1 Korintu 13:4 - MUKANDA USANDU WA ZAMBI 1975

⁴ Zango uhomboloji likwete, utu likwete; zango kulishi kupwa ni lufwachinda; zango kulishi kulisangala, kulishi kulifuza.

Mukanda Wa Zambi 1970

⁴ Mukwa zango uhomboloji akwete, utu akwete, keshi kubwa ni lufwachinda, keshi kulisamba, keshi kulengumuka.

1 Korintu 13:4 Iomraidhean Croise

Ubutukilo 30:1

Muze Rakele yamona kasemene ana kuli Yakomba yavwila ukwa yayo. Yamba kuli Yakomba ngwenyi, Ungwehe mwana, nyi ka, mungufwa.

Ubutukilo 37:11

Ayayo amuvwilile ukwa, alioze tato wafungile maliji ano mu mbunge yenyi.

Nehemia 9:17

Kazangile kwononoka; kasolo kwiwuluka yikomokeso yize walingile hakachi ko. Akwachile pami ni ha kukukatukila atongwele umwe kasongo akahiluke ku undungo wo. Alioze yena uli Zambi mukwa kukonekena, mukwa vumbi, wa tò ni keke, kushi kutenuka washi, mukwa kulumbamisa utu wa zango, kashika kwaehukile.

Miaso (Masamu) 10:5

Majila jenyi a pami wika; upatwilo we uli kusuku nenyi mwilu chikolo; nyi akwa kulimika nenyi, kakwalelesa.

Yishima 10:12

Kole kuyakuvundula ndombo, alioze zango kuliakufuka Utanguko weswe.

Yishima 13:10

Ku kulengumuka wika kuneza kulitachika; alioze mana kwali kuli mukwa kulongoloka.

Yishima 17:14

Kuputuka cha ndombo chapwa ngwe muze majikula meya; kashika litwamine kuhamika shimbu kanda achiputuka kuzwela.

Yishima 17:9

Mukwa kufuka Utanguko kanafupu zango; alioze mukwa kutokwela ha chikuma kakuhandununa masepa apema.

Yishima 19:22

Chize atu kakuzanga muli mutu ngwo, Utu; chiswale Wapema kuhiana mukwa mahuza.

Yishima 31:20

Kakuzoza moko jenyi kuli yiswale, ewa, kakuzoza moko jenyi kuli akwa kuhona.

Yishima 31:26

Kakupakula kanwa lienyi ni mana; shimbi ja utu jili ha limi lienyi.

Longeshi 10:4

Chipwe utenu wa mukwa kuyula muukukasumukina, kanda ukatuka ha chitwamo che; mumu ulemeso kuwakukukila milonga yinene.

Mateu 27:18

Mumu wanyingikine ngwenyi, Hamukunjika mumu ha lufwachinda.

Yilinga 7:9

Tulamba, se evwilile ukwa José, amulanjishile ku Engitu: alioze Zambi wapwile hamwe nenyi.

A-ROMA 1:29

se, azalile tò ni uhenge weswe, ni ungulungulu, ni kuzo, ni uhuka; a tò ni lufwachinda, ni ungalwe, ni vunda, ni kalimbalimba, ni upapwoki; akwa kulinongota,

A-ROMA 13:13

Twendenu ngwe chinalite, ngwe mu mwalwa; hi mu chimbangwinya ko, hi ni kuzengewa ko, hi ni ukoi ko, hi ni ujila ko, hi ni vunda ko, hi ni ukwa ko.

1 Korintu 3:3

Mumu nuchili akwa musunya: mumu se kuyili hakachi kenu, ni ukwa, ni vunda, ni kuhangujola, hi nuli akwa musunya ko, nyi? Kunwendele nikulita ni atu, nyi?

1 Korintu 4:18

Achi, amwe kanalifuzu, ngwe chichi keza kuli yenu.

1 Korintu 4:6

Achi, yino yuma mandumbu, hinatwala kuli yami mwene ni kuli Apolu mumu hali venu; hanga muli yetu, nukalilongese kanda mikecha manyonga jenu kuhiana yuma yize yinasonewa; niumwe wa kuli yenu kanda alifuza umwe kuli mukwo ni mukwo.

1 Korintu 5:2

Ni yenu nunalifuzu, kunwalinyengene, hanga yoze hanalingi chino, amuchize mukachi kenu.

1 Korintu 8:1

Achi, ha kutwala ku yuma yize hanayilamtula yitapo ku mahamba: tunanyingika yetu eswe yinyingi tuli nayo. Yinyingi kuyakufuza, alioze zango kuliakukolesa.

2 Korintu 12:20

Mumu ngunevu woma kuchina hanji muze mungwiza mungunuwana ngwe chize chazangile, ni yami mwene mununguwana ngwe chize yenu kunwazangile; kuchina hanji mukukapwa vunda, ni ukwa, ni ufwatulo, ni kulimanangana, ni kakowelo, ni kalundanganyishi, ni kulifuza ni yizungozungo.

2 Korintu 6:6

ni kulinanga, ni yinyingi, ni uhomboloji, ni utu, ni Spiritu Musandu, ni zango lize kulishi ulembekese,

Galashia 5:26

Kanda tuzanga uhenya wamokomoko, kanda tulihia umwe ni mukwo, kanda tupwa ni lufwachinda umwe kuli mukwo.

Efesu 4:2

ni mbunge yeswe ya kulikehesa, ni umbovu, hamwe ni uhomboloji, nikulihumikiza umwe kuli mukwo mu zango,

Efesu 4:32

Pwenu ni utu umwe kuli mukwo, akwa mbunge ja kwivwa keke, nikulikonekcna umwe ni mukwo, chizechene ngwe Zambi nawa hananukonekena muli Kristu.

Filipu 1:15

Amwe chamwenemwene kakwambujola Kristu ni ukwa ni vunda; alioze amwe nawa ni mbunge yipema.

Kolosu 1:11

nukalikoleze ni tachi jeswe nikulita ni ndundo ja uhenya wenyi, hanga nukapwe ni utunu weswe ni uhomboloji hamwe ni uwahililo:

Kolosu 2:18

Niumwe kanda anulimuna kwononona chenu, nikulengumuka ku mbunge yenyi ya kulikehesa, ni kuwayila cha angelo, nikupolongoza mu yuma yize hanamono, nikulifuza ni kunyonga chenyi cha musunya.

Kolosu 3:12

Kashika ngwe ana aze hanaatongola Zambi, asandu, waze kanaazange chikolo, zalenu mbunge ja keke, ni utu, ni mbunge ja kulikehesa, ni kushimbika, ni uhomboloji;

1 Tesalonika 5:14

Alioze tunaliumbu kuli yenu, mandumbu, nukakanyamise yilumbuke, sangulwisenu akwa ulenda ku mbunge, kolesenu akwa kulela, lihumikizenu ni eswe.

1 Timoteu 6:4

kanalifuzu, kanyingikine nichimwe, alioze kanahazwoka ha kutwala ku yihula ni kuhangujola cha maliji, kwenako kwakukatuka lufwachinda, ni vunda, ni kushililika, ni yishinginyeka ya ungulungulu,

2 Timoteu 2:25

ni Spiritu ya kushimbika, afumbe waze akulimika; kachi hanji Zambi makaaha kulikonyeka, akahete ku yinyingi ya umwenemwene.

2 Timoteu 3:10

Alioze hiunakaula kulongesa chami, ni kwenda chami, ni upale wami, ni Ufulielo wami, ni uhomboloji wami, ni zango liami, ni kunyongonona chami,

2 Timoteu 4:2

ngwami, Ambujola lie Liji, hondangana nalio ha mwaka upema, ni haze hi mwaka upema ko; kumika, ámbila, shinjila, ni uhomboloji weswe ni longeso lieswe.

Titu 3:3

Mumu yetwene nawa ha miaka ya kunyima twapwile yihepuke, yihulia, nikupianguka, nikulingila usolo weka ni weka ni kuwaha cheka ni cheka, nikwenda mu uhuka ni lufwachinda, akwa kole, nikulivwila kole umwe ni mukwo.

Tiangu (Jake) 4:5

Shina nunashinginyeka ngwe Chisoneko chinahanjika chamokomoko, nyi? Ngwo, Spiritu, yoze wakutwama muli yetu kakwivwa usona ndo ku ukwa, nyi?

1 Petulu 2:1

Kashika, mbilenu uhuka weswe, ni tulimbalimba eswe, ni ulembekese, ni lufwachinda, ni kuhanjika chipi.

1 Petulu 3:8

Ha kusula, pwenu eswe ni kunyonga chimuwika, nikulivwila vumbi umwe ni mukwo ni mukwo, akwa kulizanga ngwe mandumbu, akwa mbunge ja vumbi, akwa mbunge ja kulikehesa.

1 Petulu 4:8

Kuhiana yuma yeswe pwenu nikulizanga umwe ni mukwo ni mukwo ni mbunge yeswe: mumu zango kuliakufuka milonga yinji:

2 Petulu 1:7

ha uwayilo wezenu kufwila cha mandumbu; ha kufwila cha mandumbu wezenu zango.

1 Yoano 4:11

Akwetu a zango, kachi chocho Zambi watuzangile, kachi yetu nawa chatutamba kulizanga umwe ni mukwo ni, mukwo.