Jeremia 1:8 - MUKANDA USANDU WA ZAMBI 1975

⁸ Kanda wavwila woma mumu kunguli hamwe ni yena kukupulula. Chocho kanambe Yehova.

Mukanda Wa Zambi 1970

⁸ Kanda weevwila woma, mumu mungukabwa hamwe ni yena ni kukufunga. Yami Mwene Zambi nachamba!”

Jeremia 1:8 Iomraidhean Croise

Kutuhuka 3:12

Zambi yamba ngwenyi, Chamwenemwene kumungukapwa ni yena. Chino chinyingi muchipwa kuli yena cha kukulweza te yami ngunakutumu ngwami, Muze mukachiza e atu ku Engitu, munukavumbika Zambi ha mulundu uno.

Izaya 43:2

Ha kupalika mu meya mungukapwa hamwe ni yena, ndusu mu njiji, kujichi kakukumba. Ha kwenda mu kahia kuchi kawema; mulengi wako kuuchi kakulalisa.

Izaya 51:12

Yami, yami mwene nakunuwumbijeka; kuchi nwapwa nukavwile woma mutu mukwa kufwa, hanji umwe mwana mutu hamupwisa ngwe mwambu?

Izaya 51:7

Panjikenu kuli yami, yenu nwanyingika ululi, enu atu nuli ni shimbi jami mu mbunge. Kanda nuvwila woma luchoko wa atu, kutukana cho kanda chinushima.

Jeremia 1:17

Alioze ena, jichika muya we; katuka ukambe kuli ayo yeswe mungukutumina. Kanda wavwila woma, kuchina mungukuvwisa woma kumeso jo.

Jeremia 1:19

Kumakasa jita ni yena; alioze kechi kakukumba, mumu yami nguli hamwe ni yena kukupulula. Chocho kanambe Yehova.

Jeremia 20:11

Alioze Yehova kwali hamwe ni yami ngwe kajita wa kukolesa woma. Kashika akwa kunguhungumiona malimbuka kechi kangukumba. Makevwa sonyi jinji mumu kechi kuhasa kumanununa. Kusauka cho cha mutolo kechi kuchivulama nilimwe tangwa.

Jeremia 30:11

Mumu Yehova kanambe ngwenyi, Yami kunguli hamwe ni yena kukulamwina. Mungumanununa liakulu mavungu eswe kuze hinakumwangina, alioze chichi kakumanununa yena. Mungukufwetesa ni kulita; chichi katá kukuhichika ni kastigu yakuhi.

Jeremia 39:11

Nabukanezore mwanangana wa Babilonia yahana chiyulo kuli Nabuzaradane kapitau ka tulayi ha kutwala kuli Jeremia ngwenyi,

Jeremia 42:11

Kanda nuvwila woma mwanangana wa Babilonia, yoze nwakumuvwila woma. Yehova kanambe ngwenyi, Kanda numuvwila woma mumu yami nguli hamwe ni yenu kunulamwina ni kunupulula kuli iye.

Daniel 3:17

Nyi chapwa chocho, Zambi yetu yoze twakulingila mahasa kutupulula ku lutengo wa kahia ka kulengenya, mba kumakatupulula ku kwoko lia yenu mwanangana nawa.

Daniel 3:25

Aye yamba ngwenyi, Alioze ngunamono malunga awana keshi kukasa, kanende mwe muchima lia kahia. Kevwile yikola, ni kusoloka cha wamuchiwana chapwa ngwe umwe mwana zambi.

Mateu 10:26

Kanda nukaavwila woma kashika: mumu chuma cha kufuka chize kuchichi katukuka chakuhi, nichimwe; mba kukushi chimwe chuma cha kuswama chize kechi kachinyingika, nichimwe.

Mateu 28:20

nikwalongesa kufunga yuma yize yeswe nanuhele shimbi: nyingikenu, yami kunguli hamuwika ni yenu matangwa eswe ndo kumanunuka cha mwaka. Amene.

Yilinga 18:10

mumu nguli hamwe ni yena, ni mutu niumwe kechi kakukwata mukukulinga chipi: mumu atu anji nguli no mu limbo lino.

Yilinga 26:17

mungukupulula kuli atu ni kuli akwa mavungu, kuli ayo haliapwila ngunakutumu.

Yilinga 4:13

Muze amwene hamu lia Petulu ni Yoano, kananyingika apwile atu waze kaalongesele, kajamine ku masona, akomokene; o aasele chinyingi ngwo, Wano apwile hamwe ni Yesu.

Yilinga 4:29

Haliapwila, Mwene, tala kama kwomisa cho: hana kama kuli ndungo je akahanjike liji lie ni hamu lieswe,

Efesu 6:20

ha liyo nguli kanganda mu malenge; hanga ngukahanjike ni hamu, chizechene ngwe changutamba kuhanjika.

Shimbi 31:6

Takamenu, hamukenu, kanda nwivwa woma, kanda nususamiana mumu hali ayo, mumu Yehova Zambi yenu iye kanayi hamwe ni yenu; kechi kanuhichika, chipwe kunwehuka, ka.

Shimbi 31:8

Yehova, iye kanayi kumeso je, kumakapwa hamwe ni yena; kechi kakuhichika, chipwe kukwehuka, ka; kanda wivwa woma, chipwe mwongo, ka.

Yoshua 1:5

Niumwe mahasa kulimika ni yena matangwa eswe a mwono we. Chizechene ngwe napwile ni Mose chocho mungupwa ni yena. Chichi kukuhichika hanji kukwehuka.

Yoshua 1:9

Te chakutumine nyi? Takama; hamuka; kanda wivwa woma hanji mwongo, mumu Yehova Zambi ye hwali hamwe ni yena kweswako muoya.