2 Samuel 20:21 - MUKANDA USANDU WA ZAMBI 1975

²¹ Chikuma kuchapwile chocho. Alioze umwe lunga wa ku milundu ya Eframe, jina lienyi Shipa, mwana Mbikiri, hanazundula kwoko lienyi lia kulimika ni mwe mwanangana David, twehenuye mba mungukatuka ku chihunda. Pwo yamba kuli Joabe ngwenyi, Makukongela mutwe wenyi helu lia chipanga.

Mukanda Wa Zambi 1970

²¹ Wano hi manyonga jetu ko. Tunakaula mutu, jina lienyi Sheba, mwana wa Bikri wa ku chifuchi cha milundu ya Efraime. Halishinga kayanda alimike ni mwanangana David. Twehenu ye, mba tukatuke ku limbo.” Mwe pwo ngwenyi: “Ewa, mutunukongela mutwe wenyi helu lia chipanga.”

2 Samuel 20:21 Iomraidhean Croise

2 Samuel 20:1

Kwapwileko umwe lunga wamokomoko, jina lienyi Shipa, mwana Mbi kiri Ka-Mbenjamine. Iye yahumuna chitavwi ngwenyi, Etu kutushi chihanda muli David, chipwe chihinga kutushi nacho muli mwana Yese. Kashika enu malunga a Izalele yénu ku mazuwo jenu.

2 Samuel 20:2

Chocho malunga eswe a Izalele alitwaminyine kukaula David, yakaula Shipa mwana Mbikiri. Alioze malunga a Yunda yalalaminya kuli mwanangana wo chize ku Yordau ndo ku Yerusaleme.

2 Samuel 20:20

Joabe yakumbulula ngwenyi, Chikapwe kusuku chikolo ni yami kupupa hanji kwonwona.

2 Samuel 23:18

Abishai mwanakwo wa Joabe mwana Zeluia iye wapwile mukwa lutwe hakachi ka atatu. Iye wazundwile kunga lienyi kulimika ni kulakaji atatu. Yaashiha. Kashika wapwile ni lufuma hakachi ka atatu.

1 Yitanga Ya Mianangana 11:26

Mukwo nawa Jeroboame mwana Nebate, Ka-Eframe wa ku Zereda. Iye mukwa kulingila Solomone, jina lia naye ngwo Zerua, twamishi. Iye nawa yazundula kwoko lienyi kulimika ni mwanangana.

1 MIANANGANA 10:7

Alioze muze mukanda waahetele akwachile ana ja mwanangana, yaashiha, eswe makumi shimbiali, yasa mitwe yo mu yisoka yayituma kuli Jehu mu Yezerele.

1 MIANANGANA 5:22

Aye ngwenyi, Chinawaha. Mwata hangutuma ngwenyi, Haliapwila lume hikweza kuli yami amwe akweze aali, ana ja aprofeta a ku chifuchi cha Eframe ku milundu. Kashika ngunalembe ukaahe *talentu yimwe ya prata ni uzalo uali.

Jeremia 4:15

Mumu liji limwe linakololoka ku Ndane nikutambika chipi ku mulundu wa Eframe.

Jeremia 50:19

Munguhilwisa Izalele ku ulilo wenyi, mba kumakahia ha Karmela, ni mu Mbashane, ni kuzanga chenyi cheswe muchikayuka ha mindundena ya Eframe ni mu Ngiliate.

Yoshua 24:33

Eleazare mwana wa Arone yafwa, yamufunda mu Ngibia, chihunda cha Finehase mwanenyi, chize amuhele mu chifuchi cha Eframe ku milundu.

Akwa Kuyula 2:9

Yamufunda muchima lia njiza ya chihinga chenyi mu Timna-Here mu chifuchi cha Eframe ku milundu, ku sali Ha Norte lia mulundu wa Ngasha.

Akwa Kuyula 7:24

Ngideone yatuma tunganda ndusu chifuchi cheswe cha Eframe ku milundu ngwenyi, Palumukenu kuli A-Mindiane nukaajikinyine ku njiji ndo ku Mbete-Bara, ni ku Yordau nawa. Chocho malunga eswe a Eframe aasanyikine, yajikinyina ku njiji ndo ku Mbete-Bara ni ku Yordau nawa.

Akwa Kuyula 9:55

Muze A-Izalele amwene ngwo, Apimeleke hafwa yaya mutu mweswe ku zuwo lienyi.

1 Samuel 24:6

Yamba kuli malunga jenyi ngwenyi, Yehova angukanjise kulinga chuma chino kuli mwata wami wa kuwayisa ni maji kuli Yehova, ngwolole kwoko liami kulimika nenyi, se Yehova hananuwayisa.

1 Samuel 26:9

Alioze David yamba kuli Abishai ngwenyi, Kanda umwonwona, mumu iya mahasa kusamba nyi masa kwoko lienyi lia kulimika ni yoze Yehova hanamuwayisa?