Nehemia 9:16 - MUKANDA USANDU WA ZAMBI 1975

¹⁶ Alioze o tulamba twetu alengumukine; akwachile pami; kapanjikile ku shimbi je.

Mukanda Wa Zambi 1970

¹⁶ Alioze tushakulu twetu yaalengumuka, yaakwata pami, kaafungile ko Shimbi je.

Nehemia 9:16 Iomraidhean Croise

1 MIANANGANA 17:14

Hindu kasolo kwivwa. Akwachile pami ngwe tulamba two alingile, waze kafulielele Yehova Zambi yo.

2 Sango Ja Mianangana 29:6

Mumu atata avulumwine, nikulinga chipi kumeso ja Yehova Zambi yetu. Hanamwehuka; hanatewulula meso jo ku zuwo lia Yehova nikumumba nyima.

2 Sango Ja Mianangana 30:8

Kanda nukwata pami haliapwila ngwe tulamba twenu; liechenu kuli Yehova. Njilenu mu zuwo lienyi lisandu lize hasela ku usandu wa mutolo, nukalingile Yehova Zambi yenu, hanga utenu wenyi usasu unukatuke.

2 Sango Ja Mianangana 36:13

Aye nawa yakatukila Nabukanezore; te hanamushingisa ni jina lia Zambi. Alioze yakwata pami nikukalisa mbunge yenyi kanda yitala kuli Yehova, Zambi ya Izalele.

Nehemia 9:10

Walingile yilayi ni yikomokeso hali Falau ni hali ngamba jenyi eswe, ni hali atu eswe a chifuchi chenyi mumu wanyingikine chize alivwimbile kulimika ni ana je. Jina lie liafumanyine ngwe linafumana tangwa lia musono.

Nehemia 9:29

Waashindakenyene Ukaahilwise nawa ku shimbi je. Hindu alengumukine; kapanjikile ku shimbi je; avulumwine upatwilo we (nyi mutu maukaula matwamamo ni mwono), asekwile yipaya yo, akwachile pami, kasolo kupanjika.

Miaso (Masamu) 106:6

Twavulumwine hamuwika ni akaka; twalingile uhenge, twalingile ungulungulu.

Miaso (Masamu) 81:8

Ivwenu atu jami mba mungukushindakenya Izalele! Nyi kachi wakungwivwa yami!

Kutuhuka 15:26

Yamba ngwenyi, Kachi yenu munuhalakana pundu ku liji lia Yehova Zambi yenu, nikulinga chize chinate ku meso jenyi, nikupanjika ku maliji jenyi a shimbi, nikufunga yiyulo yenyi yeswe, kachi chichi kusa hali yenu kuyiza nichimwe nasele hali A-Engitu, mumu Yami Yehova, mukwa kunuwuka.

Kutuhuka 32:9

Yehova yamba kuli Mose ngwenyi, Hinamona wano atu, kumanyi e atu te akwa pami.

Yishima 29:1

Yoze makwata pami ha kumukanjisa kanjikanji, mamwonwona susumuku ni ulamwino wakuhi.

Izaya 48:18

Mala! Nyi kachi nwevwile shimbi jami! Kachi uhwimino wenu wapwa ngwe lwiji, kachi ululi wenu wapwa ngwe mikanya ya kalunga-lwiji.

Izaya 48:4

Se ngunanyingika nuli akwa pami, kota jenu japwa ngwe mujipwa wa utale, ni mahuma jenu ngwe unengu,

Izaya 63:10

Alioze o yakolema, yavwisa chinyengo Spiritu yenyi musandu; kashika iye yalumuka mukwa kole yo, iye mwene yasa no jita.

Jeremia 19:15

Yehova-wa-Tujita Zambi ya Izalele kanambe ngwenyi, Ngunakokela ha limbo lino ni ha yihunda yalio yeswe yipi yize yeswe hinavulukaho mumu hanakalisa makota jo, kasolo kwivwa maliji jami.

Jeremia 2:31

Ni yenu akwa chisemuko chino, panjikenu liji lia Yehova. Te hinapwa kuli Izalele ngwe puya? Hinapwa ngwe chifuchi cha milima pwi? Nyi chocho kuchi te atu jami kakwamba ngwo, Tunatusuka, kutuchi kwiza nawa kuli yena?

Jeremia 7:26

hindu kapanjikile kuli yami, chipwe kutela matwi, alioze akalishile makota jo nikuhiana tulamba two kulinga chipi.

Ezekiel 5:6

Alioze hakolema shimbi jami ni ungulungulu kuhiana mavungu; hakolema yiyulo yami kuhiana yifuchi yeswe ya kuyijingilika ha kulituna shimbi jami, katayile kwenda nikulita ni yiyulo yami.

Yilinga 7:51

Yenu nwakukala ni pami, nuli yilima ku mbunge ni ku matwi, yenu matangwa eswe nwakulinjika ni Spiritu Musandu; chizechene ngwe tulamba twenu, chocho ni yenu nawa nwakulinga.

A-ROMA 2:5

Alioze nikulita ni kukala cha mbunge yize kuyishi kulikonyeka, kuwakulitulikila utenu ha tangwa lia utenu muze masolola upatwilo wa ululi wa Zambi;

Shimbi 31:27

Mumu ngunanyingika kukolema chenu ni pami jenu. Kumanyi, shimbu nguchili ni mwono hamwe ni yenu musono kunwakolema Yehova, mba kulutwe lia kufwa chami muchihiana.

Shimbi 32:15

Yeshurene watohele mba yatwa chishindo, ngwami, Nwatohele, ni kumeta, ni kusenena ni maji mba yehuka Zambi tangi yo, yalelesa Liwe lia ulamwino wo.

Shimbi 5:29

Kachi mapwa ni mbunge yino muli ayo, hanga anguvwile woma, afunge maliji jami eswe a shimbi matangwa eswe, hanga atwame kawape, ana jo nawa atwame kawape cha mutolo.

Shimbi 9:13

Chikwo nawa, Yehova yamba kuli yami ngwenyi, Hinamona atu ano, kutala, kapwa akwa kupangula.

Shimbi 9:27

Iwulukenu tuvumbi twenu, Apalahama, ni Izake, ni Yakomba. Kanda nutala upama wa atu ano, chipwe ungulungulu wo, chipwe mulonga wo,

Shimbi 9:6

Kashika, nyingikenu Yehova Zambi yenu kanuhele chifuchi chino chipema nuchizuke mumu ha ululi wenu; mumu kunwapwa akwa kupangula.

Hebreu 3:13

Alioze lishinjilenu umwe ni mukwo ni mukwo tangwa ha tangwa, shimbu lieswe analivuluka ngwo, Musono, hanga niumwe wa kuli yenu kechi kakala ku kwonga cha shili.

Hebreu 3:15

Shimbu unachambe ngwo, Musono, nyi munwivwa liji lienyi, kanda nukalisa mbunge jenu ngwe ha che kwihia.