Luka 13:34 - MUKANDA USANDU WA ZAMBI 1975

³⁴ Yerusaleme, Yerusaleme, yena wakushiha aprofeta, wakwasa mawe waze aatumine kuli yena! Yisuho yipwa haha nazangile kukungulula i ana je ngwe chali makungulula ana jenyi mushi lia mapulwa jenyi, alioze kunwatayile.

Mukanda Wa Zambi 1970

³⁴ “Yerusaleme, Yerusaleme! Yena wakushiha akwa munanyi a Zambi, wakwasa mawe waze Zambi akukutumina! Yisuho yibwa haha nazangile kukungulula ana je, ngwe chize chali cha kasumbi akukungulula ana jenyi mu mapulwa, alioze kunwachitayijile!

Luka 13:34 Iomraidhean Croise

Nehemia 9:26

Chipwe chocho akolemene ni kukukatukila, ni kumbila shimbi je kunyima yo, ni kushiha aprofeta je waze aashindakenyene akaatewulwise kuli yena nawa. Akwihile chikolo.

Nehemia 9:30

Alioze miaka yinji walihumikijine no. Waashindakenyene kuli Spiritu ye muli aprofeta. Hindu kasolo kwivwa, kashika waakunjikile mu moko ja mavungu a yifuchi.

Miaso (Masamu) 149:2

Izalele akawahilile muli yoze wamutangile. Ana ja Zaione akawahilile muli mwanangana wo.

Miaso (Masamu) 17:8

Ngufunge kama ngwe katumba ka liso. Ngusweke kushi lia Chizulie cha mapulwa je,

Miaso (Masamu) 36:7

Zambi, utu wa zango lie upema chimwe! Kashika ana ja atu kaswama kushi lia mapulwa je.

Miaso (Masamu) 57:1

Nguvwile kama vumbi, Zambi, nguvwile kama vumbi, mumu mbunge yami kuyaswama muli yena. Ewa, mu Chizulie cha mapulwa je munguswama ndo luyinda yono hahwa.

Miaso (Masamu) 81:13

Atu jami, kachi mangwivwa! Izalele, kachi menda mu majila jami!

Miaso (Masamu) 91:4

Kumakakufuka ni ngona jenyi. Mushi lia mapulwa jenyi mukachinyina. Umwenemwene wenyi wapwa lukepwe, ni mukehe ni munene.

Izaya 30:15

Mumu Mwene Yehova, mwe Musandu wa Izalele, kanambe ngwenyi, Ha kuhiluka ni kuhwima, munukalilamwina; mu uhwimino ni Ufulielo mukukapwa tachi jenu. Alioze kunwatayile.

Izaya 50:2

Muze nejile kuchi te kukwapwile niumwe? Muze nasanyikine kuchi te mukwa kutá wakuhi? Te kwoko liami liahiha, kashika kuliahashile kukula? Tachi chishi najo ja kupulula? Nyongenu, ha liji liami lia kukanda nakuumisa kalunga-lwiji, nakupwisa njiji ngwe puya. Yishi jamo kanakupuka ha kuhona meya, kakufwa ni pwila.

Jeremia 2:30

Hinalamba ana jenu alioze chamokomoko, mumu katambwile kufumba nichimwe. Katana ka yenwene wonwene aprofeta jenu ngwe ndumba mukwa kupapulula.

Jeremia 26:23

o yasaka Uriya ku Engitu yamuneha kuli mwanangana Jehoakime. Aye yamushiha ni katana, yambila mujimba wenyi mu chifuka cha atu amokomoko.

Jeremia 35:14

Shimbi yize Jonadabe mwana Rekabe hahana kuli ana jenyi kanda akanwa vinyu, hanayifungu kayinwine ndo musono, mumu hononoka ku shimbi ya kalamba ko. Ni yami hinahanjeka kuli yenu alioze kunwangupanjikile.

Jeremia 35:17

Kashika Yehova, Zambi-ya-Tujita, Zambi ya Izalele kanambe ngwenyi, Ngunaneha hali A-Yunda ni akwa Yerusaleme eswe yuma yize yikalu hinatongola kuli ayo. Mumu hingunahanjika kuli ayo hindu kevwile; hingunaasanyika hindu katayile.

Jeremia 6:16

Yehova kanambe ngwenyi, Manenu ku sesa lia matapalo nutale, nukahule majila a ku shakulu, kukuli jila yipema nwendemo, nukawane uhwimino ha mbunge jenu. Alioze o ambile ngwo, Kutuchi kwendamo.

Lungungu 1:16

Yino yuma ngunalilila ni meso jami anasotwokela masoji; mumu mukwa kuwumbijeka kusuku ali ni yami yoze mahasa kuhuzulula hamu liami. Ana jami kanalezumuka, mumu mukwa kole hakumba.

Lungungu 4:13

Chino chapwile mumu ha milonga ya aprofeta jenyi, ni ha uhenge wa asasendote jenyi, waze amwangine hakachi ko manyinga ja akwa ululi.

Hosea 11:2

Cheswe nalikolezele kwasanyika o yalikoleza kukatuka kuli yami. Yawezela kushihila yitapo Ambale nikwochela insensu mahamba.

Hosea 11:7

Atu jami hasa mbunge jo akangwehuke, kashika hinaafunjikila kanga mba niumwe maachizayo.

Joele 2:23

Enu ana ja Zaione, Wahililenu. Likwizenu muli Yehova Zambi yenu, mumu kakunwaha vula musazu nikulita. Kakunutuma vula, ni vula musazu, ni vula wa samakwasa ha kakweji mutangu.

Zakaria 1:4

Kanda nupwa ngwe tulamba twenu, kuli ayo aprofeta a kushi akololokele ngwo, Yehova-wa-Tujita kanambe ngwenyi, Katukenu ku majila jenu api ni yitanga yenu yipi. Alioze kevwile; kangupanjikile; chocho kanambe Yehova.

Mateu 22:3

mba watumine ndungo jenyi mukutambika waze aalakenyene ku ulungi: no katayile kwiza.

Mateu 22:6

Akwo akwachile ndungo, nikwalinga chipi, nikwashiha.

Luka 15:28

Alioze iye watenukine, katayile kunjila; tato watuhukile, waliumbile kuli iye.

Luka 19:44

Kumakakupuzula hashi, ni ana je muli yena, kechi kahichika muli yena liwe limuwika ha liwe likwo; mumu te kwanyingikine mwaka we upema.

Luka 23:28

Alioze Yesu, nikutewulukila kuli ayo, wambile ngwenyi, Yenu mapwo ja Yerusaleme, kanda nungulilila yami, alioze lililenu yenwene ni ana jenu.

Yilinga 7:52

Iya hakachi ka aprofeta, tulamba twenu kamuhungumioneneko? O hanashihi waze ambulwile Shimbu-kanda ha kutwala ku kwiza cha Mukwa Ululi; kuli iye yenu nunapu haliapwila akwa kuhandukulula ni yingalwe.

Yilinga 7:59

O ashile mawe Eshetevau, iye te kanakololoka ngwenyi, Mwene Yesu, tambula kama Spiritu yami.

Yilinga 8:1

Saulu te kanatayiza kufwa chenyi. Ha tangwa lize kwakatukile yihungumiona yinene ha chikungulwila chize chapwile mu Yerusaleme; ni eswe amwanganyine mwamwa mu yifuchi ya Yundeya ni Samaria, alioze apostolo, ka.

Shimbi 32:29

Nyi kachi mana apwile no, kachi machisa chinyingi, kachi mamona kama songo lio.

Shimbi 5:29

Kachi mapwa ni mbunge yino muli ayo, hanga anguvwile woma, afunge maliji jami eswe a shimbi matangwa eswe, hanga atwame kawape, ana jo nawa atwame kawape cha mutolo.

Usolwelo 11:8

Ni mijimba yo yinapombo mu tapalo lia limbo linene, lize anavuluka ha uspiritu ngwo, Sondome, ni ngwo, Engitu, kuze nawa ahachilile Mwene wo ha kulusu.

Rute 2:12

Yehova akukundulule yize yeswe walinga; akakwehe kwononona cheswe cha muwundu kuli Yehova Zambi ya Izalele, se hiweza kuswamina mushi ha mapulwa jenyi.