Joele 2:12 - MUKANDA USANDU WA ZAMBI 1975

¹² Hindu chipwe haliapwila Yehova kanambe ngwenyi, Tewulukilenu kuli yami ni mbunge jenu jeswe, ni kulitwamina kulia, ni kulila, ni kulishimwoka.

Mukanda Wa Zambi 1970

¹² Mwene Zambi ngwenyi: “Chibwe chocho, alumukenu ku mbunge nuhiluke kuli yami nujile kulia, nulile ni kunenganyana.

Joele 2:12 Iomraidhean Croise

2 Samuel 24:10

Alioze muze hanalula atu mbunge ya David yiyimuhisa. David yamba kuli Yehova ngwenyi, Hinavulumuna chikolo ha kulinga chuma chino, alioze haliapwila ngunalembe, Yehova, Chiza uhenge wa yami kavumbi ke, mumu nalinga ni uhepuke wunji.

2 Sango Ja Mianangana 30:6

Kashika mikeji yaya ni mikanda ya mwanangana ni alemu jenyi, ndusu Izalele ni Yunda mweswe. Yatwala liji lia mwanangana ngwenyi, Enu A-Izalele hilukenu kuli Yehova, Zambi ya Apalahama, ni Izake, ni Izalele, hanga iye nawa akahiluke kuli yenu nwasala nwapuluka ku kwoko lia mianangana ja Asuria.

2 Sango Ja Mianangana 6:27

hipanjika yena mwilu ukakonekene mutonga wa tuvumbi twe, ni wa atu je A-Izalele, muze mukaalongesa jila yipema yize chaatamba kwendelamo; utume vula ha chifuchi che chize hiwahana chikapwe chihinga cha atu je.

Estere 4:16

Yako ukungulule A-Yunda eswe a mu Shushane alitwamine kulia hali yami. Kanda alia, kanda anwa matangwa atatu chipwe ufuku chipwe mwalwa. Ni yami ni tuvumbi twami twa mapwo mutulitwamina kulia chizechene mba chocho mungunjila kuli mwanangana. Acho kuchalitele ni shimbi, alioze nyi mungufwa, mungufwa, kwahwa.

Kutuhuka 33:5

Yehova yamba kuli Mose ngwenyi, Ambulwila A-Izalele ngwe, Nuli akwa pami, kachi mungukanduka hakachi kenu ha shimbu likepe kachi mungukanwonwona lume. Kashika haliapwila Chizenu yuma yenu ya uhenya hanga ngunyingike chize mungulinga ni yenu.

Izaya 22:12

Ha tangwa lize Mwene Yehova-wa-Tujita yatambika mutambi wa kulila ni kulishimwoka, ni kulitewula ni kuzala chikeleyi;

Izaya 58:4

Nwakulitwamina kulia hanga nukazwele ni kulitachika, ni kulamba ni kome ya ungulungulu. Kulitwamina kulia chino nwakulinga musono kuchichi kuhetesa liji lienu mwilu.

Jeremia 3:22

Enu ana a mafwefwe hilukenu, mba munguwuka mafwefwe jenu. Tuneza kuli yena mumu uli Yehova Zambi yetu.

Jeremia 36:7

Hanji kulemba cho muchikaheta kumeso ja Yehova, mba mutu mweswe makatuka ku ndako jenyi jipi, mumu utenu ni ufwatulo Yehova hanavuluka kulimika ni wano atu, unene.

Jeremia 4:1

Yehova kanambe ngwenyi, Ena Izalele, nyi muhiluka chatamba kuhiluka kuli yami. Nyi muchiza yizelwokeso ye kumeso jami nikukakashana ka;

Jeremia 4:2

nyi munulishinga ngwenu, Ni mwono wa Yehova ni umwenemwene, ni kulita, ni ululi mba mavungu maliwahisa muli iye, ni muli iye nawa malisamba.

Ezekiel 33:11

Amba kuli ayo ngwe, Mwene Yehova kanambe ngwenyi, Ni mwono wami, chevwile kuwaha ni kufwa cha chingulungulu. Ngunazange chingulungulu ahichike ndako jenyi atwame ni mwono. Alumukenu! Alumukenu! Katukenu ku ndako jenu jipi. Kuchi te nunazange kufwa, enu akwa munyachi wa Izalele?

Daniel 9:3

Mba natalikishile meso jami kuli Mwene Zambi kumufupa ha kulemba ni kuliumba hamwe ni kulitwamina kulia ni yikeleyi ni uto.

Hosea 12:6

Chocho yena, ku tachi ja Zambi ye, hiluka, lalaminya ku zango ni upatwilo wa kulita; mba matangwa eswe twaminyina Zambi ye.

Hosea 12:7

Aye kapwa mukwa kusepa wa mbalansa ja kwonga, kakuzanga kupinjisa.

Hosea 14:1

Enu A-Izalele, hilukenu kuli Yehova Zambi yenu, mumu hinwalimbuka ha mukunda wa uhenge wenu.

Hosea 6:1

Tatuyenu tukahiluke kuli Yehova, mumu iye hatupapulula, mba iye matuwuka. Iye hatulamba, mba iye matukasakasa.

Joele 1:13

Enu asasendote, lijikenu yikeleyi nukalinyenge. Enu tuvumbi twa chilumbilo, lilenu mbimbi. Enu tuvumbi twa Zambi yami, tweyenu nukapombe ufuku weswe mu yikeleyi, mumu mulambu wa wunga ni mulambu wa kunwa hanayimina mu zuwo lia Zambi yenu.

Zakaria 7:3

akahule asasendote a zuwo Iia Yehova-wa-Tujita ni aprofeta ngwenyi, Changutamba kulinyenga ni kulitwamina kulia ha kakweji wamuchitano chizechene ngwe nakulinga miaka yino yinji nyi ka?

Zakaria 7:5

Amba kuli atu eswe a mu chifuchi hamwe ni asasendote ngwenu, Ha kulitwamina kulia ni kulinyenga ha kakweji wamuchitano ni wamuchishimbiali, miaka yino makumi shimbiali, te yami nunachilingila?

Malaki 1:9

Esekenu kwita vumbi lia Zambi hanga alinge ni vumbi kuli yetu! Yehova-wa-Tujita kanambe ngwenyi, Nyi mutu mambata mu kwoko lienyi mulambu ngwe yino, te mapwa ni vumbi kuli umwe?

Yilinga 26:20

Alioze nambujolele hatangu kuli waze mu Ndamaseku, ni mu Yerusaleme, ni ku chifuchi cheswe cha Yundeya, ni kuli akwa mavungu, ngwe chaatamba kulikonyeka, akatewulukile kuli Zambi, akalinge yitanga ya kulita ni kulikonyeka.

Akwa Kuyula 2:4

Muze mungelo wa Yehova hamba maliji wano kuli A-Izalele eswe, alilile ni liji linene.

Akwa Kuyula 20:26

Mba A-Izalele eswe, e tujita eswe, yakanduka ku Mbetele mukulila. Yatwamako kumeso ja Yehova, ni kulia ka ndo ngoloshi. Yalambula milambu ya kulumba, ni milambu ya sambukila kumeso ja Yehova.

1 Samuel 7:3

Samuel yamba kuli A-Izalele eswe ngwenyi, Nyi nunahilukila Yehova ni mbunge jenu jeswe katwisenu hakachi kenu mazambi eka ni Asatarote nukatalikise mbunge jenu kuli Yehova nikumulingila iye wika. Mba kumakanupulula kuli A-Filistea.

1 Samuel 7:6

O yakungulukila ku Mizepa. Yataha meya; yaazujila hashi kumeso ja Yehova nikulitwamina kulia tangwa lize, nikwambako ngwo, Hitwavulumuna Yehova. Samuel wayulile A-Izalele ku Mizepa.