Hosea 11:3 - MUKANDA USANDU WA ZAMBI 1975

³ Chipwe chocho yami mwene nalongesele Eframe kwenda. Naakangayikine mu moko jami hindu kanyingikine yami naawukile.

Mukanda Wa Zambi 1970

³ Hindu yami mwene nalongesele Israele kwenda. Yingukwata atu jami ku moko, yingweendesa, alioze kaatayijile ko ngwo, yami nakwafunga.

Hosea 11:3 Iomraidhean Croise

Miaso (Masamu) 107:20

Iye matuma liji lienyi nikwawuka, nikwapulula ku mawumbu a kwonwona.

Kutuhuka 15:26

Yamba ngwenyi, Kachi yenu munuhalakana pundu ku liji lia Yehova Zambi yenu, nikulinga chize chinate ku meso jenyi, nikupanjika ku maliji jenyi a shimbi, nikufunga yiyulo yenyi yeswe, kachi chichi kusa hali yenu kuyiza nichimwe nasele hali A-Engitu, mumu Yami Yehova, mukwa kunuwuka.

Kutuhuka 19:4

Nwamwene chize nalingile kuli A-Engitu, ngwe yami nanumbachile ha mapulwa ja pupa nikunuhetesa kuli yami mwene.

Kutuhuka 23:25

Nukavumbike Yehova Zambi yenu. Iye kumakawahisa kulia chenu ni meya jenu. Kumungukachiza kuyiza hakachi kenu.

Izaya 1:2

Malilu, panjikenu. Hashi, neha matwi je. Mumu Yehova hanahanjika. Hinalela ana ni kwahoka, alioze hanangukatukila.

Izaya 30:26

Chikwo nawa pangu lia kakweji mulikapwa ngwe pangu lia tangwa, ni pangu lia tangwa mulikaliwezela tachi yisuho shimbiali, ngwe pangu lia matangwa shimbiali ha tangwa lize Yehova majichika chilonda cha atu jenyi ni kuwuka mbandu jize iye waatwile ni kwoko lienyi.

Izaya 46:3

Enu akwa munyachi wa Yakomba, eswe nwalisalaho ku munyachi wa Izalele, panjikenu kuli yami. Hinanumbata chize ku kusemuka chenu, hinanuzundula chize ku jimo.

Izaya 63:9

Mu huli lio lieswe iye wamwene huli, mba mungelo wa kumeso jenyi waalamwinyine. Ni zango lienyi ni keke yenyi waakulile; waazundwile, waambachile matangwa eswe a shakulu.

Jeremia 30:17

Mumu Yehova kanambe ngwenyi, Mungukwaha nawa kuhinduka che; munguwuka mbandu je, mumu hakwamba ngwe uli wa kumbila, ngwo, Mwe Zaione niumwe kanamuse mbunge.

Jeremia 8:22

Yitumbo yakuhi mu Ngiliate? Mbuki wakuhiko? Mba kuchi te kawukile mwana wa pwo atu jami ahinduke?

Hosea 14:4

Mungukawuka kukokoloka cho; mungukaazanga liakulu, mumu utenu wami hiwatewuluka kuli ayo.

Hosea 2:8

Kanyingikine, yami namuhele mbuto, ni vinyu, ni maji, nikumwaha prata ni oru ya kulumbama, yize o alingilile nayo Mbale.

Hosea 7:1

Muze munguhilwisa kuwaha cha atu jami, muze munguwuka Izalele, uhenge wa Eframe unasoloka ni yitanga ya ungulungulu ya Samaria; mumu kakulinga ni mahuza; eji kakulokola mazuwo, ni yingumba kakupupa mu majila.

Hosea 7:15

Chipwe naalongesele ni kutakamisa moko jo hindu kakutaka yipi ya kulimika ni yami.

Yilinga 13:18

Ha shimbu ngwe makumi awana a miaka walihumikijine ni ndako jo.

Shimbi 1:31

Ni mu puya, nwamwenemo ngwe Yehova Zambi yenu anumbachile ngwe lunga mambata mwanenyi, mu jila yeswe nwayilemo, ndo nwejile kuno.

Shimbi 33:27

Zambi ya mutolo iye chiswamo che mba kushi kwatwama moko a mutolo. Iye makahuma akwa kole kumeso je mamba ngwenyi, Aonwonenu.

Shimbi 8:2

Iwulukenu jila yeswe anusongwelele kuli Yehova Zambi yenu makumi aze awana a miaka mu puya, hanga anulelese, anweseke, anyingike chize chapwile mu mbunge jenu, shina munufunga maliji jenyi a shimbi, nyi ka.