Amose 5:16 - MUKANDA USANDU WA ZAMBI 1975

¹⁶ Kashika Yehova, Zambi-ya-Tujita, mwe Mwene kanambe ngwenyi, Ku malindalinda eswe kumukukapwa kulila mbimbi; mu matapalo eswe kumakamba ngwo, Mama yami! mama yami! Kumakasanyika njimi akalishimwoke; ni waze ananyingika kulila lungungu maasanyika akalile mbimbi.

Mukanda Wa Zambi 1970

¹⁶ Kashika Mwene Zambi Mukwa Ndundo Jeswe kanambe ngwenyi: “Mu majila eswe a mu limbo atu maakalila mbimbi, maakambamba ngwo: ‘Mama yami! Mama yami!’ Maakatambika chibwe njimi ha kulila afu hamwe ni waze akutambula fweto ya kulila.

Amose 5:16 Iomraidhean Croise

2 Sango Ja Mianangana 35:25

Ni Jeremia yalila Josia, ni njimba eswe a malunga ni a mapwo yamusa mu miaso yo ya kulila mbimbi ndo musono. Yayisela shimbi mu Izalele ngwami, hanayisoneka mu miaso ya mbimbi.

Izaya 15:8

Mumu muteto hiwapalika mweswe mu chifuchi cha Moape; mbimbi hiyaheta ndo ku Egalime, mbimbi hiyaheta ndo ku Mbia-elime.

Izaya 22:12

Ha tangwa lize Mwene Yehova-wa-Tujita yatambika mutambi wa kulila ni kulishimwoka, ni kulitewula ni kuzala chikeleyi;

Jeremia 30:5

Yehova kanambe ngwenyi, Hitwevwa muteto wa mwongo, wa woma, ni sambukila ka.

Jeremia 4:31

Mumu ngunevu muteto ngwe wa pwo kanafumbajala, kulifwita ngwe umwe ha kusema mwana mutangu. Muteto wa mwana-pwo Zaione nikuhuza; kanazozo moko jenyi ngwenyi, Lamba liami, ngunalezumuka kumeso ja yingalwe.

Jeremia 9:10

Putukenu kulila ni kulila mbimbi ha mukunda wa milundu; putukenu lungungu ha mukunda wa ulilo wa mu puya, mumu hanenyekako kashika niumwe mapalikako, chipwe kuteta cha yimuna kachivwileko. Chipwe tujila a mu tetela, chipwe tushitu hachinako haya.

Jeremia 9:16

Mungwamwanga hakachi ka mavungu kaanyingikine, chipwe tulamba two, mungwahanga ni katana ndo hinaanongesa.

Hosea 4:3

Kashika chifuchi chinalinyenge, ni waze eswe atwamamo kanahongo, ni tushitu a mu yambu nawa, ni tujila a mu tetela, ni chipwe yishi a mu kalunga-lwiji kanaachiza.

Joele 1:11

Enu njimi, ivwenu sonyi; enu akwa kululika miuva, lilenu mbimbi mumu ha tiliku ni ha sevada. Mumu mbuto ya mu minda hiyafuwa.

Joele 1:14

Liselenu tangwa lisandu lia kulitwamina kulia. Tambikenu chikungulwila chilemu. Kungululenu makulwana ni akwa chifuchi eswe ku zuwo lia Yehova Zambi yenu, nukatete kuli Yehova.

Joele 1:15

Mama yami! Lie tangwa! Lie tangwa lia Yehova hiliakundama. Muliza ngwe kwonwona cha kuli Mukwa-Ndundo-Jeswe.

Joele 1:8

Lilenu ngwe *virgem unazala chikeleyi mumu hali lunga lia wanuke wenyi.

Amose 3:13

Mwene Yehova, Zambi-ya-Tujita kanambe ngwenyi, Ivwenu nukashindakenye munyachi wa Yakomba ngwe,

Amose 5:27

kashika mungukanutwala ku unjize sali lize lia Ndamaseku. Chocho kanambe Yehova yoze kali ni jina lia Zambi-ya-Tujita.

Amose 8:10

Mungukalumuna yiwanyino yenu mu kulishimwoka, ni miaso yenu mu kulila lungungu. Mungukajika mijimba yeswe ni yikeleyi, mungukasa lwole ha mitwe yeswe. Munguchipwisa ngwe kulila hali mwana wa lunga wa wika. Songo liacho mulipwa ngwe tangwa lisasu.

Amose 8:3

Mwene Yehova kanambe ngwenyi, Miaso ya mu tembele muyalumuka kulila mbimbi ha tangwa lize; mijimba ya afu muyikapwa yinji makayimbila kweswe nikuhola.

Mika 1:8

Ha chuma chino mungulinyenga ni kulila mbimbi; mungwenda wa kufukula, ni uselesele; mungulila lungungu ngwe mikuza; nikulishimwoka ngwe yikungulu.

Mika 2:4

Ha tangwa lize makanwimbila mwaso wa kuchoka makalila mbimbi ni liji lisasu. Makamba ngwo, Hanatulumbula liakulu. Hanalumuna chihinga cha atu jami. Kanachichiza kuli yami Chichize! Kanapangila minda yetu hakachi ka akwa kutukwata.

Usolwelo 18:10

Mamana kusuku mumu ha woma wa kupinda chenyi, ngwo, Mama yami! Mama yami! Lie limbo linene! Babilonia lie limbo lia ngolo! Mumu susumuku upatwilo we hiuneza.

Usolwelo 18:19

O akuwile fufuta ha mitwe yo, akololokele, nikulila, nikunenganyana, ngwo, Mama yami! Mama yami! Lie limbo linene, muze waze eswe apwile ni maulungu ha kalunga-lwiji alipichishile ku ndando yenyi yilemu! Mumu susumuku hihapwa lia hululu.