1 Timoteu 2:3 - MUKANDA USANDU WA ZAMBI 1975

³ Mumu chino chinawaha, chinapemena chikolo kuli Zambi Chilamwina chetu,

Mukanda Wa Zambi 1970

³ Chino che chinalite ni chakuwahisa Zambi, Chilamwina chetu,

1 Timoteu 2:3 Iomraidhean Croise

Izaya 45:21

Ambululenu chikuma chenu nukachilumbunune. Atwame punga. Yoze walwezele chuma chino kulu, iya? Yoze wachambulwilile ku miaka ya kushi, iya? Hi yami ko, Yehova? Kukushi nawa zambi mukwo shina yami mwene, Zambi ya ululi, Chilamwina; kukushi mukwo shina yami mwene.

Luka 1:47

Spiritu yami hiyinalikwiza muli Zambi Chilamwina chami.

A-ROMA 14:18

Mumu yoze malingila Kristu ni yino yuma mapemena chikolo kuli Zambi, mamusela Shindakenyo yipema kuli atu.

Filipu 1:11

nukazale tò ni mihuko ya ululi, yize ya kuli Yesu Kristu, ku uhenya ni uhaliso wa Zambi.

Filipu 4:18

Alioze yuma yeswe nguli nayo; nguli nayo ya kulumbama: ngunazala tò, se natambwile kuli Epafwonditu yuma yize nwatumine, lupembo mupema, chitapo cha kupemena chikolo kuli Zambi.

Kolosu 1:10

hanga nukende ngwe chinatela Mwene ku upemeno weswe, nukeme mihuko ha yitanga yeswe yipema, nukatatuke ni yinyingi yeswe ya Zambi:

1 Tesalonika 4:1

Ha yize yinasala, mandumbu, tunaliumbu, nikunushinjila muli Mwene Yesu, chizechene ngwe nwatambwile kuli yetu, ngwe chize Chanutamba kwenda ni kupemena kuli Zambi, chizechene ngwe nwakwenda, hanga nukalumbamemo nawa ni nawa.

1 Timoteu 1:1

Yami Paulu, postolo wa Yesu Kristu, nikulita ni chiyulo cha Zambi Chilamwina chetu, ni cha Kristu Yesu, iye kutalatala chetu;

1 Timoteu 4:10

Mumu ha chino, twakukilikita, no kakutuchoka, mumu twakutalatata hali Zambi ya mwono, iye mwe Chilamwina cha atu eswe, alioze kuhiana chikolo cha waze akufuliela.

1 Timoteu 5:4

Alioze nyi twamishi umwe mapwa ni ana, hanji ajikulu, akalilongese hatangu uwayilo ha kutwala ku mazuwo jo ene, akahilwise chimwe kuli yisemi jo. Mumu chino chinapemena chikolo kuli Zambi.

2 Timoteu 1:9

yoze hanatulamwina, hanatutambika ni kutambika chisandu, hi nikulita ni yitanga yetu ko, alioze nikulita ni upale wenyi mwene ni vumbi lienyi, lize atuhele shimbu miaka kanda yipwa.

Hebreu 13:16

Alioze kulinga yipema, ni kulianyina, kanda nuvulama; mumu ni yitapo ngwe yino Zambi kakuwahilila chikolo.

1 Petulu 2:20

Mumu hahi manuchichimieka, kachi munuvulumuna, o manumbufula, chipwe munulihumikiza nacho? Alioze kachi ha kulinga yipema munwivwa lamba, munulihumikiza nacho, chino chinapemena kuli Zambi.

1 Petulu 2:5

Ni yenu nawa, ngwe mawe a mwono, kananutungu kupwa zuwo lia uspiritu, kupwa asasendote asandu, mukulambula yitapo ya uspiritu, ya kupemena chikolo kuli Zambi ku tachi ja Yesu Kristu.