Mateu 12:25 - MUKANDA USANDU WA ZAMBI 1975

²⁵ Alioze Yesu ha kunyingika manyonga jo, wambile kuli ayo ngwenyi, Wanangana weswe munuhandununa wene kumakaupwisa uhululu; limbo lieswe hanji zuwo lieswe mulihandununa liene kulichi kukola.

Mukanda Wa Zambi 1970

²⁵ Yesu, ha kunyingika manyonga jo, yaamba ngwenyi: “Nyi akwa wanangana maalihandununa ni kulitachika ene, wanangana uze muukabwa wahululu. Nyi akwa limwe limbo hanji akwa limwe jiko maalihandununa ene, jiko lize hanji limbo lize mulikafwa.

Mateu 12:25 Iomraidhean Croise

1 Yitanga Ya Mianangana 16:21

Henaho A-Izalele alipulile yihanda yiali. Chihanda chimwe cha atu chakawile Tibani mwana Nginate akamupwise mwanangana. Chihanda chikwo chakawile Omiri.

Miaso (Masamu) 139:2

Unanyingika ni kutwama chami ni kukatuka chami. Kunyonga chami kuchakulumbunuka kuli yena chipwe kusuku.

Izaya 9:21

Manase kanali Eframe, ni Eframe kanali Manase, mba hanalikate kulimika ni Yunda. Chipwe chocho utenu wenyi kuwakondolokele; kwoko lienyi hindu kanalizozo.

Jeremia 17:10

Yami Yehova kunakupolongoza mu manyonga ni kweseka mbunge, hanga ngukahane kuli mutu mweswe nikulita ni ndako jenyi, nikulita ni mihuko ya yitanga yenyi.

Amose 4:13

Mumu nyingikenu; yoze wakuwumba milundu, ni kutanga fuji; yoze wakusolola manyonga jenyi kuli atu; yoze wakwalumuna chimene chikapwe milima; yoze wakuliata ha milundu ya hashi— jina lienyi Yehova, Zambi-ya-Tujita.

Mateu 9:4

Alioze Yesu, nikunyingika yishinginyeka yo, wambile ngwenyi, Kuchi te nunashinginyeka yuma yipi mu mbunge jenu?

Marku 2:8

Haze hene Yesu, se kananyingika mu Spiritu yenyi, chocho anyongene, yamba kuli ayo ngwenyi, Kuchi te nunanyongo yino yuma mu mbunge jenu?

Yoano 21:17

Yamba kuli iye chisuho chamuchitatu ngwenyi, Semone, mwana Yona, unangufwila, nyi? Petulu wevwile chinyengo mumu wambile kuli iye chisuho chamuchitatu ngwenyi, Unangufwila, nyi? Yamba kuli iye ngwenyi, Mwene, yena unanyingika yuma yeswe; yena unanyingika ngunakufwila. Yesu yamba kuli iye ngwenyi, Lisa mapanga jami.

1 Korintu 2:11

Mumu iya hakachi ka atu manyingika yuma ya mutu shina spiritu ya mutu, yize yili muli iye? Chizechene yuma ya Zambi niumwe manyingika shina Spiritu ya Zambi.

Galashia 5:15

Alioze kachi munulisuma nikuliwumbula umwe ni mukwo, kanyamenu kuchina munuluka.

Hebreu 4:13

Ni chuma chize kuchishi kumoneka kuli iye chakuhi nichimwe; aiioze yuma yeswe yapwa ya uselesele, ya kufukuka kumeso ja yoze mutukamulumbunwina yuma yeswe.

Usolwelo 16:19

Ni limbo Hapulikile yihanda yitatu; ni membo ja mavungu apuzukile: ewulukile Babilonia kumeso ja Zambi, mukunwaha musenge wa vinyu ya ufwatulo wa utenu wenyi.

Usolwelo 2:23

Mungukashiha ana jenyi ni kufwa; ni yikungulwila yeswe kumanyingika yami nguli yoze wakuhengula muchima ni mu mbunge: mba mungukahana kuli mweswe wa kuli yenu nikulita ni yitanga yenu.