Shimbi 13:17 - MUKANDA USANDU WA ZAMBI 1975

¹⁷ Niyimwe ya yuma yajila kanda nuyikwata ni moko jenu, hanga Yehova alumuke ku usasu wa utenu wenyi, anuvwile keke, anuvwile vumbi, anwokese, ngwe alishingile kuli tulamba twenu,

Mukanda Wa Zambi 1970

¹⁷ Ku yuma yize yeswe, kanda nukanda ho Chuma nichimwe, hanga Mwene Zambi alitwamine kunutenukina, anuvwile keke. Makanuvwila keke ni kunwokesa kuhiana, ngwe chize alakenyene tushakulu twenu,

Shimbi 13:17 Iomraidhean Croise

Ubutukilo 26:24

Mba Yehova yasoloka kuli iye ufuku uze wene nikwamba ngwenyi, Yami nguli Zambi ya tatenu Apalahama. Kanda wivwa woma mumu nguli hamwe ni yena. Mungukakuwahisa, mungukokesa akwa munyachi we ha mukunda wa kavumbi kami Apalahama.

Ubutukilo 26:4

Mungukokesa munyachi we ngwe matongonoshi a mwilu. Ku munyachi we mungukahana yifuchi yino yeswe, mba mu munyachi we mavungu eswe a hashi makawaha.

Ubutukilo 28:14

Akwa munyachi we kumakapwa ngwe fufuta ya hashi, kumukalitanda ku Chitokelo, ni ku Chivumbuko, lumbu ni lumbu, mavungu eswe a hashi eswe kumakaawahisa kuli yena ni ku munyachi we.

Miaso (Masamu) 78:38

Alioze iye nikwivwa keke, waakonekenene uhenge wo, kaajimine. Ewa, kanji kanji watewulwile utenu wenyi; kasungile ufwatulo wenyi weswe.

Miaso (Masamu) 85:3

Hiunachiza ufwatulo we weswe. Hiunatewuluka ku kusasaminya cha utenu we.

Kutuhuka 20:6

nikulweza utu wa zango kuli tununu twa waze akunguzanga, kuli waze akufunga shimbi jami.

Kutuhuka 32:12

Kuchi te A-Engitu mamba ngwo, Waachijile hanga aalinge chipi, mukwashiha ha milundu, mukwaonwona lume hashi? Utewulule utenu we usasu. Ulikonyeke, kanda ulinga chuma chino chipi kuli atu je.

Lungungu 3:32

Chipwe mavwisa chinyengo, hindu mapwa ni keke nikulita ni kulumbama cha utu wenyi wa zango.

Ezekiel 37:26

Mungukakolesa no usendo wa sambukila. Muukapwa usendo wa mutolo, mba mungukaawahisa, nikwaokesa; mungukasa zuwo liami lisandu hakachi ko ndo ku miaka yeswe.

Hosea 11:9

Chichi kulinga utenu wami usasu; chichi kwonwona nawa Eframe. Mumu nguli Zambi, hi nguli mutu ko, yami mwe Musandu mukachi kenu, kashika chichi keza mukwonwona.

Kwalula 25:4

Yehova yamba kuli Mose ngwenyi, Utwale akwa lutwe eswe a atu, wasukike kumeso ja Yehova ha mwalwa, hanga utenu usasu wa Yehova ukakatuke kuli A-Izalele.

1 Korintu 16:22

Kachi umwe keshi kufwila Mwene, akashingiwe. Mwe Mwene kaneza.

Shimbi 13:18

ha kuzeya ku liji lia Yehova Zambi yenu mukufunga maliji jenyi a shimbi eswe ngunanwambe musono, mukulinga chize chinate kumeso ja Yehova Zambi yenu.

Shimbi 30:3

Yehova Zambi yenu kumakalumuna ufunge wenu, makanuvwila keke, nikunukonga ku mavungu eswe kuze Yehova Zambi yenu wanumwanginyine.

Shimbi 30:5

Yehova Zambi yenu makanuhetesa mu chifuchi chapwile cha akakenu, nukachizuke, makanulinga yipema, makanwokesa, munukapwa anji, akakenu akehe.

Shimbi 7:13

Iye manuzanga yenu, makanuwahisa, makanwokesa. Iye makawahisa nawa ana a ku mijimba yenu, ni mbuto yakusoka ha mavu jenu, ni mbuto yenu, ni vinyu yenu, ni maji jenu, ni kwoka cha yimuna jenu, ni ana ja mapanga jenu, mu chifuchi alishingile iye kuli tulamba twenu kunwahacho.

Shimbi 7:26

Kanda nunjisa mu mazuwo jenu chizelwokeso chimwe, kuchina munulifwa nacho mba munupwa ajila; nukachichine, nukachivwile lwaji lume; mumu kuchapwa chuma chajila.

Yoshua 22:20

Akane mwana wa Zera te kalingile ni mafwefwe mu chikuma cha yuma yajila, mba ufwatulo kuwaholokelele ha chikungulwila cheswe cha Izalele nyi? Kafwile ukawenyi ha uhenge wenyi.

Yoshua 6:18

Alioze yenu, lifungenu ku yuma yize hanayijilila ha kwonwona, kuchina muze hinwayijilila munwanda yize hinwajilila, chocho munwalumuna chilombo cha Izalele chuma cha kwonwona, nikunehenako lamba.

Yoshua 6:24

Ochele chihunda ni kahia ni yuma yeswe yapwilemo. Prata wika ni oru, ni yikwachilo ya unengu ni ya utale asele mu milambu ya zuwo lia Yehova.

Yoshua 6:26

Yoshua waasele shingo tangwa lize ngwenyi, Mweswe makatuka kutunga chihunda chino cha Yeriku akashingiwe kuli Yehova. Masela fundamentu mu kufwa cha mwanenyi mutangu, Masaho mapito mu kufwa cha mwanenyi wasula.

Yoshua 7:1

Alioze A-Izalele avulumwine ha kutwala ku yuma yajila. Mumu Akane mwana wa Kame, mwana wa Zapati, mwana wa Zera wa ku munyachi wa Yunda wanjile yimwe ya yuma yajila. Kashika utenu wa Yehova walekwokele kuli A-Izalele.

Yoshua 7:26

Yalumbika hali iye mulumba unene wa mawe. Wasala ndo musono. Mba Yehova watewulukile ku kusasaminya cha utenu wenyi. Kashika jina liako ndo musono ngwo, Chikulo cha Akore.

Yoshua 8:28

Chocho Yoshua yocha Ayi. Yachipwisa mulumba wa yiswaswa wa mutolo, chize chapwa ndo musono.