Alevi 2:9 - MUKANDA USANDU WA ZAMBI 1975

⁹ Sasendote makachiza ku mulambu Chiwulwiso chawo akachilumbe ha chilumbilo. Wapwa mulambu wa kahia, wa lupembo mupema kuli Yehova.

Mukanda Wa Zambi 1970

⁹ Hako makachiza Chihanda chawo, ni kuwocha ha chilumbilo, chikaweme. Chili chiwulwiso ngwo, mulambu weswe haulambula kuli Mwene Zambi. Lupembo wa mulambu uno wa yakulia kakuwahila kuli Mwene Zambi.

Alevi 2:9 Iomraidhean Croise

Kutuhuka 29:18

Ukalumbe kuji ya panga mweswe ha chilumbilo. Chapwa mulambu wa kulumba kuli Yehova. Lupembo mupema. Mulambu wa kwocha ni kahia kuli Yehova.

Izaya 53:10

Hindu Yehova wapalile kumuwonda. Iye hanamumwesa chikulikuli. Muze makapwisa mwono wenyi mulambu ha shili, iye kumakamona munyachi wenyi, kumakasuhisa matangwa jenyi; upale wa Yehova muuwaha mu moko jenyi.

Alevi 1:9

Alioze yingambiangambia yenyi ni molu jenyi akayikose ni meya. Mba sasendote malumba ye yeswe ha chilumbilo, mulambu wa kulumba, mulambu wa kahia wa lupembo mupema kuli Yehova.

Alevi 2:16

Sasendote makalumba Chiwulwiso chawo; chihanda cha mbuto ya kundonda, ni chihanda cha maji jawo, ni libano yeswe. Wapwa mulambu wa kahia kuli Yehova.

Alevi 2:2

Akaunehe kuli asasendote, ana ja Arone. Akazomoneko kwoko lienyi lia wunga wafufunuka, ni chihanda cha maji, ni ye libano yeswe. Mwe sasendote akalumbe ha chilumbilo Chiwulwiso chayo chikapwe mulambu wa kahia, wa lupembo mupema kuli Yehova.

Alevi 2:8

Mulambu wa yino yuma nukaunehe kuli Yehova. Akauhane kuli sasendote mba iye makautwala ku chilumbilo.

Alevi 24:7

Munukasa libano yipema ha mikala yeswe yiali, jikapwe mbolo ja Chiwulwiso, mulambu wa kahia kuli Yehova.

Alevi 4:31

Maji jawo eswe akaachizeho ngwe akuchiza maji eswe a yitapo ya milambu ya sambukila. Mwe sasendote akaalumbe ha chilumbilo akapwe lupembo mupema kuli Yehova, mba sasendote akamufukile shili yenyi hanga amukonekeneyo.

Alevi 5:12

Akaunehe kuli sasendote, mba sasendote mazomonako kwoko lienyi likapwe Chiwulwiso, akaulumbe ha chilumbilo nikulita ni milambu ya kahia kuli Yehova—mulambu ha shili.

Alevi 6:15

Akazo-moneko kwoko lienyi lia wunga wafufunuka wa mulambu wa wunga, ni maji jawo, ni libano yeswe yili ha mulambu wa wunga, akayilumbe ha chilumbilo yikapwe ya lupembo mupema, Chiwulwiso chawo kuli Yehova.

Zakaria 13:7

Yehova-wa-Tujita kanambe ngwenyi, Yena katana, laula kulimika ni kafunga kami, kulimika ni yoze walikunda ni yami. Lamba kafunga, mapanga amwangane; mungutalikisa kwoko liami kulimika ni ana akepe.

Zakaria 13:9

Mba chino chihanda chamuchitatu mungukachisa mu kahia nikwapemesa chize atu kakupemesa prata. Mungukaeseka ngwe akweseka oru. Kumakatambika ha jina liami, mba mungukaakumbulula. Mungukamba ngwami, O atu jami. O makamba ngwo, Yehova iye Zambi yami.

Kwalula 5:26

Sasendote akazomone kwoko lia tò lia wunga wa mulambu ukapwe Chiwulwiso chawo, mba hikuwocha ha chilumbilo. Kulutwe akanwise pwo e meya.

A-ROMA 12:1

Kashika, ngunaliumbu kuli yenu mandumbu, ku keke ya Zambi, nutumbikile mijimba yenu chitapo cha mwono, chisandu, chakupemena chikolo kuli Zambi, uno we uvumbiko wenu wakulita ni kunyonga cha mana.

A-ROMA 15:16

Hanga ngukapwe kavumbi ka Kristu Yesu kuli akwa mavungu, nikulinga ngwe uvumbiko wa sasendote mu sango lipema lia Zambi, hanga akwa mavungu akapwe mulambu wa kupemena chikolo, kanausela ku usandu kuli Spiritu Musandu.

Efesu 5:2

Endenu mu zango, chizechene ngwe Kristu watuzangile; walikunjikile mwene hali yetu, mulambu ni chitapo kuli Zambi akapwe wa lupembo mupema.

Filipu 2:17

Ewa, nyi kachi mangutehuna ngwe mulambu wa kunwa ha chitapo cha kulingila cha Ufulielo wenu, kachi munguwahilila, mungulikwiza hamwe ni yenu eswe.

Filipu 4:18

Alioze yuma yeswe nguli nayo; nguli nayo ya kulumbama: ngunazala tò, se natambwile kuli Epafwonditu yuma yize nwatumine, lupembo mupema, chitapo cha kupemena chikolo kuli Zambi.