Longeshi 3:4 - MUKANDA USANDU WA ZAMBI 1975

⁴ tangwa lia kulila, ni tangwa lia kuseha; tangwa lia kulinyenga, ni tangwa lia kuhangana;

Mukanda Wa Zambi 1970

⁴ Kakutongola tangwa lia chinyengo ni tangwa lia kuwahilila, tangwa lia kulila mbimbi ni tangwa lia kuhangana,

Longeshi 3:4 Iomraidhean Croise

Ubutukilo 21:6

Sara yamba ngwenyi, Mba Zambi hangwaha kuseha, ni waze eswe machivwa maseha hamwe ni yami.

2 Samuel 6:16

Ha kuheta mushete wa Yehova kwimbo lia David Mikale mwana Saulu yatalila ku njanela, yamona mwanangana David kanatumbwoka ni kuhangana kumeso ja Yehova, kashika yamulelesa mu mbunge yenyi.

Miaso (Masamu) 30:11

Hiwangwalumwina kulila chami kuhangana. Hiwanguzula chikeleyi chami, hiwangujika uwahililo.

Miaso (Masamu) 30:5

Mumu utenu wenyi wa shimbu likepekepe wika, vumbi lienyi mulipwa lia miaka yeswe ya mwono wetu. Hanji malilo mapwa ha ufuku, alioze ha chimenemene uwahililo muwiza.

Kutuhuka 15:20

Profeta wa pwo Miriame, ndumbu ya Arone, wakwachile kamukupiela mu kwoko lienyi mba mapwo eswe yatuhuka hamwe nenyi ni tumikupiela nikuhangana.

Longeshi 3:5

tangwa lia kumbila mawe, ni tangwa lia kukungulula mawe; tangwa lia kulikangayika, ni tangwa lia kulitwamina;

Longeshi 7:14

Wahilila ha tangwa lia kuyuka; Zewula kanawa ha tangwa lia luyinda. Zambi halinga limwe hamuwika ni likwo hanga mutu kechi kasa chinyingi chimwe chuma muchiza kupwa muze iye haya kulu.

Izaya 40:1

Umbijeka atu jami, umbijeka, chocho kanambe Zambi yenu.

Izaya 40:2

Hanjika ku mbunge ya Yerusaleme, kololoka kuli iye, kukilikita chenyi hichahwa, uhenge wenyi hanaukonekena, hanatambula ku kwoko lia Yehova yisuho yiali ha milonga yenyi yeswe.

Mateu 11:17

ngwo, Twembanga ndembo kuli yenu, alioze kunwahanganyine; twalinyenganga, alioze kunwalilile mbimbi.

Mateu 9:15

Yesu wambile kuli ayo ngwenyi, Akwa ulungi mahasa kulinyenga shimbu sandungi mapwa hamwe no, nyi? Alioze matangwa kumakeza muze makachiza sandungi kuli ayo, mba hohene makalitwamina kulia.

Luka 1:58

Enyembo jenyi ni usoko wenyi evwile ngwo, Mwene hokesa keke yenyi kuli iye, no awahililile hamwe nenyi.

A-ROMA 12:15

Wahililenu hamwe ni waze akuwahilila; lilenu hamwe ni waze akulila.

2 Korintu 7:10

Mumu chinyengo cha kulita ni Zambi kuchakulinga kulikonyekena ku ulamwino, chize kechi kachipihilila nawa: alioze chinyengo cha hano hashi kuchakulinga kufwa.

Tiangu (Jake) 4:9

Lungajalenu, nenganyanenu, lilenu: kuseha chenu chialumuke kunenganyana, ni uwahililo wenu ualumuke kuhonga ku meso.