Jeremia 20:9 - MUKANDA USANDU WA ZAMBI 1975

⁹ Nyi mungwamba ngwami, Chichi kumuvuluka, chichi kutongola jina lienyi nawa, mu mbunge yami mwapwa ngwe kahia ka kulengenya ka kukashila mu yifwaha yami. Yikatalo ngunevu ya kusúla nako; Chahashile.

Mukanda Wa Zambi 1970

⁹ Muze nakwamba ngwami: “Munguvulama Mwene Zambi, chichi kwambujola nawa mu jina lienyi,” maliji je kaakubwa ngwe kahia kaze kanangwocho mu mbunge. Nakweseka kulihumikiza, alioze Chishi kuhasa.

Jeremia 20:9 Iomraidhean Croise

Miaso (Masamu) 39:3

Mbunge yami yasasaminyine muchima. Shimbu napukwine kahia kalengenyene, mba nahanjikile ni limi liami ngwami,

Jeremia 23:29

Yehova kanambe ngwenyi, Liji liami linapu ngwe kahia, ngwe muhato wa kupatula mawe tuyipalupalu.

Jeremia 23:9

Ha kutwala kuli aprofeta: Mbunge yami hiyafwa muchima, yifwaha yami yeswe yinachikima. Ngunapu ngwe umwe unazengewa, ngwe yoze vinyu hiyamukumba, mumu hali Yehova ni ha maliji jenyi asandu.

Jeremia 4:19

Mbunge yamie—mbunge yamie— ngunalifwichi ni yikola. Mama yami—mbungeie— Mbunge yami yinalipupula; Chahashile kuhwima mumu ngunevu liji lia chitavwi, we mutambi wa jita.

Jeremia 6:11

Kashika kunazala ni ufwatulo wa Yehova, janguhwa ni kusúla. Uuzukule hali ana ha tapalo, ni ha mbunga ja akweze nawa. Ni pwo ni lunga maambata, ni makulwana ni tushinakaji.

Ezekiel 3:14

Spiritu yanguzundula, yangumbata; yinguya ni kusasa ni kusasaminya cha spiritu yami mumu kwoko lia Yehova te lili hali yami ni tachi.

Ezekiel 3:3

Aye yamba kuli yami ngwenyi, Mwana mutu, liako mukanda uno ngunakwehe ukakute nawo. Yinguulia, yiupwa mu kanwa liami uyema ngwe wuchi.

Amose 3:8

Ndumba hahiohia, iya kechi kwivwa woma? Mwene Yehova hanahanjika, iya mahasa kuhola ni uprofeto?

Yona 1:2

Katuka uye ku Ninive, lie limbo linene, ukakololoke kuli ayo, mumu ungulungulu wo hiunahete kuli yami.

Yona 1:3

Alioze Yona yakatuka akachine kumeso ja Yehova, akaye ku Tashi. Yaya ku Yopa, yawana wato unayi ku Tashi. Chocho yafweta ndando ya kwendelamo, yanjilamo akaye hamuwika no ku Tashi akachine kumeso ja Yehova.

Luka 9:62

Yesu wambile kuli iye ngwenyi, Niumwe se hanase kwoko henyi ku sharua, nyi matala kunyima, matela wanangana wa Zambi.

Yilinga 17:16

Alioze shimbu Paulu aatachile mu Atene, Spiritu yenyi yakasumukine muli iye, ha kumona limbo lia tò ni mahamba.

Yilinga 18:5

Muze Saila ni Timoteu apalumukine ku Masendoniya, lie liji lialemene Paulu, nikushindakenya chikolo ni mbunge yeswe kuli A-Yunda, ngwenyi, Yesu iye mwe Kristu.

Yilinga 4:20

mumu yetu kutwahashile shina kuhanjika yuma yize twamwene, twevwile.