Amose 7:3 - MUKANDA USANDU WA ZAMBI 1975

³ Mba Yehova yalikonyeka ha chuma chino. Yehova yamba ngwenyi, Kuchichi kupwa.

Mukanda Wa Zambi 1970

³ Mba Mwene Zambi yalumuna manyonga jenyi, yamba ngwenyi: “Chuma chize hiwamona, kuchichi kubwa ko.”

Amose 7:3 Iomraidhean Croise

Ubutukilo 6:7

Kashika Yehova yamba ngwenyi, Atu ano natangile mungwanongesa hashi; ni atu, ni tushitu, ni tututu, ni tujila a mu tetela, mumu hichangukonyekesa chize naatangile.

1 Sango Ja Mianangana 21:15

Zambi yatuma umwe mungelo ku Yerusaleme akayonwone. Mba muze himayonwona, Yehova yatala, yalikonyeka ha chuma chino chikalu, mba yamba kuli mungelo chonwonyi ngwenyi, Kunahu! Kanda uweza nawa kwoko lie. Mungelo wa Yehova te kanamana ku chizungwilo cha Ka-Yepushe Ornane.

Miaso (Masamu) 106:45

Wewulukile usendo wenyi mumu hali ayo. Walikonyekene nikulita ni kulumbama cha utu wa zango lienyi.

Miaso (Masamu) 78:38

Alioze iye nikwivwa keke, waakonekenene uhenge wo, kaajimine. Ewa, kanji kanji watewulwile utenu wenyi; kasungile ufwatulo wenyi weswe.

Miaso (Masamu) 90:13

Hiluka kama Yehova! Ndo mwiji muka? Uchilikonyeke kama ha kutwala kuli tuvumbi twe.

Kutuhuka 32:14

Mba Yehova walikonyekene ha yipi yize ambile ngwenyi, Munguyilinga kuli atu jami.

Jeremia 26:19

Te Hezekia mwanangana wa Yunda ni atu ja A-Yunda yamushiha nyi? Kevwile woma wa Yehova nikulembelela kuli Yehova, mba Yehova yalikonyeka ha kutwala ku yuma yikalu yize hahanjika hali ayo? Alioze yetu tunambe kulikokela yuma yikalu chikolo.

Jeremia 42:10

Nyi munutwama mu chifuchi chino mba mungunutungisa, chichi kunupuzula; mungunutumba, chichi kunutukula, mumu ngunalikonyeka ha chuma chize chikalu nanulingile.

Hosea 11:8

Ena Eframe, kuchi munguhasa kukwecha? Ena Izalele, kuchi munguhasa kukukunjika? Kuchi munguhasa kukupwisa ngwe Andama? Kuchi mungukulinga ngwe Zepoime? Mbunge yami kuyatayile muchima; keke yami yinaliwezela chivukuminya ni vumbi.

Joele 2:13

Sonyenu mbunge jenu, hi mazalo jenu ko. Tewulukilenu kuli Yehova Zambi yenu, mumu iye mukwa vumbi, wa tò ni keke, makoke kutenuka, mukwa kulumbamisa utu wa zango, kakulikonyeka ha chuma chikalu.

Joele 2:14

Iya kananyingika? Hanji malumuka nikulikonyeka, nikuhichika chiwape chimwe kunyima yenyi; chipwe mulambu wa wunga, hanji mulambu wa kunwa kuli Yehova Zambi yenu.

Amose 5:15

Vwilenu lwaji yuma yipi; zangenu yuma yipema kolesenu upatwilo wa ululi mu chota. Hanji Yehova Zambi-ya-Tujita mavwila vumbi masalila ja José.

Amose 7:6

Mba Yehova yalikonyeka ha chuma chino. Mwene Yehova yamba ngwenyi, Chino nawa kuchichi kupwa.

Yona 3:10

Zambi yamona yitanga yo, ngwenyi, Kanakatuka ku ndako jo jipi. Mba Zambi yalikonyeka ha che chuma chikalu chize ambile kwalinga. Kachilingile.

Shimbi 32:36

Mumu Yehova makasambisa atu jenyi. Makavwila keke tuvumbi twenyi muze mamona tachi jo hijahwa mba niumwe wasala, apwe ndungo, apwe mwene.

Tiangu (Jake) 5:16

Kashika shikisenu milonga yenu umwe kuli mukwo ni mukwo, lilembelenu umwe mukwo ni mukwo, hanga nukahinduke. Kuliumba cha mukwa ululi kuchakutakama chikolo ha kulinga chacho.