Kwalula 6:3 - MUKANDA USANDU WA ZAMBI 1975

³ akalihandunune ku vinyu ni ku kunwa chisasu. Kanda akanwa vinagre ya ku vinyu, chipwe vinagre ya ku kunwa chisasu, chipwe meya a uva kanda akaanwa; chipwe uva ya wisu, chipwe yumu kanda akayilia.

Mukanda Wa Zambi 1970

³ akajila kunwa vinyu ni yuma yisasu. Kanda alia ni kanda anwa mihuko ya vinyu niyimwe.

Kwalula 6:3 Iomraidhean Croise

Alevi 10:9

Kanda ukanwa vinyu hanji kunwa chisasu, chipwe yena, chipwe ane a malunga hamwe ni yena, muze mununjila mu mbalaka ya chikungulwila, kuchina munufwa. Chino chikapwe chiyulo cha mutolo kuli yenu ndusu yisemuko yenu yeswe.

Amose 2:11

Nazundwile amwe hakachi ka ana jenu akapwe aprofeta, ni amwe hakachi ka akweze jenu akapwe Anazireu. Yehova kanambe ngwenyi, Hi chocho ko, enu A-Izalele?

Amose 2:12

Alioze nwanwishine Anazireu vinyu; nwambile aprofeta ngwenu, Kanda nuprofeteza.

Kwalula 6:4

Ha matangwa eswe a kulihandununa chenyi kanda akalia nichimwe cha ku mutondo wa uva, chipwe mbuto, chipwe yizuwi, ka.

Luka 1:15

Mumu kumakapwa munene kumeso ja Mwene, kechi kanwa vinyu, chipwe kunwa chimwe chisasu, ka; iye makazala tò ni Spiritu Musandu, chize ku jimo lia naye.

Luka 21:34

Alioze keyelenu kuli yenwene kuchina hanji mbunge jenu mujilema ni upulutu, ni kuzengewa, ni yipikalo ya mwono uno, ni tangwa lize mulitulumuka hali yenu ngwe muheto susumuku hiliasoloka.

Efesu 5:18

Kanda nuzengewa ni vinyu, mu yenayo muchili chimbangwinya, alioze zalenu ni Spiritu.

1 Tesalonika 5:22

Súlenu ku milali yeswe ya ungulungulu.

1 Timoteu 5:23

Kanda ukanwa meya wika, alioze tambula kavinyu, mumu ha lufu we ni kukokoloka che chinji.

Hebreu 9:10

Se yatwala wika ku yuma ya kulia ni kunwa ni kusana cheka ni cheka, maliji a yiyulo ya musunya, aatwikile ndo mwaka wa kululika yuma yeswe.

Akwa Kuyula 13:14

Kuchamutambile kulia chuma chinakatuka ku mutondo wa uva. Kanda akanwa vinyu, hanji kunwa chisasu. Kanda akalia yuma ya luchisa. Akafunge shimbi jami jeswe.

Akwa Kuyula 13:4

Kashika ukanyame, kanda ukanwa vinyu hanji kunwa chisasu. Kanda ukalia yuma ya luchisa,