1 Samuel 2:2 - MUKANDA USANDU WA ZAMBI 1975

² Niumwe wapwa musandu ngwe Yehova, mumu mukwo wakuhi ndo yena wika. Liwe likwo liakuhi ngwe Zambi yetu.

Mukanda Wa Zambi 1970

² “Kukushi niumwe munangi ngwe Mwene Zambi, wakuhi niumwe ngwe iye. Wakuhi kafunga ngwe Zambi yetu.

1 Samuel 2:2 Iomraidhean Croise

2 Samuel 22:3

Zambi iye liwe liami lia tachi, muli iye munguswama. Iye lukepwe wami, ni mbinga ya ulamwino wami, ni kaposhi kami musuku, ni chiswamino chami; chilamwina chami, wakungulamwina ku upupilo.

2 Samuel 22:32

Mumu Zambi iya? Shina Yehova wika. Lie liwe iya? Shina Zambi yetu.

2 Samuel 7:22

Kashika Yehova Zambi, uli munene. Kukushi umwe walita ni yena. Kukushi umwe Zambi mukwo shina yena wika, nikulita ni yuma yize yeswe hitunevu ni matwi jetu.

1 Yitanga Ya Mianangana 8:23

ngwenyi, Yehova, Zambi ya Izalele kukushi niumwe Zambi ngwe yena chipwe mwilu chipwe hashi. Kuwakufunga usendo ni utu wa zango ni tuvumbi twe waze akwenda kumeso je ni mbunge jo jeswe.

Miaso (Masamu) 111:9

Hanatumu ukule kuli atu jenyi. Hanahana shimbi ya usendo wenyi ku miaka ya mutolo jina lienyi lisandu; kole ni woma.

Miaso (Masamu) 18:2

Yehova iye liwe liami, ni mbonge yami, ni mukwa kungupulula; Zambi yami ni liwe liami lia tachi, muli iye munguswama. Iye lukepwe wami, ni mbinga ya ulamwino wami, ni kaposhi kami musuku.

Miaso (Masamu) 18:31

Mumu Zambi iya? Shina Yehova wika. Lie liwe iya? Shina Zambi yetu.

Miaso (Masamu) 71:19

Ululi wa yena Zambi wanangama. Hiunalingi yuma yinene; Zambi, iya walifwa ni yena?

Miaso (Masamu) 71:3

Upwe kuli yami ngwe uli luliwe lwami lwa kutwamamo, kwenako munguchinyina matangwa eswe. Hiwahana liji kungulamwina, mumu yena uli luliwe lwami kanda chiswamo chami cha tachi.

Miaso (Masamu) 73:25

Iya nguli nenyi mwilu shina yena wika? Chipwe hashi niumwe keshiho yoze namuzanga shina yena.

Miaso (Masamu) 86:8

Hakachi ka mazambi niumwe wapwa ngwe yena mwe Mwene. Niyimwe yitanga yinalifu ni yitanga ye.

Miaso (Masamu) 89:6

Helu lia malelwa iya malitesa ni Yehova? Iya hakachi ka akwa ndundo malifwa ni Yehova?

Miaso (Masamu) 89:8

Yehova Zambi-wa-Tujita, iya mapwa mukwa ndundo wa kulifwa ni yena Yehova? Umwenemwene we unakujingilika.

Miaso (Masamu) 99:3

Akachichimieke jina lie linene lia woma, mumu Hapwa lisandu.

Miaso (Masamu) 99:5

Nangamisenu Yehova Zambi yetu. Wayilenu ku chitwamo cha yiliato yenyi, mumu iye musandu.

Miaso (Masamu) 99:9

Nangamisenu Yehova Zambi yetu, nukawayile ku mulundu wenyi usandu, mumu Yehova Zambi yetu iye musandu.

Kutuhuka 15:11

Yehova—hakachi ka tuzambi walita ni yena iya? Walita ni yena iya? Mulemu ni musandu—yena. Ha kukuhalisa, kole ni woma yena. Kuwakulinga yikomokeso.

Izaya 40:18

Nyi chocho neka munutesa Zambi? Kulifwa chenyi kuchi munuchipwisa?

Izaya 44:6

Yehova, Mwanangana wa Izalele, Mukwa-Kukula, Yehova-wa-Tujita kanambe ngwenyi, Yami mutangu ni yami kasula-songo; kukushi zambi niumwe shina yami mwene.

Izaya 44:8

Kanda nwivwa woma, mwongo kanda unukwata. Te chanulwezele chize ku shakulu nikuchambulula? Ni yenu nuli yela. Kwali umwe Zambi hamwe ni yami? Luliwe lukwo kulushiko; chalunyingikine.

Izaya 57:15

Mumu mwe Chitunda mukwa kunangama, mukwa kutunga kuma kwa mutolo, jina lienyi Musandu, kanambe ngwenyi, Kunatwama kuma kwanangama, kusandu. Natwama nawa ni mukwa spiritu ya kuhia ni kulikehesa, hanga ngukahuzulule Spiritu ya mukwa kulikehesa ni kuhuzulula mbunge ya mukwa kuhia.

Izaya 6:3

Umwe watambikile kuli mukwo ni mukwo ngwo, Yehova-wa-Tujita aye musandu, musandu, musandu. Hashi heswe hanazala ni uhenya wenyi.

Jeremia 10:6

Kukushi niumwe walita ni yena Yehova, uli munene, ni jina lie linene ni ndundo.

Alevi 11:44

Mumu yami Yehova Zambi yenu, kashika munukalihandununa nukalisele ku usandu, se ni yami nguli musandu. Kanda nukalichisa ni kashitu niumwe mukwa kulikoka ha mavu.

Alevi 11:45

Mumu yami Yehova nanuchijile ku chifuchi cha Engitu ngukapwe Zambi yenu. Kashika munukapwa asandu, se ni yami nguli musandu.

Alevi 19:2

Amba ku chikungulwila cheswe cha A-Izalele ngwe, Pwenu asandu mumu yami Yehova Zambi yenu nguli musandu.

A-ROMA 15:4

Mumu yuma yeswayo yasonewene kunyima, yasonewene mukutulongesa, hanga ku uhumikizo ni kulembejeka cha yisoneko tukapwe ni kutalatala.

A-ROMA 4:8

Kawaha mutu yoze Mwene kechi kumwalwila shili yenyi.

Shimbi 3:24

Mwene Yehova, hinwaputuka kulweza unene wenu, ni kwoko lienu lia tachi kuli yami kavumbi kenu; mumu kazambi kaka, hanji mwilu, hanji hashi kanahase kulinga nikulita ni yitanga yenu, nikulita ni yilinga yenu ya ngolo?

Shimbi 32:20

Yamba ngwenyi, Mungwaswekela meso jami nguchitale chize muchipwa songo lio. Mumu o kapwa chisemuko chapiya ana keshi mbunge.

Shimbi 32:39

Haliapwila talenu. Ngwami, Yami, yami mwene nguliko. Kukushi niumwe zambi hamwe ni yami. Nakushiha mba nakuhana mwono, nakulemeka mba nakuwuka. Kukushi niumwe mahasa kupulula mutu ku kwoko liami.

Shimbi 32:4

Iye Liwe. Yitanga yenyi yingunu, mumu majila jenyi eswe ja ululi. Iye Zambi ya jika; keshi uhenge; mukwa pundu, mukwa umwenemwene.

Shimbi 4:35

Anulwezelecho yenu, hanga nunyingike ngwenu, Yehova iye Zambi. Wakuhi weka shina iye wika.

Shimbi 4:39

Kashika, nyingikenu musono, nuchipachikile mu mbunge jenu, ngwami, Yehova iye Zambi mwilu ni hashi. Wakuhi weka niumwe.

1 Petulu 1:16

Mumu chinasonewa ngwo, Pwenu asandu, mumu yami nguli musandu.