Nehemia 8:3 - MUKANDA USANDU WA ZAMBI 1975

³ Iye yatangamo ha lwaza kulutwe lia chikolo cha meya, chize ku chimenemene ndo tangwa ha muchima, kumeso ja malunga ni mapwo, ni waze eswe muchialumbunuka. Matwi ja atu eswe apwile kwe ku mukanda wa shimbi.

Mukanda Wa Zambi 1970

³ Kwe ku lwaze hehi ni chikolo Ezra yaatangila we mukanda wa Shimbi, chize ku chichamene ndoo ni tangwa ha muchima. Eswe yaabanjika kanawa.

Nehemia 8:3 Iomraidhean Croise

Nehemia 10:29

o yalifutula ni akwo, ni alemu jo, akalikase ni shingo ni chilakenyo kwenda mu shimbi ja Zambi, jize Mose kavumbi ka Zambi wajihanyine, akafunge ni kulinga maliji eswe a Yehova Mwene wetu, hamwe ni upatwilo wenyi ni yiyulo yenyi.

Nehemia 13:1

Ha tangwa lize yatanga mu mukanda wa Mose kumeso ja atu eswe, yawanamo kuze asonekene ngwo, Ka-Amone hanji Ka-Moape kechi kanjila mu chikungulwila cha Zambi ndo ku miaka ya mutolo;

Nehemia 8:1

Mba atu eswe akungulukilile ngwe mutu umuwika mu lwaza kulutwe lia chikolo cha meya. Yamba kuli Ezera mukwa kusonyeka anehe we mukanda wa shimbi ja Mose jize Yehova watuminyine A-Izalele.

Nehemia 8:18

Chikwo nawa tangwa ha tangwa chize ku tangwa litangu ndo ku tangwa liasula watangile mu mukanda wa shimbi ja Zambi. Yafunga chiwanyino matangwa shimbiali, mba ha tangwa liamuchinake kwapwile kukunguluka chilemu nikulita ni shimbi.

Nehemia 8:4

Mba mukwa kusonyeka Ezera wamanyine ha chitamba cha mitondo hatunga ha milimo yenayo. Kwamanyine hamuwika nenyi Matitia, ni Shema, ni Anaia, ni Uriya, ni Hilekia, ni Maseia, ha chindume chenyi. Ha chimeso chenyi kwamanyine Pedaia, ni Mishaele, ni Malekia, ni Hashume, ni Hashabadana, ni Zekaria, ni Meshulame.

Nehemia 8:5

Ezera yapakula mukanda kumeso ja atu eswe (iye wapwile helu lia atu eswe) mba muze haupakula atu eswe yamana ha molu.

Marku 12:37

David mwene kanamuvuluka ngwenyi, Mwene; ngwe kuchi mapwa mwanenyi? Mbunga ya atu amuvwile ni chiseke.

Luka 19:48

Alioze kawanyine chize mahasa kulinga; mumu atu eswe amupanjikile ni mbunge yeswe.

Luka 8:18

Kashika kanyamenu ngwe chize munwivwa; mumu mweswawo ukwete, kumakamwaha; ni mweswawo keshi nacho, chipwe chize kananyongo ngwenyi, Nguli nacho, mamuchizacho.

Yilinga 13:15

Kulutwe lia kutanga cha shimbi ni mikanda ya aprofeta, akwa kuyula sunangonga atumine kuli ayo, ngwo, Mandumbu, kachi liji limwe lia kushinjila atu nuli nalio, ambenu.

Yilinga 13:27

Mumu waze akutwama mu Yerusaleme, ni akwa kuyula jo, se kamusele chinyingi, chipwe kanyingikine maliji ja aprofeta aze akwatanga ha masambata eswe, aamanunwine ha kumuhisa.

Yilinga 15:21

Mumu Mose chize ku yisemuko ya shakulu, mu membo eswe kali ni waze akumwambujola, se kakumutanga mu masunangonga eswe ha masambata eswe.

Yilinga 16:14

Mba umwe pwo, jina lienyi Lindia, mukwa kutalikila mahina a ufungo, wa ku limbo lia Taiatira, mukwa kuwayila Zambi watuvwile: Mwene wazulwile mbunge yenyi kupanjika ku yuma yize ahanjikile Paulu.

Yilinga 17:11

Wano apemene kuhiana hi waze ko a mu Tesalonika, se atambwile liji ni mbunge yeswe, nikuhengula mu yisoneko tangwa ha tangwa akamone kachi yino yuma yapwile chocho.

Yilinga 20:11

Muze te hakanduka kwilu, yapalula mbolo, yalia, yalishimwinya no shimbu ndo kwapatwokele ngwangwangwa, chocho wakatukile.

Yilinga 20:7

Ha tangwa litangu lia semana, muze twakungulukile mukupalula mbolo, Paulu wahanjikile kuli ayo, se muze mukucha wahalile kukatuka; iye watwalile maliji jenyi ndo ha muchima ufuku.

Yilinga 28:23

Mba se amuselele tangwa, anji ejile kuli iye ku zuwo lia kuzeka ngeji; kuli ayo washindunwine nikushindakenya ha wanangana wa Zambi, nikwakununa ha kutwala kuli Yesu, ku shimbi ya Mose, ni ku mikanda ya aprofeta, chize ku chimene ndo ku chingoloshi.

Shimbi 31:9

Mose yasoneka shimbi yino, yayihana kuli asasendote, A-Levi, waze ambachile mushete wa usendo wa Yehova, ni kuli makulwana eswe a Izalele.

1 Tesalonika 2:13

Ha chikuma chino twakusakwila kuli Zambi, nikulitwamina nichimwe, ngwe muze nwatambwile liji lia sango lia Zambi kuli yetu, nwalitambwile hi ngwe liji lia atu ko, alioze chizechene ngwe liapwa chamwenemwene, liji lia Zambi, lienalio nawa kuliakulinga kanawa muli yenu akwa kufuliela.

Yoshua 8:35

Nilimwe liji kuliasalile lia kutuma kuli Mose, Yoshua yaatanga eswe kumeso ja chikungulwila cha Izalele, ni mapwo, ni ana, ni njize waze atwamine hakachi ko.

Usolwelo 2:29

Yoze uli ni matwi, evwe chize anambe Spiritu ku yikungulwila.

Usolwelo 3:22

Yoze uli ni matwi, evwe chize anambe Spiritu ku yikungulwila.