Luka 4:6 - MUKANDA USANDU WA ZAMBI 1975

⁶ Ndiapu wambile kuli iye ngwenyi, Mungukwaha chiyulo chino cheswe ni uhenya wacho, mumu hanangukunjikawo; kuli mweswawo mungumupala, mungumwahawo.

Mukanda Wa Zambi 1970

⁶ Yamwamba ngwenyi: “Mungukwaha chiyulo chino cheswe ni upichi wa mawanangana wano. Yize yeswe hanangukunjika yo ngunahase kuyihana kuli yoze ngunazange.

Luka 4:6 Iomraidhean Croise

Estere 5:11

Hamane yaambulwila uhenya wa upite wenyi, ni kulumbama cha ana jenyi ni yuma yize mwanangana hamusenyesa nayo, ni chize hamuhianyisa helu lia alemu ni tuvumbi twa mwanangana.

Izaya 23:9

Yehova-wa-Tujita hanachifunjika, akachise kulengumuka cha uhenya weswe, akalelese alemu eswe a hashi.

Izaya 5:14

Kashika Shiole hiyokesa solo liayo; hiyatohesa kanwa liayo kuhiana, mba alemu ja Yerusaleme ni mbunga yako kanalundumukako, chihuji chako ni mweswe unalikwiza nayo.

Luka 4:7

Kashika kachi munguwayila, kachi weswe kumuukapwa niwe.

Yoano 12:31

Haliapwila upatwilo wa hashi hiweza; haliapwila kumambila haze mwata wa hashi.

Yoano 14:30

Chichi kuhanjika chinji nawa ni yenu, mumu mwata wa hano hashi meza: keshi nichimwe muli yami;

Yoano 8:44

Yenu nuli a kuli tatenu Ndiapu, nwakuzanga kulinga usolo wa tatenu. Iye wapwile chingalwe chize ku uputukilo, kamanyine mu umwenemwene, mumu umwenemwene wakuhi muli iye, niumwe. Muze mahanjika mahuza, kanahanjika nichenyi mwene; mumu iye mukwa mahuza ni mwe tato ya mahuza.

2 Korintu 11:14

Achi kuchatushimine, mumu chipwe Satana kakulihipula ngwe mungelo wa pangu.

Efesu 2:2

mu yenayo ha miaka ya kunyima nwendele nikulita ni ndako ya hano hashi, nikulita ni mwata wa chiyulo cha mu tetela, Spiritu yoze haliapwila wakulinga muli akwa uhulia.

1 Petulu 1:24

Mumu musunya weswe unapu ngwe mwambu, ni uhenya wawo weswe ngwe chitemo cha mwambu; mwambu muulela, ni chitemo chawo muchiholoka,

1 Yoano 5:19

Tunanyingika yetu tuli a kuli Zambi, ni hashi heswe lukombo kuhakupomba mu chiyulo cha mwe chingulungulu.

Usolwelo 12:9

Ni ndragau munene amunyashine hashi, mwe kapela wa shakulu, jina lienyi ngwo, Ndiapu kanda Satana, mwe mukwa kupiangula yifuchi yeswe ya hashi; amunyashine ndo hashi, ni anyashine angelo jenyi hamwe nenyi hashi.

Usolwelo 13:2

Ni ngongo yoze namumwene walifwile ni kangwili, ni makata jenyi ngwe makata ja ursu: ni kanwa lienyi ngwe kanwa lia ndumba: ni ndragau wamuhele tachi jenyi, ni ngunja yenyi, ni poko yenyi yinene.

Usolwelo 13:7

Amuhelecho kwasa jita ni asandu, mukwakumba: amuhele poko helu lia minyachi yeswe, ni atu eswe, ni malimi eswe, ni mavungu eswe.