Mateu 18:19 - MUKANDA USANDU WA ZAMBI 1975

¹⁹ Cheka nawa ngunambe kuli yenu ngwami, Kachi aali a kuli yenu malikunda hano hashi ha kutwala ku chikuma chimwe chize munwita, kumakaalingilacho kuli Tata yoze uli mu malilu.

Mukanda Wa Zambi 1970

¹⁹ “Chamwenemwene ngunanwambulwila nawa ngwami, nyi aali hakachi kenu hano hashi maalikunda ni kwita chimwe Chuma ha kulemba, Tata wa mwilu makaaha cho.

Mateu 18:19 Iomraidhean Croise

Mateu 21:22

Ni yuma yeswe munwita ni Ufulielo ha kulemba, kumunukatambula.

Mateu 5:24

Hichikako chawana che ku chilumbilo, Uliange kuya ukawane ni mukwenu, mba ukeze, ukalambule chawana che.

Mateu 7:7

Etenu, mba kumanwaha; fupenu, mba kumunuwana; ngongwelenu, mba kumanwazulwila.

Marku 11:24

Kashika ngunambe kuli yenu ngwami, Yuma yeswayo munwita ha kulemba, fulielenu ngwe nunayitambula, neyo kumuyikapwa kuli yenu.

Yoano 15:16

Yenu kunwangutongwele, alioze yami nanutongwele, nanufunjikile, hanga nukaye, nukeme mihuko, hanga mihuko yenu yi-kalinduluke; hanga cheswacho munwita kuli Tata mu jina liami, akanwehecho.

Yoano 15:7

Kachi munutwama muli yami, ni maliji jami matwama muli yenu, nukete cheswacho munuzanga, kumuchikapwa kuli yenu.

Yoano 16:23

Ha tangwa lize kunuchi kanguhula nichimwe. Pundu, pundu, ngunambe kuli yenu ngwami, Cheswacho munwita kuli Tata mu jina liami, kumakanwahacho.

Yilinga 1:14

Wano eswe anyongonwene ni mbunge yimuwika ni kulemba ni kuliumba, hamwe ni mapwo, ni Maria, naye ya Yesu, ni hamwe ni anakwo.

Yilinga 12:5

Kashika afungile Petulu mu zuwo lia ususu; alioze akwa chikungulwila amulembelele kuli Zambi ni mbunge yeswe.

Yilinga 16:10

Muze te hamona usolwelo, haze hene twafupile kukatuka mukuya ku Masendoniya, nikunyonga ngwetu, Zambi hatutambika kwambujola sango lipema kuli ayo.

Yilinga 6:4

Alioze yetu mutunyongonona kulemba ni ku uvumbiko wa liji.

Filipu 1:19

Mumu ngunanyingika ngwami, Chino muchikalinga ulamwino wami ku kuliumba chenu, ni kukwasa cha Spiritu ya Yesu Kristu.

1 Yoano 3:22

ni cheswacho mutwita, mutuchitambula kuli iye, mumu twakufunga shimbi jenyi, twakulinga yuma yize ya kupemena kumeso jenyi.