Joele 2:22 - MUKANDA USANDU WA ZAMBI 1975

²² Enu tushitu a mu yambu, kanda nwivwa woma, mumu kelo ja mu puya hijasokoloka, ni mitondo yinemi mihuko. Mutondo wa uva ni mukuyu yinahana tachi jayo.

Mukanda Wa Zambi 1970

²² Tushitu kanda nwivwa woma. Ulilo hiwasoka mwambu wa wisu; mitondo hiyema mihuko yayo, hikwabwa mihuko yinji ya mikuyu ni vinyu.

Joele 2:22 Iomraidhean Croise

Ubutukilo 4:12

Chize ku tangwa lia musono muze mulima ha mavu kechi kukwaha tachi jo. Kumukapwa mukwa kuchina kanda chendanganyi hano hashi.

Miaso (Masamu) 36:6

Ululi we wapwa ngwe milundu yisuku. Upatwilo we wapwa ngwe yimwe jondo yinene. Yena Yehova wakulamwina ni atu ni tushitu.

Miaso (Masamu) 65:12

Akusotokela ha kelo ja mu puya; milundu yeswe yalijika ni uwahililo.

Miaso (Masamu) 65:13

Kelo jazala ni yendo ya yimuna; yikulo yazala ni tiliku; yakulikwiza ni uwahililo nikwimba nawa.

Miaso (Masamu) 67:6

Mavu a hashi makema tachi jaho; ni Zambi, iye Zambi ya yetwene, matuwahisa.

Izaya 51:3

Mumu Yehova mawumbijeka Zaione; kumakawumbijeka yihela yenyi yeswe ya hululu, kumakapwisa puya yenyi ngwe Endene. Kango yenyi muyipwa ngwe munda wa Yehova. Mawana uwahililo ni chiseke muli iye, hamwe ni kusakwila ni liji lia miaso.

Ezekiel 36:30

Mungukalumbamisa mihuko ya mitondo ni mbuto ya mu minda; kunuchi kapinda nawa ni sau lia kapunga hakachi ka mavungu.

Ezekiel 36:35

Mba kumakamba ngwo, Chifuchi chino chapwile cha kwenyeka haliapwila hichalumuka ngwe munda wa Endene, ni yihunda yize ya kwenyeka, ya hululu, ya kupuzula, haliapwila yapwa ni atu, yapwa ya kukolesa.

Ezekiel 36:8

Alioze yenu milundu ya Izalele, munukasokesa mitango yenu nikwima mihuko yenu kuli atu jami A-Izalele; mumu nikawashi mahiluka ku mahio.

Yona 4:11

Mba kuchangutambile yami kuvwila keke Ninive, lie limbo linene, muze mwatwama kuhiana kulakaji lia tununu ni makumi aali a tununu a atu kanyingikine kutongola hakachi ka kwoko lio lia chindume ni kwoko lio lia chimeso, ni yimuna anji nawa nyi?

Hagai 2:16

ha kuheta umwe ku mulumba wa makumi aali a njongo ja mbuto, yawana kumi wika; muze umwe maya ku chikwachilo cha vinyu akachize makumi atano a misenge, mawana makumi aali wika.

Zakaria 8:12

Mumu kumukukapwa mbuto ya sambukila ni kuwaha; Mitondo ya uva muyikema mihuko, ni mavu makahana mbuto yako, ni malilu makahana mume wako, mba mungukayukisa masalila ja vungu lino ni yuma yino yeswe.

1 Korintu 3:7

Chocho, chipwe yoze wakutumba hi chimwe ko, chipwe yoze Wakuhinjila, ka; alioze Zambi yoze wakutatwisa.