANDU WA ZAMBI 1975

³ Kashika, nyingikenu musono ngwami, Yehova Zambi yenu, iye kanazauka kumeso jenu ngwe kahia ka kulesa, iye kumakaakuwisa, kumakaakumba kumeso jenu, chocho munukaahuma, nikwakuwisa washi, ngwe ambile Yehova kuli yenu.

Mukanda Wa Zambi 1970

³ Alioze musono munulimwena cho yenwene chize Mwene Zambi matetekela kulutwe lienu ngwe mulengi wa kahia. Mwe makaakumba ku meso jenu, mba munukaanongesa liakulu, ngwe chize alakenyene.

Shimbi 9:3 Iomraidhean Croise

Kutuhuka 23:23

Mumu mungelo wami kumakakutetekela, kumakakuhetesa ndo kuli A-Amore, ni kuli A-Hete, ni kuli A-Perize, ni kuli A-Kanana, ni kuli A-Hevwe, ni kuli A-Yepushe. Yami kumungukaateta.

Kutuhuka 24:17

Kusoloka cha uhenya wa Yehova chapwile ngwe kahia ka kulalisa ha mbulwa mulundu kumeso ja A-Izalele.

Izaya 27:4

Kumwatwamine muli yami niumwe ufwatulo. Nyi kachi napwa ni mikalale yimwe hanji mingonga yimwe ya kulitachika nayo, kachi mungulindangana nayo, kachi munguyocha hamuwika.

Izaya 30:27

Jina lia Yehova Unakatuka kusuku nikuyila ni kahia ka utenu wenyi ni mwishi ulá pwi unafwinjiko. Mivumbo yenyi yinazala ni ufwatulo, limi lienyi linapu ngwe kahia ka kulalisa.

Izaya 30:30

Mba Yehova makavwisa atu liji lienyi lia mwanangana. Makamona kwoko lienyi nikuhulumuka nikwalamba ni utenu wa kulekwoka, ni mulengi wa kahia ka kulalisa, ni vula munji chikolo, ni kangonga, ni chiwe.

Izaya 30:33

Mumu jiko hanalilulika kulu, hali mwe mwanangana hanalilulika; mulumba wacho kutoha ni kusuha ni kahia ni kunyi ja kulumbama. Mba mwiku wa Yehova muuliwika ngwe muhwiji wa fundanga.

Izaya 33:14

Woma hiweza hali yivulumunyi mu Zaione; yitanganyanyi kanachikima. Iya hakachi ketu mahasa kutwama ni kahia ka kulalisa? Iya hakachi ketu mahasa kutwama ni mbwemena ya miaka yeswe?

Mika 2:13

Mukwa kulokola kumakaatetekela; o makalokola, makanjila ku chikolo nikutuhukilako. Mwanangana wo makaatetekela; Yehova kulutwe lio.

Mateu 15:10

Watambikile mbunga kuli iye, wambile kuli ayo ngwenyi, Ivwenu, nuse chinyingi:

Marku 7:14

Watambikile mbunga kuli iye cheka nawa, wambile kuli ayo ngwenyi, Ngwivwenu eswe, chikanulumbunuke:

A-ROMA 8:31

Kuchi mutwamba ku yino yuma? Ngwetu, Kachi Zambi mapwa hamwe ni yetu, iya malimika ni yetu?

Efesu 5:17

Kashika kanda nukazuzuka, alioze nyingikenu chize wapwa upale wa Mwene.

Shimbi 1:30

Yehova Zambi yenu manutetekela, iye makanwashila jita, nikulita ni yeswe anulingilile mu Engitu ku meso jenu.

Shimbi 20:1

Muze munutuhuka mukwasa jita ni akwa kole jenu, ha kumona tuvwalu, ni matemba, ni atu amwe ananuhiana ha kwoka, kanda nwavwila woma; mumu Yehova Zambi yenu kwali hamwe ni yenu, iye wanuchijile mu chifuchi cha Engitu.

Shimbi 20:4

mumu Yehova Zambi yenu anayi hamwe ni yenu, mukunwashila jita ni akwa kole jenu mukunulamwina.

Shimbi 4:24

Mumu Yehova Zambi yenu iye kahia ka kulesa; Zambi ya ukwa.

Shimbi 7:16

Munukamanuna mavungu eswe Yehova Zambi yenu makakunjika kuli yenu, meso jenu kanda akaavwila keke. Kanda nukavumbika tuzambi two, mumu acho muchipwa kambwila kuli yenu.

Shimbi 7:22

Yehova Zambi yenu kumakahuma mavungu ano kumeso jenu hakehe, hakehe, kunuchi kuhasa kwamanuna eswe hamwe, kuchina tushitu a mu yambu manwokela naye.

Shimbi 9:6

Kashika, nyingikenu Yehova Zambi yenu kanuhele chifuchi chino chipema nuchizuke mumu ha ululi wenu; mumu kunwapwa akwa kupangula.

2 A-TESALONIKA 1:8

mu kahia ka kulekwoka, akakale milonga ya waze kanyingikine Zambi, ni waze keshi kwononoka ku sango lipema lia Mwene wetu Yesu.

Hebreu 12:29

Mumu Zambi yetu iye kahia kakulalisa.

Yoshua 11:12

Yihunda yeswe ya mianangana waze, Yoshua wayitambwile hamwe ni mianangana jo, nikushiha ni katana atu jamo eswe, nikwanongesa liakulu chizechene ngwe Mose kavumbi ka Yehova watumine.

Yoshua 11:8

Yehova yaakunjika mu moko ja A-Izalele. O yaalamba, yaahanga ndo ku Sendone munene ni Miserefote-maime, ni ku Chivumbuko ndo ku chikulo cha Mizepa. Yaashiha, kahichikile chipwe katotamukele.

Yoshua 14:12

Kashika ngwehenu chifuchi chino cha milundu Yehova wambile tangwa lize, mumu wevwile ha tangwa lize ngwo, A-Anake atwamako mu yihunda yinene ya kukolesa. Hanji Yehova mapwa ni yami ngukaahume ngwe Yehova hanambe.

Yoshua 3:11

Talenu mushete wa usendo wa Mwene wa hashi heswe muupalika kulutwe lienu mu Yordau.

Yoshua 3:14

Chocho muze atu akatukile ku mbalaka jo akazauke Yordau, hamwe ni asasendote anambata mushete wa usendo kumeso ja atu,

Akwa Kuyula 4:14

Debola yamba kuli Mbarake ngwenyi, Hikatukenu, mumu lino He tangwa Yehova makunjika Sisera mu kwoko He. Te Yehova kayile kulutwe lienu? Chocho Mbarake yapalumukina ku mulundu wa Tabore ni kumi Ha tununu a malunga aze amukawile.