Kutuhuka 19:4 - MUKANDA USANDU WA ZAMBI 1975

⁴ Nwamwene chize nalingile kuli A-Engitu, ngwe yami nanumbachile ha mapulwa ja pupa nikunuhetesa kuli yami mwene.

Mukanda Wa Zambi 1970

⁴ ‘Yenwene nunakamona chize yami Mwene Zambi ngunakalinga akwa Egiptu, ni chize ngunakanuneha kuno, ngwe ha mapulwa ja tela.

Kutuhuka 19:4 Iomraidhean Croise

Izaya 40:31

alioze waze matwaminyina Yehova kumakahuzulula tachi jo, kumakazezuka ni mapulwa ngwe pupa, kumakazomboka ni yikatalo yakuhi, kumakenda ni kulezumuka ka.

Izaya 63:9

Mu huli lio lieswe iye wamwene huli, mba mungelo wa kumeso jenyi waalamwinyine. Ni zango lienyi ni keke yenyi waakulile; waazundwile, waambachile matangwa eswe a shakulu.

Hosea 11:1

Muze Izalele wapwile mwana namuzangile. Ku Engitu nasanyikine mwanami wa lunga.

Hagai 2:5

nikulita ni chilakenyo chize nanuhele ha kukatuka ku Engitu. Spiritu yami katwama hakachi kenu; kanda nwivwa woma.

Malaki 2:10

Te eswe hi tata umuwika ko? Katutangile kuli Zambi umuwika? Nyi chocho kuchi te twakulinga ni mafwefwe umwe kuli mukwo ni mukwo nikujilula usendo wa tulamba?

Shimbi 1:30

Yehova Zambi yenu manutetekela, iye makanwashila jita, nikulita ni yeswe anulingilile mu Engitu ku meso jenu.

Shimbi 1:31

Ni mu puya, nwamwenemo ngwe Yehova Zambi yenu anumbachile ngwe lunga mambata mwanenyi, mu jila yeswe nwayilemo, ndo nwejile kuno.

Shimbi 29:1

Wano e maliji a usendo, Yehova wambile Mose kukolesa ni A-Izalele mu chifuchi cha Moape, kuweza ku usendo iye wakolesele no ku Horepe.

Shimbi 29:2

Mose yatambika A-Izalele eswe ngwenyi, Nwamwene yeswe alingile Yehova kumeso jenu mu chifuchi cha Engitu kuli Falau, ni kuli ngamba jenyi, ni ku chifuchi chenyi cheswe.

Shimbi 4:9

Chino wika ngwami, Nukanyame, nufunge chikolo mbunge jenu kuchina munuvulama yuma yize hinunayimono, kuchina muyikatuka ku mbunge jenu matangwa eswe a mwono wenu, ni ana jenu ni ajikulu jenu nwanyingikiseyo.

Yoshua 23:3

Ni yenu hinwamona yuma yize yeswe Yehova Zambi yenu halinga ku mavungu ano eswe mumu hali yenu, mumu Yehova Zambi yenu iye hanwashila jita.

Usolwelo 12:14

Alioze ahanyine kuli pwo mapulwa aali a pupa munene, hanga akahumuke ku puya kuma kwenyi kuze akumuhokela mwaka, ni miaka, ni chihanda cha hakachi cha mwaka, kanamusweke kuli kapela.