1 Samuel 15:23 - MUKANDA USANDU WA ZAMBI 1975

²³ Mumu kukolema kuchapwa ngwe mulonga wa umbanda, ni upama kuwapwa ngwe uhenge ni kukombelela. Ena hiunalitunu liji lia Yehova; kashika aye hanalitunu yena. Kuchi kupwa mwanangana.

Mukanda Wa Zambi 1970

²³ Kukolema Shimbi ya Zambi chili ngwe kupanda wanga, ni kulengumuka chili ngwe kukombelela mahamba. Muze hiwalituna Shimbi ya Mwene Zambi, neye halituna yena kubwa mwanangana.”

1 Samuel 15:23 Iomraidhean Croise

Ubutukilo 31:19

Alioze te Lapane haya kutewula mapanga jenyi, kashika Rakele yeya mahamba ja tato.

Ubutukilo 31:34

Rakele iye te handa mahamba, haasweka mu seleyi ya kamelu, yatwamaho. Lapane yapolongoza mweswe mu mbalaka, kaawanyine.

2 Samuel 12:9

Kuchi te hiwalelesa liji lia Yehova ukalinge chize chamupihila? Uriya Ka-Hete hiwamushihisa ni katana. Hiwatambula mukwo-pwo akapwe pwo lie. Iye te wamushihisa ni katana ka A-Amone.

2 Samuel 7:15

Hindu chichi kumuchiza utu wa zango liami ngwe nauchijile kuli Saulu yoze nahumine kumeso je.

1 Sango Ja Mianangana 10:13

Chocho yafwa Saulu ha mukunda wa Utanguko wenyi wavulumwine ni kulimika ni Yehova, mumu kafungile liji lia Yehova. Chikwo nawa wahulile chiyulo kuli mukwa mahamba;

1 Sango Ja Mianangana 28:9

Ni yena, mwanami Solomone, nyingika Zambi ya tatenu ukamulingile ni mbunge yingunu ni manyonga a kulitumbikila. Mumu Yehova kakupolongoza mbunge jeswe ni kakunyingika kutaka cha manyonga eswe. Nyi mumufupa mumuwana, alioze nyi mumwehuka kumakumbila ndo ku miaka.

Jobe 34:37

Mumu kakuweza uhulia ku mulonga wenyi; kakusakwila koshi hakachi ketu, nikwokesa maliji jenyi a kulimika ni Zambi.

Miaso (Masamu) 107:11

mumu akolemene ku maliji a Zambi, nikulelesa yiyulo ya mwe Chitunda.

Kutuhuka 22:18

Kanda ukatayiza chimbanda kutwama ni mwono.

Izaya 19:3

Maspiritu ja muchima lia A-Engitu munguzukula; munguvundangenya yikuma yo. Kumakaya kuhula ku mahamba, ni yimbanda, ni akwa mahamba ni akwa tufutafuta.

Izaya 8:19

Mba muze manwamba ngwo, Hanjikenu ni akwa mahamba ni yimbanda aze akuyevweta ni kulinyinguna, ambenu ngwenu, Atu kechi kuhanjika ni Zambi yo? Te mahanjika ni afu ha kutwala kuli amwono?

Jeremia 16:12

Ni yenu hinwawana tulamba twenu, mumu mweswe kanakaula upale wenyi mwene upi ni wa pami, kasolo kungwivwa.

Jeremia 28:16

Kashika Yehova kanambe ngwenyi, Mungukuchiza hano hashi. Mwaka uno wene kumuofwa mumu hiwamba yuma ya kukatukila Yehova.

Jeremia 29:32

kashika munguhana kastigu kuli Shemaia wa ku Nehelama ni kuli waze eswe makasemukina kuli iye, ngwami, Kechi kupwa ni niumwe mukwa mwono hakachi ka vungu lino kumona chipema chize mungulinga kuli atu jami mumu ha kuhanjika yuma ya kukatukila Yehova. Chocho kanambe Yehova.

Hosea 13:11

Hinanwaha mianangana ni utenu wami, mba hinaachiza ni ufwatulo wami.

Hosea 3:4

Mumu A-Izalele makatwama matangwa anji keshi mwanangana hanji mukwa kuyula; keshi chitapo hanji nguji; keshi efode hanji terafimi.

Alevi 20:27

Lunga hanji pwo mukwa mahamba, hanji mukwa tufutafuta, munushiha. Munumwasa mawe. Manyinga jo akapwe hali ene.

Alevi 20:6

Nyi umwe mutu makatewulukila kuli akwa mahamba ni akwa tufutafuta nikulipwisa ngwe chikoi kuli ayo, mungusa meso jami a kulimika nenyi. Mungukamuteta hakachi ka atu jenyi.

Kwalula 14:9

Chuma chimuwika, kanda nukolema Yehova, chipwe kanda nuvwila woma atu atwama mu chifuchi, o kanapu kulia chetu; chize malikwasa nacho hichaachina. Yehova hwali hamwe ni yetu. Kanda nwavwila woma.

Yilinga 13:22

Muze te hamuchiza, wasolwele David kuli ayo kupwa mwanangana wo; kuli iye nawa washindakenyene, ngwenyi, Hingunawane David mwana Yese, lunga wa kulita ni mbunge yami, iye kumakalinga upale wami weswe.

2 Korintu 6:16

Kutayiza chika yikwete tembele ya Zambi ni mahamba? Mumu yetu tuli tembele ya Zambi ya mwono; nikulita ngwe Zambi wambile ngwenyi, Mungukatwama muli ayo, mungukenda hakachi ko, mungukapwa Zambi yo, o kumakapwa atu jami.

Galashia 5:20

ni kukombelela mahamba, ni kupanda, ni kole, ni vunda, ni ukwa, ni ufwatulo, ni kulipula, ni kulimanangana, ni kulihandununa,

Shimbi 9:24

Chize ku tangwa lize nanunyingikine, hinwakolema Yehova.

Shimbi 9:7

Iwulukenu, kanda nuvulama ngwe yenu nwehile Yehova Zambi yenu mu puya, chize ku tangwa nwakatukile ku chifuchi cha Engitu, ndo nwahetele kuno, enu kunwakolema Yehova.

Yoshua 22:15

O yeza kuli A-Rupene, ni A-Ngate, ni chihanda cha ha muchima cha munyachi wa A-Manase mu chifuchi cha Ngiliate, yamba kuli ayo ngwo,

Usolwelo 21:8

Alioze hali akwa mwongo, ni waze keshi kufuliela, ni akwa kuzelwokesa, ni yingalwe, ni yitanji, ni akwa kupanda, ni akwa kukombelela mahamba, ni akwa mahuza eswe, chihanda cho kumuchikapwa mu Chitende chize cha kuyila ni kahia ni fundanga, chenacho che kufwa chamuchiali.

Usolwelo 22:15

Haze atwama tuwa ni akwa kupanda, ni yitanji, ni yingalwe, ni akwa kukombelela mahamba, ni mweswawo wakufwila, wakutomba mahuza.

1 Samuel 13:14

Alioze haliapwila wanangana we kuuchi kulinduluka. Yehova halifupila mutu umwe malita ni mbunge yenyi. Yehova hamutongola akayule atu jenyi, mumu yena kwalingile chize Yehova wakwambile.

1 Samuel 16:1

Yehova yamba kuli Samuel ngwenyi, Ndo mwiji muka mukalishimwoka hali Saulu, se hinalitunaye, kechi kupwa mwanangana wa Izalele? Zalisa mbinga ye ni maji, yako, mungukutuma kuli Yese wa ku Mbeteleme, mumu hinalisela mwanangana hakachi ka anenyi a malunga.

1 Samuel 2:30

Kashika Yehova Zambi ya Izalele kanambe ngwenyi, Chamwenemwene nambile ngwami, Munyachi we ni munyachi wa tatenu kumakenda kumeso jami ndo ku miaka ya mutolo. Alioze haliapwila Yehova kanambe ngwenyi, Chikapwe kusuku ni yami, mumu waze mangulemesa ni yami mungwalemesa, alioze waze mangulelesa kumakasauka.

1 Samuel 28:3

Samuel te hanafu, ni A-Izalele hanamulili nikumufunda mu Rama, chihunda chenyi mwene. Saulu iye hahuma akwa mahamba ni yimbanda mu chifuchi.