Alevi 10:3 - MUKANDA USANDU WA ZAMBI 1975

³ Henaho Mose yamba kuli Arone ngwenyi, Chino che chuma Yehova hamba ngwenyi, Mungupwa wajila kuli waze eswe makakundama kuli yami. Kumeso ja e atu eswe mungukalema. Arone yaliholela lume.

Mukanda Wa Zambi 1970

³ Henaho Mose yambila Arone ngwenyi: “Chino chechize Mwene Zambi ambile ngwenyi: ‘Eswe waze akungulingila chaatamba kulemesa ulinange wami. Mungukasolola uhenya wami kuli atu jami.’ ” Alioze Arone yahola kwenyi kuluu.

Alevi 10:3 Iomraidhean Croise

Ubutukilo 18:25

Chikapwe kusuku ni yena kulinga chuma chipwa haha, ukashihe akwa ululi hamwe ni yingulungulu. Chocho akwa ululi mapwa ngwe yingulungulu. Ka, chikapwe kusuku ni yena. Te Chisopa-mulonga wa akwa hashi eswe kechi kulinga ni ululi nyi?

Jobe 2:10

Alioze Jo yamba kuli iye ngwenyi, Unahanjika ngwe umwe hakachi ka yihepuke ja mapwo mahanjika. Te mututambula yipema ku kwoko lia Zambi, mba yipi kanda tuyitambula nyi? Mu yino yeswe Jo kavulumwine ni kanwa lienyi.

Miaso (Masamu) 119:120

Musunya wami kuunachikima ni woma wa yena. Woma ngunevu wa upatwilo we. Ayine

Miaso (Masamu) 148:14

Iye hanazundula mbinga ya atu jenyi, ni uhaliso wa asandu jenyi eswe; e ana a Izalele, atu aze atwama hehi nenyi. Halisenu Yehova!

Miaso (Masamu) 39:10

Chiza kama kulamba che kuli yami. Janguhwa ni kungumbufula ni kwoko lie.

Miaso (Masamu) 39:9

Napwile kamama, chapakwile kanwa liami mumu yena wachilingile.

Miaso (Masamu) 46:10

Holenu, nunyingike, yami Zambi. Mungukanangama hakachi ka mavungu; mungukanangama hashi heswe.

Miaso (Masamu) 89:7

Hakachi ka punga ya asandu Zambi kapwa kole ni woma. Hakachi ka waze eswe anamujingilika iye chatamba kumuvwila woma kuhiana.

Miaso (Masamu) 93:5

Shindakenyo je kujakola ngú. Usandu kuwatela zuwo lie, Yehova, ndo ku miaka ya mutolo.

Kutuhuka 14:17

Yami mwene mungukalisa mbunge ja A-Engitu. Kumakaakaulamo mba yami mungukazuka ulemu ha kukumba Falau ni yizavu yenyi yeswe, ni matemba jenyi, ni akwa tuvwalu twenyi.

Kutuhuka 14:4

Yami mungukalisa mbunge ya Falau. Iye kumakaakaula. Mungukazuka ulemu kuli Falau ni ku yizavu yenyi yeswe. A-Engitu eswe kumakanyingika ngwo, Mwe Yehova. Chocho alingile.

Kutuhuka 19:22

Asasendote nawa akukundama kuli Yehova akalisele ku usandu, kuchina Yehova mapula haze nikwaheta.

Kutuhuka 19:24

Yehova yamba kuli iye ngwenyi, Yako, upalumuke mba ukakanduke ni yena ni Arone hamwe ni yena. Alioze asasendote ni e atu kanda akazomboka njiza mukukanduka ndo kuli Yehova kuchina iye makapula haze nikwaheta.

Kutuhuka 30:30

Ukawayise ni maji Arone ni ana jenyi a malunga. Ukaasele ku usandu hanga akangulingile usasendote.

Izaya 39:8

Hezekia yamba kuli Izaia ngwenyi, Liji lia Yehova hiwamba Unapeme. Yaweza nawa ngwenyi, Mukupwa sambukila ni umwenemwene ha matangwa jami.

Izaya 49:3

Yangwamba ngwenyi, Uli kavumbi kami; ena Izalele munguwana uhenya wami muli yena.

Izaya 52:11

Katukenu! Katukenu! Tuhukenumo! Kanda nukwata ku chuma cha luchisa. Yenu nwakumbata yikwachilo ya Yehova, katukenumo nulipemese.

Ezekiel 20:41

Mungukanutambula ngwe lupembo mupema muze mungukanuchiza hakachi ka mavungu ni kunukonga ku yifuchi kuze nwamwanganyinyine. Mungukasolola usandu wami hakachi kenu kumeso ja akwa mavungu.

Ezekiel 28:22

Mwene Yehova kanambe ngwenyi, Ena Sendone, kunalimika ni yena, kumungukasolola uhenya wami hakachi ke. Kumakanyingika yami nguli Yehova muze mungukalingamo upatwilo wami ni kusololamo usandu wami.

Ezekiel 38:16

Mukeza kulimika ni atu jami A-Izalele, ngwe lelwa lia kufuka chifuchi. Ha matangwa a kusula mungukakukoka ulimike ni chifuchi chami hanga mavungu ukangunyingike muze mungukasolola usandu wami muli yena Ngoke kumeso jo.

Ezekiel 40:46

ni chipatulo chatalikisa ku Norte, cha asasendote waze akufunga chilumbilo; o ana ja Zadoke, o wika hakachi ka ana ja Levi mahasa kukundama kuli Yehova nikumuvumbika.

Ezekiel 42:13

Aye yamba kuli yami ngwenyi, Yipatulo ya ku Norte ni yipatulo ya ku Sule hatalanganyi ni yize, ayo yapwa yipatulo yisandu kuze asasendote akwa kukundama kuli Yehova malila milambu yisandu yahiana. Mwenamo matulikila milambu yisandu yahiana—mulambu wa wunga, ni mulambu ha shili, ni mulambu ha uhie, mumu yipatulo yize yisandu.

Alevi 21:15

kuchina majilula ana jenyi hakachi ka atu jenyi. Mumu yami Yehova mukwa kumusela ku usandu.

Alevi 21:17

Ambila Arone ngwe, Niumwe chilema hakachi ka ana je, ndusu yisemuko yo, kanda akundama kulambula kulia cha Zambi yenyi.

Alevi 21:21

Niumwe chilema hakachi ka ana ja Arone mwe sasendote kanda akundama akalambule milambu ya Yehova ni kahia. Se iye chilema kanda akundama mukulambula kulia cha Zambi yenyi.

Alevi 21:6

Akapwe asandu kuli Zambi yo. Kanda akajilula jina lia Zambi yo. Mumu o kakulambula milambu ya kahia kuli Yehova, che kulia cha Zambi yo. Kashika akapwe asandu.

Alevi 21:8

Nukamusele ku usasendote mumu kakulambula kulia cha Zambi yenu. Akapwe musandu kuli yenu mumu yami Yehova mukwa kunusela ku usandu nguli musandu.

Alevi 22:9

Kashika akafunge chize naakunjika kuchina makambata mulonga wacho akafwe ha kuchijilula. Yami Yehova mukwa kwasela ku usandu.

Alevi 8:35

Kwe ku chikolo cha mbalaka ya chikungulwila munukatwama matangwa shimbiali, mwalwa ni ufuku, ni kufunga chiyulo cha Yehova kuchina munufwa, mumu chocho angutumine.

Kwalula 16:5

Yamba kuli Kora ni ku mbunga yenyi yeswe ngwenyi, Hamene Yehova makasolola yoze mapwa niwenyi, yoze mapwa musandu; makamukundamisa kuli iye. Yoze makamutongola, kumakamukundamisa kuli iye.

Kwalula 20:12

Yehova yamba kuli Mose ni Arone ngwenyi, Mumu te kunwafulielele yami, mukungusela ku usandu kumeso ja A-Izalele, kashika kunuchi kahetesa chino chikungulwila ku chifuchi hingunaahecho.

Mateu 10:37

Yoze mafwila tato hanji naye kuhiana yami, kangutelele; yoze mafwila mwanenyi wa lunga, hanji mwanenyi wa pwo kuhiana yami, kangutelele.

Yoano 12:28

Tata, chichimieka jina lie. Kashika liji liatuhukile mwilu ngwo, Hingunalichichimieka, kumungukalichichimieka cheka nawa.

Yoano 14:13

Cheswacho munwita mu jina liami, kumunguchilinga, hanga achichimieke Tata muli mwe Mwana.

Shimbi 32:51

Mumu te nwatangwile shimbi yami hakachi ka A-Izalele ku meya a Meripa-Kandeshe mu puya ya Zini, mumu te kunwanguselele ku usandu mukachi ka A-Izalele.

2 A-TESALONIKA 1:10

muze meza ha tangwa lize, hanga akamuchichimieke muli asandu jenyi, hanga akamukomoke muli waze eswe akwa kufuliela, mumu nwafulielele Shindakenyo yetu kuli yenu.

1 Petulu 4:17

Mumu mwaka hiuneza hanga upatwilo uputuke ku zuwo lia Zambi: nyi kachi muuputuka hatangu kuli yetu, songo lika mulikapwa lia waze keshi kwononoka ku sango lipema lia Zambi?

1 Samuel 2:30

Kashika Yehova Zambi ya Izalele kanambe ngwenyi, Chamwenemwene nambile ngwami, Munyachi we ni munyachi wa tatenu kumakenda kumeso jami ndo ku miaka ya mutolo. Alioze haliapwila Yehova kanambe ngwenyi, Chikapwe kusuku ni yami, mumu waze mangulemesa ni yami mungwalemesa, alioze waze mangulelesa kumakasauka.

1 Samuel 3:18

Kashika Samuel yamulweza ye yeswe. Kamuswekelele nichimwe. Eli ngwenyi, Iye Yehova, akalinge chize chamupemena.

1 Samuel 6:20

Mba A-Mbete-Shemeshe ambile ngwo, Iya mahasa kumana kumeso ja Yehova, yono Zambi musandu? Kuli iya makanduka atweche yetu?