Jeremia 32:23 - MUKANDA USANDU WA ZAMBI 1975

²³ O yanjila yachizuka, alioze kononokene ku liji lie, chipwe kwenda nikulita ni shimbi ye. Kalingile nichimwe cha yize waatumine yena. Kashika waatumine yikalu yino yeswe kuli ayo.

Mukanda Wa Zambi 1970

²³ Alioze muze haanjila mo, haachizuka, kononokene ko ku Shimbi je hanji kufunga longeso lie; kaalingile ko nichimwe cha yuma yize waalwezele. Kashika yiwaamwesa lamba lino lieswe.

Jeremia 32:23 Iomraidhean Croise

Ezra 9:7

Chize ku matangwa ja tulamba hitwahia pundu ndo musono; mba ha uhenge wetu, yetu ni mianangana jetu, ni asasendote jetu, hanatukunjika ku moko ja mianangana ja yifuchi ku katana, ni ku ufunge, ni kutupupa, ni kutuhepwisa chize chapwa musono

Nehemia 9:15

Mwilu waatumine mbolo ha zala yo; ku liwe waachijile meya ha pwila yo. Waatumine anjile nikutambula chifuchi chize yena hiwalishinga kwaaha.

Miaso (Masamu) 78:10

Kafungile usendo wa Zambi. Kasolo kwenda mu shimbi jenyi.

Jeremia 2:7

Nanunehene ndo mu chifuchi cha kulumbama cheswe hanga nukayuke ni mihuko yamo ni yuma yamo yipema. Alioze muze nwanjilile nwachishile chifuchi chami, ni kupwisa chihinga chami chuma cha lwaji.

Jeremia 26:4

Muwamba kuli ayo ngwe, Yehova kanambe ngwenyi, Nyi kunuchi kupanjika kuli yami nukende mu shimbi yami yize ngunase kumeso jenu

Jeremia 44:10

Kalikehesele ndo ku tangwa lino lia musono, chipwe kwivwa woma, chipwe kwenda nikulita ni shimbi jami hanji yiyulo yami yize nasele kumeso jenu ni kumeso ja tulamba twenu.

Jeremia 7:26

hindu kapanjikile kuli yami, chipwe kutela matwi, alioze akalishile makota jo nikuhiana tulamba two kulinga chipi.

Lungungu 1:18

Yehova kanasambe, mumu nakolemene liji lienyi; alioze ivwenu enu mavungu eswe nukamone yikola yami. Anami a mapwo ni akweze jami hanayi funge.

Lungungu 1:8

Yerusaleme wavulumwine chikolo kashika walichishile. Waze eswe amulemesene haliapwila kanamulelesa mumu hamona uselesele wenyi. Ewa iye mwene kanatu mikuma ni kufuka meso jenyi.

Ezekiel 20:18

Yingwamba kuli ana jo mu puya ngwami, Kanda nwenda mu yiyulo ya tulamba twenu, chipwe kufunga shimbi jo, chipwe kulichisa ni mahamba jo.

Ezekiel 20:21

Alioze ana yangukatukila, kendele mu yiyulo yami, katalile kanawa kufunga shimbi jami jize atu kakutwama ni mwono ha kujifunga. Ajilwile masambata jami. Yingunyonga kwazukwila ufwatulo wami ni kuhwisa utenu wami hali ayo mu puya.

Ezekiel 20:8

Alioze yangukatukila, kasolo kungupanjika. Niumwe mutu kambilile yuma yize ya lwaji kayipalikilile meso jenyi, chipwe kwehuka mahamba ja Engitu. Yingu nyonga ngwami, Munguzukula ufwatulo wami hali ayo ni kuhwisa utenu wami hali ayo hakachi ka chifuchi cha Engitu.

Luka 17:10

Chizechene yenu nawa, muze hinwalinga yuma yize yeswe ananwambe, nukambe ngwenu, Tuli ndungo amokomoko; hitwalinga wika chize yapwa milimo yetu.

Yoano 15:14

Yenu nuli tusendo twami, kachi munulinga cheswacho mungunwamba.

Galashia 3:10

Mumu waze eswe a ku yitanga ya shimbi, kushi lia shingo ali: mumu chinasonewa ngwo, Kashingiwa mweswe keshi kunyongonona mu yuma yize yeswe yinasonewa mu mukanda wa shimbi mukuyilinga.

Tiangu (Jake) 2:10

Mumu mweswe mafunga shimbi jeswe lukombo, hindu matangula chihanda chimuwika, hahia ha jeswe.

Yoshua 21:43

Chocho Yehova wahanyine kuli A-Izalele chifuchi chize cheswe alishingile kuhana kuli tulamba two, mba muze hachizuka achitungile.

Yoshua 23:16

Nyi munutangula usendo wa Yehova Zambi yenu uze hanwamba, nukaye nikulingila mazambi akwo nikufukama kuli ayo, mba utenu wa Yehova muukalekwoka kulimika ni yenu nukanonge lume washi ha chifuchi chipema hanwaha.