Shimbi 16:16 - MUKANDA USANDU WA ZAMBI 1975

¹⁶ Katatu ha mwaka, katatu ha mwaka, malunga jenu eswe akasoloke kumeso ja Yehova Zambi yenu kuze iye matongola; ku chiwanyino cha mbolo kuyishi futunwiso, ni ku chiwanyino cha masemana, ni ku chiwanyino cha yisakila. Kanda asoloka mokomoko kumeso ja Yehova.

Mukanda Wa Zambi 1970

¹⁶ “Malunga eswe a ku mavungu jenu chaatamba kwiza yisuho yitatu ha mwaka ni mwaka homa ha kuwayila: ha chiwanyino cha Kubalika, ni ha chiwanyino cha Kubatula Mbuto, ni ha chiwanyino cha Yikulika. Lunga mweswe akaneha chawana,

Shimbi 16:16 Iomraidhean Croise

1 Yitanga Ya Mianangana 9:25

Katatu ha mwaka Solomone alambwile milambu ya kulumba ni milambu ya sambukila ha chilumbilo chize watungilile Yehova nikwochelaho insensu hamuwika ha chize chapwile kumeso ja Yehova. Chocho yamana lie zuwo.

2 Sango Ja Mianangana 8:13

nikulita ni uvumbiko wa tangwa ha tangwa. Yalambula nikulita ni shimbi ya Mose, ha masambata, ni ha kakweji mwaha, ni ha yiwanyino ya kutongola, katatu ha mwaka, ngwami, chiwanyino cha mbolo kuyishi futunwiso, ni chiwanyino cha masemana, ni chiwanyino cha yisakila.

Ezra 3:1

Ha kuheta kakweji wamuchishimbiali A-Izalele te mu yihunda atwama, atu akungulukile ngwe mutu umuwika ku Yerusaleme.

Nehemia 8:15

ni chize chaatamba kufumanyisa ni mutambi mu yihunda yo yeswe ni mu Yerusaleme ngwo, Yénu ku mulundu nukanehe mitango ya olevwe, ni ya olevwe wa mu musenge, ni ya miluta, ni ya mingaji, ni ya mitondo yajika nukatunge yisakila nikulita ni chize asonekene.

Miaso (Masamu) 122:4

Kuze mavungu akukanduka, mavungu a Yehova, chikapwe Shindakenyo kuli Izalele, kusakwila ku jina lia Yehova.

Miaso (Masamu) 84:7

Kakuya chize ku tachi ndo ku tachi. Eswe lukombo kakusoloka kumeso ja Zambi mu Zaione.

Miaso (Masamu) 84:8

Yehova Zambi-wa-Tujita ivwa kama kulemba chami. Panjika kama, ena Zambi ya Yakomba.(Litulike.)

Miaso (Masamu) 96:8

Hanenu kuli Yehova ulemu wa jina lienyi. Nehenu mulambu nukanjile mu yize yenyi.

Kutuhuka 34:20

Kapula-jimo wa chimbulu ukamukule ni mwana-panga. Nyi kwazangile kumukula, ukamumakune kota. Tupula-majimo eswe a kuli ana je a malunga ukaakule. Niumwe kanda akasoloka mokomoko kumeso jami.

Kutuhuka 34:24

Mumu mungukahuma mu chifuchi mavungu kumeso je. Mungukatohesa njiza je. Niumwe mutu kechi kazanga chifuchi che wakuhi, muze mukanduka ukasoloke kumeso ja Yehova Zambi ye, mwaka ha mwaka, yisuho yitatu.

Izaya 23:18

Yuma yenyi ya kutalika ni fweto yenyi makayitumbikila kuli Yehova. Kechi kayitulika hanji kuyitongowenya, alioze yuma yenyi ya kutalika muyipwa kulia cha kulumbama ni mazalo apema kuli waze anatwama kumeso ja Yehova.

Izaya 33:20

Tala ku Zaione chihunda cha yiwanyino ya kufunjika! Meso je makamona Yerusaleme, chihunda cha kuhwima, mbalaka kuyichi katutuluka, mbambo jayo kechi kajizula nilimwe tangwa, ni mihipu yayo kuyichi kapatuka.

Ezekiel 36:38

Ngwe mbunga ya mapanga ha yitapo, ngwe mbunga ya mapanga ku Yerusaleme ha mwaka wa yiwanyino yenyi ya kufunjika, chocho yihunda yize ya hululu muyikazala ni mbunga ja malunga. Henaho makanyingika yami nguli Yehova.

Alevi 23:34

Amba kuli A-Izalele ngwe, Ha kakweji yono mwene wamuchishimbiali, ha tangwa kumi ni liamuchitano ndusu ha matangwa shimbiali che chiwanyino cha yisakila kuli Yehova.

Hagai 1:9

Nwataliletalile chinji, alioze chapwile chikehe, ni muze nwachinehene ku zuwo nachifujile—opu! Yehova-wa-Tujita kanahula ngwenyi, Kuchi te? Mumu ha zuwo liami lize Unatwama lia kupuzula shimbu yenu nunahondangana mutu mweswe ni zuwo Henyi mwene.

Mateu 2:11

No anjilile mu zuwo, amwene mwe mwana hamwe ni naye Maria; afulamanyine nikumuwayila, no nikupakula upite wo, amulambwile yawana ya oru ni libano ni mira.

Marku 12:3

O yamukwata, yamulamba, yamukatwisa mokomoko.

Yoano 7:2

Achi, chiwanyino cha A-Yunda, chiwanyino cha yisakila, chapwile hakamwihi.

Shimbi 16:15

Nulinge chiwanyino kuli Yehova Zambi yenu matangwa shimbiali kuze Yehova matongola. Nuwahilile wika mumu Yehova Zambi yenu kumakanuwahisa ku kwoka cheswe cha mbuto jenu ni ku milimo yeswe ya moko jenu.

Shimbi 16:17

Mutu ni mutu akahane nikulita ngwe anahase, nikulita ni chiwape cha Yehova Zambi yenu ngwe iye hananwehecho.

Shimbi 31:11

muze A-Izalele eswe makasoloka kumeso ja Yehova Zambi yenu kuze iye matongola, ukatange shimbi yino kumeso ja A-Izalele eswe, akayivwe.

1 Samuel 1:3

Mwe lunga mwaka ha mwaka wakatukile ku chihunda chenyi nikuya mukuwayila Yehova-wa-Tujita nikumulambula yitapo ku Shilo kuze kwatwamine e ana aali a Eli, Hofni ni Finehase, asasendote ja Yehova.

1 Samuel 6:3

O ngwo, Nyi munutuma mushete wa Zambi ya Izalele, kanda nuutuma mokomoko. Chanutamba kumutuma mulambu wa uhie, mba makanuwuka, makanulweza chize chakwika kwoko lienyi kunwecha.