Mateu 24:30 - MUKANDA USANDU WA ZAMBI 1975

³⁰ Hohene chilayi cha mwe Mwana Mutu kumuchikasoloka mwilu: ni hohene mavungu eswe a hashi kumakahia mbimbi, kumakamona mwe Mwana Mutu kaneza ha malelwa a mwilu ni tachi ni uhenya unene.

Mukanda Wa Zambi 1970

³⁰ Hohene chilayi cha mwe Mwana Mutu muchikasoloka kwilu. Mba mavungu eswe a hashi maakalila, maakamona Mwana Mutu kaneza ha malelwa ni ndundo jinji ni uhenya Wahiana.

Mateu 24:30 Iomraidhean Croise

Daniel 7:13

Namwene ha usolwelo wa ufuku, kumanyi hamwe ni malelwa a mwilu kwejile umwe ngwe mwana mutu; yakundama kuli mwe Mukulu-wa-Matangwa, yamusolola kuli iye.

Zakaria 12:10

Mungukazukula ha munyachi wa David ni hali akwa Yerusaleme Spiritu ya vumbi ni kulembela. Kumakahulikila meso yoze amutuwile. Kumakalishimwoka hali iye ngwe mutu kakulishimwoka hali mwanenyi wa lunga wa wika. Makamuvwila chinyengo ngwe chinyengo chize cha mutu hali mwanenyi mutangu.

Zakaria 12:11

Ha tangwa lize kulishimwoka mu Yerusaleme muchikapwa chinene ngwe kulishimwoka hali Hadade-Rimone ha chana cha Megidu.

Mateu 24:3

Shimbu machitwama ha mulundu wa Olevwe, tumbaji twenyi ejile kuli iye ukawo, nikwamba ngwo, Twambulwile kama, mwiji muka yuma yino muyikapwa? Chilayi cha kuheta che chika, ni cha kumanunuka cha mwaka?

Mateu 24:37

Alioze chizechene ngwe matangwa ja Noe, chocho muchikapwa kuheta cha mwe Mwana Mutu.

Mateu 24:39

Kanyingikine ndo sanga lia meya liejile likaahungumune eswe; chocho nawa muchikapwa kuheta cha mwe Mwana Mutu.

Mateu 26:64

Yesu yamba kuli iye ngwenyi, Yena wachamba; hindu ngwami, Kulutwe kumunukamona mwe Mwana Mutu kanatwama ha chindume cha tachi, kaneza ha malelwa a mwilu.

Marku 13:26

Hohene makamona mwe Mwana Mutu kaneza mu malelwa hamwe ni tachi jinene ni uhenya.

Marku 13:4

Twambulwile kama, mwiji muka yino yuma muyikapwa? Chilayi cha kumanunuka cha yino yuma kuchi muchipwa?

Luka 21:27

Hohene kumakamona mwe Mwana Mutu kaneza mu lelwa ni tachi ni uhenya unene.

Luka 22:69

Alioze chize ku haliapwila ndo kulutwe, mwe Mwana Mutu kumakatwama ku kwoko lia chindume lia tachi ja Zambi.

Yilinga 1:11

aze nawa ambile ngwo, Malunga A-Ngalileya, kuchi te nunamana nikutala mwilu? Yono Yesu, hamuchiza kuli yenu amutambwile mwilu, chocho kumakeza chizechene ngwe hinwamumona nikuya mwilu.

2 A-TESALONIKA 1:7

ni kuli yenu, kananupinjisa, munukahwima hamwe ni yetu, ha usolwelo wa Mwene Yesu mwilu hamwe ni angelo ja tachi jenyi,

Usolwelo 1:7

Talenu, kumeza ni malelwa; ni meso eswe kumakamumona, ni waze amutuwile; ni mavungu eswe a hashi kumakahia mbimbi hali iye. Chochene. Amene.

Usolwelo 12:1

Chilayi chinene chamonekene mwilu: pwo kanazala tangwa, ni kakweji kushi lia yiliato yenyi, ni ha mutwe wenyi chipangula cha kumi lia matongonoshi ni matongonoshi aali.