Luka 18:13 - MUKANDA USANDU WA ZAMBI 1975

¹³ Alioze mukwa kufwetesa lijimu kanamana kusuku, katayile chipwe kuhetula meso jenyi kwilu, alioze walambile ha pambo lienyi, nikupihilila, ngwenyi, Zambi, nguvwile kama keke, yami mwe chivulumunyi.

Mukanda Wa Zambi 1970

¹³ Mukwa kulambwisa lijimu yamana kusuku. Kahamukine chibwe kuhetuka, alioze yalilamba ha bambo ngwenyi: ‘Aa Zambi! Nguvwile kama keke, yami Chivulumunyi!’ ”

Luka 18:13 Iomraidhean Croise

2 Samuel 12:13

David yamba kuli Natane ngwenyi, Yehova hinamuvulumuna. Natane yamba kuli David ngwenyi, Yehova hakuchiza mutonga we. Kuchi kutwa.

2 Sango Ja Mianangana 33:19

Kulemba chenyi, ni chize Zambi wamukumbulwile, ni shili yenyi yeswe, ni Utanguko wenyi, ni yihela yize atungileko manangamo ni kumika Ashera ni tuponya a kwola shimbu kanda alilelesa, hanayisoneka mu mukanda wa akwa kumona.

2 Sango Ja Mianangana 33:23

Kalilelesele kumeso ja Yehova ngwe tato Manase walilelesele, alioze yono Amone wawezelele Utanguko helu nawa.

Ezra 9:6

Yingwamba ngwami, Zambi yami, ngunevu kú, ni mutwe yipu! Sonyi ngunevu kuhetula meso jami kuli yena Zambi yami. Mumu uhenge wetu hiwalumbama helu lia mitwe yetu, ni uhie wetu hiwaliwezela ndo ku malelwa.

Jobe 42:6

kashika ngunalilelesa, ngunalikonyeka mu fufuta ni uto.

Miaso (Masamu) 106:6

Twavulumwine hamuwika ni akaka; twalingile uhenge, twalingile ungulungulu.

Miaso (Masamu) 119:41

Yehova, utu wa zango lie wize kuli yami, ni ulamwino we nikulita ni liji lie.

Miaso (Masamu) 130:7

Enu A-Izalele, talatalenu Yehova, mumu kuli Yehova kwatwama utu wa zango. Kuli iye kwatwama ukule wa kulumbama.

Miaso (Masamu) 25:11

Yehova, mumu ha jina lie ngukonekene kama uhenge wami, mumu hiwoka chikolo.

Miaso (Masamu) 25:7

Kanda wiwuluka kama milonga ya ukweze wami, hanji uvulumunyi wami. Nikulita ni utu wa zango lie ungwiwuluke kama, mumu ha upeme we, Yehova.

Miaso (Masamu) 40:12

Mumu yuma yipi yahiana kwalula hiyanguseleka. Uhenge wami hiwanguwana, chocho chahashile kuhetuka: wahiana kambu ja ha mutwe wami, kashika mbunge yami hiyalezumuka.

Miaso (Masamu) 41:4

Nambile ngwami, Yehova, nguvwile kama vumbi; wuka mbunge yami mumu nakuvulumwine.

Kutuhuka 33:10

Atu eswe amwene lie nguji lia lelwa Unamana ku chikolo cha mbalaka. Atu eswe yakatuka nikuwayila, mutu mweswe ku chikolo cha mbalaka yenyi.

Izaya 1:18

Yehova kanambe ngwenyi, Tweyenu tulishimwinye hamuwika. Chipwe milonga yenu yachila nge, kumuyipwa yitoma ngwe neve. Chipwe yahiana kuchila, muyalumuka ngwe wanda utoma.

Izaya 6:5

Ami yingwamba ngwami, Lamba liami! Ngunatoko, mumu nguli mukwa mivumbo ya luchisa, natwama hakachi ka akwa mivumbo ya luchisa; mumu meso jami hamona Mwanangana, Yehova-wa-Tujita.

Izaya 66:2

Yehova kanambe ngwenyi, Yuma yino yeswe ya kulinga ni moko jami, kashika yuma yino yeswe niyami. Alioze mutu mungumutala, yono: mukwa kulikehesa, mukwa kumakuka mu Spiritu, yoze kakuchikimina liji liami.

Ezekiel 16:63

hanga ukewuluke ukalitupieke, kanda upakula nawa kanwa lie mumu ha sonyi muze mungukakukonekena yize yeswe hiwalinga. Chocho kanambe Mwene Yehova.

Daniel 9:5

etu hitwavulumuna, hitwalinga chipi, hitwalinga ungulungulu, hitwakukatukila ni kuhambuluka ku shimbi je ni yiyulo ye.

Mateu 10:3

Fwilipe, ni Mbatolomeu; Tomase, ni Mateu mukwa kufwetesa lijimu; Tiangu, mwana Alefweu ni Lepeu, jina lienyi likwo, Tateu;

Mateu 6:5

Muze mulemba kanda upwa ngwe yilembese, mumu mafwila kulemba nikumana mu masunangonga ni ha malindalinda ja matapalo, hanga akasoloke kuli atu. Pundu ngunambe kuli yenu ngwami, Hanatambula kwononona cho.

Mateu 9:13

Alioze yénu, nukalilongese chize muchilumbunuka ngwo, Ngunazange keke, hi chitapo ko; mumu chejile mukutambika akwa ululi, alioze mukutambika yivulumunyi alikonyeke.

Marku 11:25

Ni muze munumana nikulemba, konekenenu akwenu kachi chuma chimwe numuli nacho umwe; hanga Tatenu nawa yoze uli mu malilu, akanukonekene milonga yenu.

Luka 17:12

Shimbu machinjila mu chimwe chihunda, kumi lia malunga akwa mbumba atakanyine nenyi, eno amanyine kusuku;

Luka 22:41

Iye wasosolokele kuli ayo chipinji ngwe kukonga cha liwe; iye waliumbile ha makungunwa nikulemba ngwenyi,

Luka 23:48

Mbunga jize jeswe akungulukile ku chitala chino, muze amwene yuma yize alingile, ahilukile, nikulamba tulo jo nikupihilila.

Luka 5:8

Alioze Semone Petulu muze achimwene, wafulamanyine ku makungunwa ja Yesu, ngwenyi, Mwene, katukenu kuli yami, mumu nguli chivulumunyi.

Yilinga 2:37

Achi, muze evwile chino alichokele mu mbunge, o ambile kuli Petulu ni apostolo ngwo, Mandumbu, kuchi mutulinga?

A-ROMA 5:8

Alioze Zambi kanasolola chinyingi cha zango lienyi kuli yetu, mumu shimbu te tuchili yivulumunyi, Kristu watufwilile.

2 Korintu 7:11

Mumu chikuma chino chene, cha kunuvwisa chinyengo nikulita ni Zambi, talenu kulipupwisa chipwa haha chalingile muli yenu, ewa, kulisambisa chipwa haha! Ewa, kwivwa kupiha chinene chipwa haha! Ewa, woma upwa haha! Ewa, usona upwa haha! Ewa, tachi ja mbunge jipwa haha! Ewa kulikala chipwa haha! Kweswe hinwasamba ha chuma chino.

1 Timoteu 1:15

Liji lino liatela kufuliela, linatambe kutá cheswe, ngwo, Kristu Yesu wejile hano hashi mukulamwina yivulumunyi; hakachi ko, yami nahiana.

Hebreu 4:16

Tukundamenu kashika ni hamu ku ngunja ya vumbi, hanga tukatambule keke, tukawane vumbi lia kutukwasa ha mwaka wa chikala.

Hebreu 8:12

Mumu kumungwavwila keke ha uhenge wo, ni milonga yo chichi kayiwuluka nawa ndo ku miaka ya mutolo.