Jeremia 42:10 - MUKANDA USANDU WA ZAMBI 1975

¹⁰ Nyi munutwama mu chifuchi chino mba mungunutungisa, chichi kunupuzula; mungunutumba, chichi kunutukula, mumu ngunalikonyeka ha chuma chize chikalu nanulingile.

Mukanda Wa Zambi 1970

¹⁰ ‘Nyi nunazange kutwama mu chifuchi chino, mungunutakamisa, chichi kunumwanga; mungunukolesa, chichi kunumwesa lamba. Mumu kufwa chize nanushihile chinanguvwisa chinyengo kuhiana.

Jeremia 42:10 Iomraidhean Croise

2 Samuel 24:16

Alioze muze mungelo wolwele kwoko lienyi ku Yerusaleme achonwone, Yehova walikonyekene ha chuma chino chikalu. Yamba kuli mungelo yoze te unonwona atu ngwenyi, Kunahu. Kokolola kwoko lie. Mungelo wa Yehova achili te ku chizungwilo cha Arauna wa ku Yepushe.

Miaso (Masamu) 102:16

Mumu Yehova hanatungu Zaione. Hanasoloka mu ulemu wenyi.

Miaso (Masamu) 106:45

Wewulukile usendo wenyi mumu hali ayo. Walikonyekene nikulita ni kulumbama cha utu wa zango lienyi.

Miaso (Masamu) 37:3

Fuliela Yehova, ulinge yipema. Chocho mukatwama mu chifuchi; chamwenemwene makakulisa.

Miaso (Masamu) 69:35

Mumu Zambi kumakalamwina Zaione; kumakatunga membo a mu Yunda; kumakatwamamo, kumakachihinga.

Kutuhuka 32:14

Mba Yehova walikonyekene ha yipi yize ambile ngwenyi, Munguyilinga kuli atu jami.

Jeremia 24:6

Mungusa meso jami hali ayo ngukaalinge yipema. Mungwahilwisa nawa ku chifuchi chino, mungwatungisa, chichi kwapuzula nawa; mungwatumba chichi kwatukula.

Jeremia 26:19

Te Hezekia mwanangana wa Yunda ni atu ja A-Yunda yamushiha nyi? Kevwile woma wa Yehova nikulembelela kuli Yehova, mba Yehova yalikonyeka ha kutwala ku yuma yikalu yize hahanjika hali ayo? Alioze yetu tunambe kulikokela yuma yikalu chikolo.

Jeremia 27:11

Alioze akwa vungu lieswe waze mazeyesa makota jo kushi lia kanga ya mwanangana wa Babilonia ni kumulingila, mungwahichika mu chifuchi cho ene akalimemo ni kutwamamo. Chocho kanambe Yehova.

Jeremia 31:28

Mba chizechene ngwe hinaatala kutukula, ni kupuzula, ni kununguna, ni kwonwona, ni kukoka yuma yikalu, chocho mungwatala kutunga ni kutumba. Chocho kanambe Yehova.

Jeremia 33:7

Mungukahilwisa kuwaha cha Yunda ni kuwaha cha Izalele, nikwatunga nawa chize apwile hatangu.

Jeremia 43:4

Chocho Johanane mwana Karea, ni tusongo eswe a maswalale, ni e atu eswe kononokene ku liji lia Yehova, akatwame mu chifuchi cha Yunda.

Ezekiel 36:36

Henaho mavungu aze asala ha kunujingilika makanyingika yami Yehova hinatungulula yihela ya kupuzula, hinatumba nawa kuze kwapwile kwa kwenyeka. Yami Yehova hinachamba, mba mungukachilinga.

Hosea 11:8

Ena Eframe, kuchi munguhasa kukwecha? Ena Izalele, kuchi munguhasa kukukunjika? Kuchi munguhasa kukupwisa ngwe Andama? Kuchi mungukulinga ngwe Zepoime? Mbunge yami kuyatayile muchima; keke yami yinaliwezela chivukuminya ni vumbi.

Joele 2:13

Sonyenu mbunge jenu, hi mazalo jenu ko. Tewulukilenu kuli Yehova Zambi yenu, mumu iye mukwa vumbi, wa tò ni keke, makoke kutenuka, mukwa kulumbamisa utu wa zango, kakulikonyeka ha chuma chikalu.

Amose 7:3

Mba Yehova yalikonyeka ha chuma chino. Yehova yamba ngwenyi, Kuchichi kupwa.

Amose 7:6

Mba Yehova yalikonyeka ha chuma chino. Mwene Yehova yamba ngwenyi, Chino nawa kuchichi kupwa.

Yona 3:10

Zambi yamona yitanga yo, ngwenyi, Kanakatuka ku ndako jo jipi. Mba Zambi yalikonyeka ha che chuma chikalu chize ambile kwalinga. Kachilingile.

Yona 3:4

Yona yaputuka kunjila mu limbo kwenda cha tangwa limuwika, nikukololoka ngwenyi, Kwasala makumi awana a matangwa mba manunguna Ninive.

Yona 4:2

Yalemba kuli Yehova ngwenyi, Yehova, ngunalembe kuli yena, te chambile chino chene shimbu te nguchili mu chifuchi chami nyi? Kashika naliangile kuchinyina ku Tashi, mumu nanyingikine ngwami, Uli Zambi ya vumbi, wa tò ni keke, makoke kutenuka, mukwa kulumbamisa utu wa zango, kuwakulikonyeka ha chuma chikalu.

Yilinga 15:16

Kulutwe lia yino yuma mungukahiluka, mungukatungulula mbalaka ya David yize hiyinapuzuka; mungukatungulula yikulu yayo, mungukayimika:

Shimbi 32:36

Mumu Yehova makasambisa atu jenyi. Makavwila keke tuvumbi twenyi muze mamona tachi jo hijahwa mba niumwe wasala, apwe ndungo, apwe mwene.

Akwa Kuyula 2:18

Muze Yehova waahele mukwa kwayula, Yehova wapwile hamwe ni mwe mukwa kwayula, nikwalamwina ku kwoko Ha akwa kole jo matangwa eswe a mwe mukwa kwayula, mumu chavwishile Yehova keke kwivwa mikuma yize atwile mumu hali waze aapinjishile nikwahungumiona.