1 Samuel 12:17 - MUKANDA USANDU WA ZAMBI 1975

¹⁷ Musono ngwami tangwa lia kucha tiliku, nyi? Mungutambika kuli Yehova atume kukulunguza ni vula nukanyingike nukamone ungulungulu wenu unene hinwavulumuna kumeso ja Yehova ha kwita mwanangana.

Mukanda Wa Zambi 1970

¹⁷ Ngwami, haliabwila tuli mu lushiho, nyi kuchi? Alioze mungulemba Mwene Zambi hanga atume kukulunguza ni vula. Muze machilinga, mununyingika ngwenu, nwavulumuna Mwene Zambi kuhiana muze hinweta mwanangana.”

1 Samuel 12:17 Iomraidhean Croise

Miaso (Masamu) 99:6

Mose ni Arone hakachi ka asasendote jenyi, ni Samuel hakachi ka waze atambikile ha jina lienyi. Atambikile kuli Yehova iye waakumbulwile.

Kutuhuka 32:30

Mba ha kucha, Mose yamba kuli atu ngwenyi, Hinwavulumuna mulonga unene, haliapwila mungukanduka kuli Yehova, hanji munguhasa kufuka shili yenu.

Yishima 26:1

Ngwe neve ha mwaka wa chivukuminya ni vula ha mwaka wa kucha, chocho ulemu kuwatelele chihepuke.

Jeremia 15:1

Mba Yehova yamba kuli yami ngwenyi, Chipwe kachi Mose ni Samuel mamana kumeso jami, hindu mbunge yami kuyichi kuya kuli wano atu. Uakatwise kumeso jami akaye!

Yoshua 10:12

Mba Yoshua yamba kuli Yehova tangwa lize Yehova yakunjika A-Amore kuli A-Izalele, yamba kumeso ja A-Izalele ngwenyi, Ena, tangwa, mana lume ha Ngibeone. Ni yena, kakweji, mana ha chikulo cha Ajalone.

1 Samuel 12:13

Kashika talenu mwe mwanangana hinwatongola, hinweta. Yehova hanusela mwanangana kunuyula.

1 Samuel 12:19

Atu eswe yamba kuli Samuel ngwo, Nutulembele etu ngamba jenu kuli Yehova Zambi yenu, kanda tufwa, mumu ha kwita mwanangana hitwaweza chuma chino chipi ku milonga yetu yeswe.

1 Samuel 2:10

Waze malitachika ni Yehova kumakamakwoka tuyipinji; malimika no nikukulunguza mwilu. Yehova makapatwila masongo a hashi. Makahana tachi kuli mwanangana wenyi; makazundula mbinga ya yoze hamuwayisa ni maji.

1 Samuel 7:5

Samuel yamba ngwenyi, Kungululenu A-Izalele eswe ku Mizepa mba mungunulembela kuli Yehova.

1 Samuel 8:6

Alioze chuma chino Chapihilile Samuel ha kwamba ngwo, Twehenu mwanangana akatuyule. Samuel yalemba kuli Yehova.

1 Samuel 8:7

Yehova yamba kuli Samuel ngwenyi, Panjika kuli atu, liji lieswe makwamba, mumu kalitunyine yena, alioze yami analitunu. Kazangile ngupwe mwanangana wo.