Malaki 3:7 - MUKANDA USANDU WA ZAMBI 1975

⁷ Chize ku matangwa ja tulamba twenu hinwahambuluka ku shimbi jami, kunwaatungile. Hilukenu kuli yami, ni yami munguhiluka kuli yenu. Chocho kanambe Yehova-wa-Tujita. Alioze yenu nwakwamba ngwenu, Tuhiluke kuchi?

Mukanda Wa Zambi 1970

⁷ Yenu, ngwe tushakulu twenu waze aliangile, hinwakolema Shimbi jami, kunwajifungile ko. Hilukenu kuli yami, ni yami munguhiluka kuli yenu. Alioze yenu nwakuhula ngwenu: ‘Kuchi chatutamba kulinga mba tuhiluke kuli yena?’

Malaki 3:7 Iomraidhean Croise

Nehemia 9:26

Chipwe chocho akolemene ni kukukatukila, ni kumbila shimbi je kunyima yo, ni kushiha aprofeta je waze aashindakenyene akaatewulwise kuli yena nawa. Akwihile chikolo.

Izaya 65:2

Tangwa lieswe nazozele moko jami kuli akwa kukolema, waze anende mu jila yimwe kuyapemene, nikukaula kutaka cho ene.

Jeremia 16:11

Mba muwamba kuli ayo ngwe, Yehova kanambe ngwenyi, Mumu tulamba twenu hanangwehuka, hanakaula mazambi eka nikwalingila nikwawayila, hanangwehuka; kafungile shimbi yami.

Jeremia 16:12

Ni yenu hinwawana tulamba twenu, mumu mweswe kanakaula upale wenyi mwene upi ni wa pami, kasolo kungwivwa.

Jeremia 3:22

Enu ana a mafwefwe hilukenu, mba munguwuka mafwefwe jenu. Tuneza kuli yena mumu uli Yehova Zambi yetu.

Jeremia 7:25

Chize ku tangwa lize tulamba twenu akatukile ku chifuchi cha Engitu ndo musono, chahonene kutuma tuvumbi twami aprofeta kuli ayo tangwa ha tangwa;

Jeremia 7:26

hindu kapanjikile kuli yami, chipwe kutela matwi, alioze akalishile makota jo nikuhiana tulamba two kulinga chipi.

Ezekiel 2:3

Yamba kuli yami ngwenyi, Mwana mutu, ngunakutumu kuli A-Izalele, vungu lia yihulia waze hanangukatukila, o ni tulamba two hanguvulumuna ndo tangwa lino lia musono.

Ezekiel 20:13

Alioze akwa munyachi wa Izalele yangukatukila mu puya; kendele mu yiyulo yami, yalituna shimbi jami jize mutu matwama ni mwono ha kujifunga. Masambata jami aajilwile chikolo. Yingunyonga kwazukwila ufwatulo wam mu puya ngukaamanunune lume.

Ezekiel 20:21

Alioze ana yangukatukila, kendele mu yiyulo yami, katalile kanawa kufunga shimbi jami jize atu kakutwama ni mwono ha kujifunga. Ajilwile masambata jami. Yingunyonga kwazukwila ufwatulo wami ni kuhwisa utenu wami hali ayo mu puya.

Ezekiel 20:28

Mumu muze hinaaneha mu chifuchi chize nalishingile kwaaha, mba heswaho amwene mulundu umwe usuku hanji mutondo umwe wa mafwo, kwenako alambwile yitapo yo ni kukunjika milambu yo ya kwihia; kwenako afwinjishile lupembo wo wa kutulisa mbunge, ni kuzujila milambu yo ya kunwa.

Ezekiel 20:8

Alioze yangukatukila, kasolo kungupanjika. Niumwe mutu kambilile yuma yize ya lwaji kayipalikilile meso jenyi, chipwe kwehuka mahamba ja Engitu. Yingu nyonga ngwami, Munguzukula ufwatulo wami hali ayo ni kuhwisa utenu wami hali ayo hakachi ka chifuchi cha Engitu.

Hosea 14:1

Enu A-Izalele, hilukenu kuli Yehova Zambi yenu, mumu hinwalimbuka ha mukunda wa uhenge wenu.

Zakaria 1:3

kashika amba kuli ayo ngwe, Yehova-wa-Tujita kanambe ngwenyi, Hilukenu kuli yami ni yami munguhiluka kuli yenu. Chocho kanambe Yehova-wa-Tujita.

Malaki 1:6

Mwana kakulemesa tato; ni kavumbi kakuvwila woma mwata wenyi. Nyi nguli tatenu ulemu wami ulihiwo? Nyi nguli mwata woma nwakunguvwila ulihiwo? Chocho kanambe Yehova-wa-Tujita kuli yenu asasendote nwakulelesa jina liami. Enu nunambe ngwenu, Kuchi twalelesa jina lie?

Malaki 3:13

Yehova kanambe ngwenyi, Maliji jenu hapwa a tachi a kulimika ni yami. Hindu nwakwamba ngwenu, Kuchi twakwamba kulimika ni yena?

Mateu 23:27

Lamba lienu, akwa kusonyeka ni A-Fwariseu, yilembese! mumu kununapu ngwe mafuka a kutomesa ni pemba waze akusoloka ngwe apema haze, alioze muchima munazala ni yifwaha ya afu, ni luchisa mweswe.

Luka 15:16

Iye wevwile usona wa kukuchisa jimo lienyi ni yizungu yize apwile nikulialia ngulu; alioze kamuhele niumwe.

A-ROMA 10:21

Alioze hali A-Izalele kanambe ngwenyi, Tangwalieswe nganganga nolwele moko jami kuli atu ja uhulia, a kuhamika.

A-ROMA 10:3

Mumu kakwalajala ha ululi wa Zambi, kakufupa kukolesa ululi wo ene, kalizeyesele ku ululi wa Zambi.

A-ROMA 7:9

Alioze napwile ni mwono chishi shimbi ha miaka ya kunyima; alioze muze shimbi yejile, shili yahuzulukile ni yami nafwile;

Shimbi 31:20

Muze mungwahetesa mu chifuchi nalishingile kuli tulamba two mukwaahacho, kuze kunokela yamwa ni wuchi, ha kulia, ha kukuta, ha kutoha, henaho o makatewulukila ku tuzambi tweka, nikutuvumbika, makangulelesa, makatangula usendo wami.

Tiangu (Jake) 4:8

Kundamenu kuli Zambi, iye kumakakundama kuli yenu. Pemesenu moko jenu, yenu yivulumunyi; tomesenu mbunge jenu, yenu akwa mbunge jiali.