Kutuhuka 3:4 - MUKANDA USANDU WA ZAMBI 1975

⁴ Yehova yamona ngwe iye hajingako mukutala, mba Zambi yamutambika ni liji lia kutuhuka ku mungonga ngwenyi, Mose, Mose. Iye yatá ngwenyi, Yami uno.

Mukanda Wa Zambi 1970

⁴ Muze Mwene Zambi hamona ngwenyi, Mose kanakundama ko, yamutambika mukachi ka chibuta ngwenyi: “Mose! Mose!” Iye ngwenyi: “Ewa mwane.”

Kutuhuka 3:4 Iomraidhean Croise

Ubutukilo 22:1

Kulutwe lia yino yuma Zambi yeseka Apalahama. Yamba kuli iye ngwenyi, Apalahama. Iye yakumbulula ngwenyi, Yami uno.

Ubutukilo 22:11

Alioze mungelo wa Yehova mwilu yamusanyika ngwenyi, Apalahama, Apalahama. Iye yamba ngwenyi, Yami uno.

Ubutukilo 28:16

Mba Yakomba yalaula ku tulo twenyi, yamba ngwenyi, Pundu, Yehova kuno kwali, ami chachinyingikine.

Ubutukilo 46:2

Zambi yahanjika ni Izalele ni usolwelo wa ufuku ngwenyi, Yakomba, Yakomba. Iye yamba ngwenyi, Yami uno.

Miaso (Masamu) 62:11

Zambi hanahanjika kamuwika. Kaali hinevwa chuma chino, ngwo, Ndundo japwa ja mbala ja Zambi.

Kutuhuka 19:3

Mose wakandukile kuli Zambi mba Yehova watambikile kuli iye ni liji lia kutuhuka ku mulundu ngwenyi, Chocho ukambe kuli A-Yakomba, nikwambulwila A-Izalele ngwe,

Kutuhuka 3:2

Mungelo wa Yehova yasoloka kuli iye mu mulengi wa kahia, mukachi ka mungonga. Iye yatalako, kumanyi mungonga unayili ni kahia hindu we mungonga kuwakotongokele.

Kutuhuka 33:12

Mose yamba kuli Yehova ngwenyi, Yena unambe kuli yami ngwe, Kandwisa wano atu, alioze kwangulwezele yoze mutuma ni yami. Hindu hiwamba ngwe, Ngunakunyingika ni jina lie, hiwawana nawa vumbi kumeso jami.

Kutuhuka 4:5

Hanga akafuliele ngwo, Yehova, Zambi ya tulamba twetu, Zambi ya Apalahama, Zambi ya Izake, Zambi ya Yakomba hanasoloka kuli yena.

Alevi 1:1

Yehova yasanyika Mose, yamba kuli iye ku mbalaka ya chikungulwila ngwenyi,

Yilinga 10:13

Liji liejile kuli iye ngwo, Katuka, Petulu; shiha, ulie.

Yilinga 10:3

Ha ola yamuchilivwa ya mwalwa wamwene zwalala mu usolwelo, mungelo wa Zambi, kananjila kuli iye, nikwamba kuli iye ngwenyi, Koneliu.

Yilinga 9:4

Iye walimbukile hashi, wevwile liji lia kwamba kuli iye ngwo, Saulu, Saulu, kuchi te wakunguhungumiona?

Shimbi 33:16

ni yawana yahiana ya mu mavu ni kulumbama cho, ni uwape wa yoze Watwamine mu mungonga. Yino yeswe yikatwame ha mutwe wa José, ha mbanda-mutwe wa yoze amuhandunwine hakachi ka ayayo.

1 Samuel 3:10

Yehova yeza, yamana, yasanyika ngwe majila akwo ngwenyi, Samuel, Samuel. Mba Samuel yamba ngwenyi, Amba mumu kavumbi ke kanapanjika.

1 Samuel 3:4

Yehova yasanyika Samuel. Iye yakumbulula ngwenyi, Yami uno.

1 Samuel 3:6

Yehova cheka nawa yasanyika Samuel. Samuel yahinduka yaya kuli Eli. Yamba ngwenyi, Yami uno, se wangusanyika. Iye yakumbulula ngwenyi, Chakusanyikine mwanami. Yako upombe nawa.

1 Samuel 3:8

Mba Yehova yasanyika cheka nawa kamuchitatu. Iye yahinduka, yaya kuli Eli ngwenyi, Yami uno, se wangusanyika. Eli yanyingika ngwenyi, Yehova hanasanyika mwe mwana.