Hosea 2:18 - MUKANDA USANDU WA ZAMBI 1975

¹⁸ Ha tangwa lize mungukakukolesela usendo ni tushitu a mu yambu, ni tujila a mu tetela, ni tututu a hashi. Mungukamakuna mu chifuchi, mata, ni tutana, ni jita. Mungukakupombesa kuze chipi chakuhi.

Mukanda Wa Zambi 1970

¹⁸ Ha tangwa lize mungukakolesa Usendo ni tushitu eswe a mu yambu ni tujila. Ha chino keechi kaalemeka nawa atu jami. Mungukachiza yitwa yeswe ya jita mu chifuchi. Mikwale, ni mata akwasa kuyichi kabwa ko nawa. Mba mungukatayiza atu jami kutwama kanawa mu chifuchi.

Hosea 2:18 Iomraidhean Croise

Jobe 5:22

Ha kwonwona ni kapunga mukaseha; kuchi kwivwa woma wa ngongo ja hashi.

Jobe 5:23

Chipwe mawe a mu yambu mapwa tusendo twe; ni ngongo ja mu yambu mapwa ni sambukila kuli yena.

Miaso (Masamu) 148:10

Ni tushitu, ni yimuna, ni tututu a kukalala, ni tujila a kuhumuka.

Miaso (Masamu) 23:2

Kakungupombesa muma mwa kelo; kakungutwala mu sesa lia meya a uhwimino.

Miaso (Masamu) 46:9

Hamanununa jita ndo ku songo lia hashi; kakumakuna uta; kakupatula kunga hakachi; kakwocha ni kahia matemba a jita.

Izaya 2:11

Kumakalelesa meso ja atu a kulizata; kulengumuka cha atu kumakanunguna; Yehova wika kumakanangama ha tangwa lize.

Izaya 2:17

Kumakanunguna kulizata cheswe cha atu; kumakalelesa kulengumuka cheswe cha atu; Yehova wika kumakanangama ha tangwa lize.

Izaya 2:4

Iye makapatwila mavungu, makasela yiyulo hali minyachi yinji. O makalumuna tutana two akapwe yikungo ya sharua, makalumuna makunga jo akapwe poko ja kululika mitondo ya mihuko. Akwa vungu limwe kechi kasa jita ya katana ni akwa vungu likwo; kechi kalilongesa nawa kwasa jita.

Izaya 26:1

Ha tangwa lize kumakemba mwaso uno mu chifuchi cha Yunda ngwo, chihunda cha tachi tuli nacho; iye kakumika ulamwino ngwe yipanga-ya-mawe ni yipanga ya kukolesa.

Izaya 32:18

Atu jami makatwama muma mwa sambukila, mu mazuwo keshi woma, mu yihela ya kuhwima ni kuhola.

Izaya 54:5

Mumu Tangi ye iye lunga lie, jina lienyi Yehova-wa-Tujita. Musandu wa Izalele iye Mukwa-Kukukula, kakumutongola ngwo, Zambi ya hashi heswe.

Izaya 65:25

Kangunga ni mwana-panga makalia hamuwika, ndumba makalia mwambu ngwe ngombe. Fufuta muyikapwa kulia cha lunoka. Kechi kavwisa yikola hanji kwenyeka mweswe mu mulundu wami usandu. Chocho kanambe Yehova.

Jeremia 23:6

Ha matangwa jenyi malamwina Yunda, ni Izalele matwama ni sambukila. Jina lize mamwaha ngwo, Yehova ululi wetu.

Jeremia 30:10

Kashika Yehova kanambe ngwenyi, Kanda wivwa woma, yena Yakomba kavumbi kami, ni yena Izalele kanda ulishimwoka, mumu mungukakulamwina chipwe kusuku. Mungukalamwina ana je ku chifuchi cha ufunge wo. Yakomba makahiluka ni kuhola ni kuhwima, niumwe mamukolesa woma.

Jeremia 33:16

Ha matangwa aze A-Yunda makaalamwina ni Yerusaleme matwama ni sambukila. Jina liako mulikapwa—Yehova ululi wetu.

Ezekiel 34:25

Mungukakolesa no usendo wa sambukila. Mungukahuma tushitu eswe asasu mu chifuchi, mba mahasa kutwama mu puya ni kupomba mu musenge ni chipi chakuhi.

Ezekiel 39:1

Ni yena mwana mutu, profeteza kulimika ni Ngoke wambe ngwe, Mwene Yehova kanambe ngwenyi, Kunalimika ni yena Ngoke mwe mulemu mukwa lutwe wa Mesheke ni Tupale,

Zakaria 14:4

Ha tangwa lize yiliato yenyi muyikamana ha mulundu wa Olevwe uze uli kulutwe lia Yerusaleme sali lia ku Chivumbuko. Mulundu wa Olevwe muukapulika yihanda yiali chize ku sali lia Chivumbuko ndo ku sali lia Chitokelo ngwe mungulunga unene chikolo, chocho chihanda chimuwika cha mulundu muchisetuka ku Norte ni chihanda chikwo ku Sule.

Zakaria 14:9

Yehova makeza kupwa mwanangana wa hashi heswe. Ha tangwa lize Yehova makapwa umuwika ni jina lienyi limuwika.

Zakaria 2:11

Mavungu anji malifutula ni Yehova ha tangwa lize nikwalumuka akapwe atu jami. Mba mungutwama hakachi kenu. Ni yenu mununyingika Yehova-wa-Tujita wangutumine kuli yenu.

Zakaria 3:10

Yehova-wa-Tujita kanambe ngwenyi, Ha tangwa lize yenu eswe, mutu ni mutu, makalakenya mwenyembo kutwama mushi lia mutondo wenyi wa uva ni wa mukuyu.

Zakaria 9:10

Temba lia jita mungukaliteta ku Eframe; kavwalu wa jita mungukamuteta ku Yerusaleme. Uta wa jita makautetako, mba iye kumakatumina sambukila ku mavungu. Chiyulo chenyi muchikapwa chize ku kalunga-lwiji ndo ku kalunga-lwiji; chize ku Lwiji ndo ku masongo a hashi.