Matthew 6:2 - Yak'usda Ooghuni

² ꞋEt huwa telꞌenne ghaꞌ tihꞌalh de, khun tsꞌiyanne nalh ꞌududolhtiꞌ junih. Duba naꞌudzooꞌne, ꞌenne whuz unꞌa ꞌet nduhútꞌen. Lizwif bulugliz kꞌus ti whulheguz-un ꞌet tsꞌiyanne ubunoolhꞌen ha, ꞌet nduhutꞌen. ꞋAlhaꞌ dusni, ooba kꞌelha whutalehne, ꞌudaꞌ buba nkꞌelha whuzdliꞌ whe ꞌuhintꞌoh.

Matthew 6:2 Iomraidhean Croise

Matthew 15:7

Duba naꞌudzooꞌne ꞌahli! Nus hooꞌen Isaiah, ꞌen ꞌudaꞌ honꞌen ꞌinkꞌez tsꞌihꞌun unꞌa ꞌutni nohni nohghun. Njan ndutni,

Matthew 16:3

Bundadaꞌ yat kwꞌus bulh dulkꞌun suliꞌ whunulhꞌen de, ꞌawet ꞌazih whudutitsiꞌ dahni. Nohni duba naꞌudzooꞌne ꞌahli! ꞋEt ndo yat dawhutꞌen la tꞌeoonáhzun. ꞋEt hoontsꞌi ndoyá whudizulh dawhutꞌen la, ꞌaw tꞌeoonuzáhzun!

Matthew 22:18

ꞋEt hoontsꞌi Jesus tꞌeooninzun ntsꞌenꞌa la hoontsiꞌ kꞌoh tsꞌe hoontꞌoh, ꞌet huwa ꞌubulhni, “ꞋEt di ha soo zúlhtsꞌi? Nohni duba naꞌudzooꞌne ꞌahtꞌoh!

Matthew 23:5

ꞋUtꞌen ꞌuhuyulhꞌen-i, ꞌi hiyoonne yunoolhꞌen huba za ꞌuhuyulhꞌen. ꞋInkꞌez Yakꞌusda ooghuni zus, Phylacteries huyulhni, ꞌon nus ncha huyilhꞌi tsꞌiyanne hinoolhꞌen ha. ꞋInkꞌez luglok tenahududli te nahuyitsꞌuz-i, ꞌi cha ootso ꞌon nus ꞌudilyiz nahuyulhtsih.

Matthew 23:6

ꞋUhatꞌalh-un ꞌinkꞌez lugliz cha soo kꞌus hoonzoo-un ꞌet za hudutáltsꞌilh hukwaꞌ huninzun.

Matthew 24:51

ꞋEt kꞌubeꞌ yutálhtꞌoh ꞌinkꞌez ootsꞌitikulh-i, ꞌi tsꞌiyawh mbe duba naꞌudzooꞌne butsꞌitikulh-i, bukꞌunꞌa ꞌi za ootsꞌitikulh. ꞋEt whe la tso bulh dughoo lhidutikꞌus.”

Matthew 5:18

ꞋAlhaꞌ dusni, Moses be ꞌudustlꞌus Hebrew bughuni kꞌunꞌa hoontꞌum-unyaz whe ꞌukꞌeguz-un ꞌinkꞌez hoontꞌum-unyaz usgus-un, ndet ꞌuwhulhni, ꞌet tsꞌiyawh ꞌet ndúhooja de, ꞌet whutsꞌun ꞌaw ndi yun ꞌinkꞌez yakꞌuz cha ꞌetsul ꞌuhóneh ꞌaitꞌoh.

Matthew 6:16

“ꞋEt ndet soo hóotahnih de, duba naꞌudzooꞌne bukꞌunꞌa oohtꞌeꞌ junih. Ndutꞌenne dudzi yo ꞌuhilhdzun naꞌhududilꞌi wheꞌ hintꞌoh. ꞋInkꞌez dunin be teꞌhududilꞌen ꞌinkꞌez dzoh nuhuzut naꞌhududilꞌi. ꞋEt whuz unꞌa ꞌuyoonne whúbonulhtun ntsꞌenꞌa la soo huhooni hukwꞌunꞌa. ꞋAlhaꞌ whe nohdusni, mbe la ndutꞌenne buba ꞌukꞌelha yutaleh-i, ꞌudaꞌ buba kꞌelha whuzdliꞌ wheꞌ hintꞌoh.

Matthew 6:3

ꞋEt huwa telꞌenne ghaꞌ tihꞌalh de, nohla ꞌintlꞌus tse datꞌen, nohla nailhnih tsꞌunkꞌus tꞌeoonoohzeh junih.

Matthew 6:5

“Tenadahdli de, khun duba naꞌudzooꞌne kꞌoh tsꞌe tenadoohdli junih. Whuz unꞌa lizwif bulugliz cha nódilhya, kꞌus ti whulheto huhóontꞌiꞌ whe whuz unꞌa tenahududli tsꞌiyanne ubunoolhꞌen ha. Nohdúsni, ꞌudaꞌ buba ꞌukꞌelha whuzdliꞌ wheꞌ hintꞌoh.

Matthew 7:5

Duba naꞌindzooꞌ! ꞋUdechoo lhelcho-i nyuna kꞌéltsꞌut-i, ꞌi cho nyuna kꞌéhanainꞌaih. ꞋEt de la soo whunilhꞌen whe oona kꞌéltsꞌut-i oona kꞌehanáyonꞌalh.

Mark 12:39

Lugliz huntilꞌelh-un, ꞌet ꞌutahaooditꞌaih, ꞌinkꞌez dune dadulh te, ꞌet cha kꞌus whúdiztiꞌ-un, ꞌet didut nátlꞌa hududaih.

Mark 7:6

ꞋEt Jesus ubúlhni, “ꞋAlhaꞌ ꞌazi Isaiah nohghun nus hónꞌen whe ꞌunohúlhni, ‘Dune duba ꞌuzooꞌ naꞌdudilꞌíne,’ whuz unꞌa nohghun ꞌukꞌeꞌánguz inleꞌ Yakꞌusda ꞌutni, ‘Ndunne dughuni be sba hodilhtiꞌ, ꞌet hoontsꞌi ꞌaw budzi yo whe buba ꞌalhaꞌ lheꞌústꞌoh.

Luke 11:41

ꞋEt hoontsꞌi ndai la ahtꞌi-i, ꞌi be ꞌi ooloh telꞌenne be la oohtꞌen. ꞋEt tsꞌiyaitsuk nohba whunaꞌoodeh.

Luke 11:43

Nohni Phariseene dawhultsiꞌ-un ꞌet nohtsꞌu hóoltsꞌulh! Lizwif lugliz dahyaih de, ꞌuhoontꞌoh-un natlꞌa dahdaih, ꞌet za hukwaꞌ nahzun! ꞋInkꞌez ꞌeꞌóoket-un, soo tsꞌiyanne nohodólhtiꞌ hukwaꞌ nahzun.

Luke 12:33

Ndai ahtꞌi-i be ꞌóhket ꞌinkꞌez telꞌenne bugha yohlelh. Sooneya zus ninta lheꞌustꞌi-i ꞌudulhneh. ꞋInkꞌez di la unzoo-i ꞌilhiz wheni oolatoh hoolóh-i, ꞌi be yóohlelh, ꞌi la yakꞌuz tsꞌe neóohlelh. ꞋAw whuz ꞌundunutꞌih-un daooyaꞌ ꞌaitꞌoh ꞌinkꞌez ꞌaw yun nulhꞌas-i nintaꞌyolhꞌen ꞌaitꞌoh.

Luke 12:56

Nohni dune nalh duba naꞌudzooꞌne ꞌahtꞌoh! Ndi yun kꞌut ꞌinkꞌez yat cha dawhutanelh-un tꞌeoonahzun. ꞋEt hoontsꞌi dáhoontꞌoh huwa dawhutanelh ꞌaw tꞌeoonuzáhzun?

Luke 13:15

ꞋEt neMoodihti ꞌuyulhni, “Dune nalh duba naꞌudzooꞌ-un ꞌintꞌoh! ꞌalhaꞌ lawk ilohghun ꞌahli whe natsꞌulyis dzin nohmusdoos dune kꞌus nohmuyool te musdoos bayoh ꞌadultsiꞌ-un, kꞌunawhꞌuk ꞌinkꞌez too kꞌez toolhdlooh ꞌaitꞌoh?

Luke 20:46

“Moses be ꞌudustlꞌus ꞌukꞌu nunáguzne, naih nyiz-i be húdilhtsꞌi, ꞌinkꞌez tꞌalh-i be ꞌóoket-un, ꞌet tsꞌiyanne hubodílhtiꞌ whe hadih ꞌuhútni, ꞌet huhóontꞌiꞌ. ꞋInkꞌez lizwif bulugliz soo kꞌus hoonzoo-un hudutáltsꞌilh hukwaꞌ huninzun. ꞋInkꞌez dune ghunuda-un, kꞌus hoonzoo-un hutidalh hukwaꞌ huninzun. Nduntꞌohne soo cho buka tse hoohli!

Luke 6:24

“ꞋEt hoontsꞌi nohni hoonzooꞌ ꞌuntꞌohne soo cho howahli! Be hoonahtꞌiꞌ-i be ꞌudaꞌ tsꞌiyawh nohba ꞌukꞌelha whuzdliꞌ.

Luke 6:42

Ntsꞌenꞌa nyulhutsin ꞌudutanelh, ‘Sulhutsin nyo tsunyaz nyuna kꞌet ha náoosalh.’ Nyunchꞌoh duchun cho nyuna kꞌet diztan-i ꞌaw lhuzanꞌen. Nyunchꞌoh duba naꞌindzooꞌ! ꞋUdechoo duchun cho nyuna kꞌehanadintih. ꞋEt de la soo hónꞌen whe nyulhutsin oona kꞌet yuzꞌai ꞌi oona kꞌéhanaiyonꞌalh.”

John 13:29

Whulohne, ꞌenne ꞌuhuninzun Judas ꞌen sooniya zus nuyáꞌa ꞌinka ndai la dzenis whuti wheni ookaꞌ nudzún-i, ꞌi yoket ha uyúlhni. Kꞌus telꞌenne te hoonliyaz bugha ooꞌalh ha ꞌuyulhni huninzun.

John 5:41

ꞋAw dunene ye súdilhtiꞌ-i óschoot ꞌaítꞌoh,

John 5:44

Nohnichꞌoh nohtoh lhudúlhtiꞌ. ꞋEt hoontsꞌi, ndai la be ꞌúzdilhtiꞌ-i Yakꞌusda didutchꞌoh ootsꞌu haídiltsꞌut-i, ꞌi ꞌaw ookúlhnuzahtoh, ꞌet huwa ntsꞌenꞌa nohba ꞌalhaꞌ whutatꞌelh?

John 7:18

ꞋEt dune didutchꞌoh khuyanalduk de, dichꞌoh dutátiꞌ-i ꞌet za hukwunúta whe ꞌutni. ꞋEt hoontsꞌi dune yalhdúk-un, mbe la whuz de yútilhꞌaꞌ-un, ꞌen yudutálhtiꞌ-un hukwunúta de, ꞌen tsꞌihꞌun unꞌa dune unli whe ꞌutni ꞌinkꞌez tankꞌus neꞌutꞌen-i ooghu whéyooloh.

Acts 10:2

ꞋEn teniꞌ nilhdzun-un dune unli, ꞌinkꞌez Yakꞌusda énuljut-un ꞌuntꞌoh. Didut ꞌinkꞌez ookꞌekooke tsꞌiyawh Yakꞌusda za hudílhtiꞌ. Lizwif telꞌenne, ꞌenne cha tube bula ꞌutꞌen ꞌinkꞌez ꞌahoolhyiz Yakꞌusda tsꞌun tenadudli.

Acts 10:31

sbut usyin ꞌinkꞌez ꞌusúlhni, ‘Cornelius, Yakꞌusda ntenadudli yudántsꞌo, ꞌinkꞌez nye ꞌugha téꞌnizeh cha unzoo, ꞌet huwa Yakꞌusda yunalni.

Acts 10:4

Tube oogha ꞌúnjaz whe lizas yunilhꞌen ꞌinkꞌez, “Dáhooja?” yúlhni. ꞋEt lizas ꞌutni, “Yakꞌusda ntenadudli yudántsꞌo, ꞌinkꞌez nye ꞌugha téꞌnizeh cha unzoo, ꞌet huwa Yakꞌusda nyunalni.

Acts 11:29

ꞋInka Jesus Christ yugha hodulꞌehne lhgha ꞌúhudija whe ꞌilhoghun hinli whe bubulh ooba ꞌalha ꞌuhoontꞌohne, Judea dilhtsꞌine, ndet ꞌúhintꞌoh whe bulaꞌ hutitꞌelh hutni.

Acts 24:17

ꞋEt lhat nawhudizut Jerusalem whuchꞌoh ꞌistꞌen inleꞌ whe sulh whutꞌenne ba ndai sooniya buba lhunayostꞌai-i butsꞌu naítusꞌai ꞌinkꞌez Yakꞌusda tsꞌun loodel kꞌut ꞌudutáskꞌun wheni whuz naoozúsja.

Acts 9:36

ꞋEt keyoh Joppa huwhútni-un ꞌilhoghun tsꞌeke ꞌet whutꞌen-un Tabitha huyulhni. ꞋEn ooba ꞌalha ꞌuhoontꞌoh-un. Booziꞌ Greek kꞌunꞌa “Dorcas” huyúlhni ꞌet “Yestsꞌe” ni whe ꞌutni. ꞋEn ꞌahoolhyiz hoonzoo túneꞌ ꞌutꞌen, ꞌinkꞌez telꞌenne cha laꞌ ꞌutꞌen.

Romans 12:8

Whulohne ꞌuyoonne dune budzi úlhtus ubólhꞌeꞌ ha bughá whuntꞌai, whulohne huyutꞌi-i ꞌuyoonne hiye buláꞌ ootꞌen ha ꞌinkꞌez ꞌaw highu yalhoolhduk. Whulohne mbene la dune tso whudilhdzulhne soo cho huwa hinli whe nduhóotꞌeꞌ. Whulohne cha budzi hóontꞌiꞌ whe ꞌuyoonne gha teꞌhunozeh ha, ꞌet cha bughá whuntꞌai.

1 Corinthians 13:3

Ndai la ookꞌedune tsinli tsꞌiyawh howa núsdla de, ꞌinkꞌez syustꞌe cha dutákꞌun huba butlꞌa yísti, ꞌinkꞌez be nékꞌetsꞌinsiꞌ-i ooyit ꞌustꞌoh de, ꞌet de ꞌaw sba kꞌelha holeꞌ ꞌaítꞌoh.

Galatians 2:10

Mbe la telꞌenne, ꞌenne ꞌaw bunalh tsꞌodulhnoh ꞌet za hukwaꞌ huninzun, ꞌinkꞌez si cha whuz unꞌa hukwaꞌ nuszun.

Ephesians 4:28

Ndunne ꞌundunutꞌihne, ꞌenne tsꞌiyawh ꞌetsul ꞌuhooneh, ꞌantsꞌi ꞌuhootꞌen, ꞌet de la buba ꞌukꞌelha holeꞌ. Dula be hoonzoo-un huwaóonaꞌ. ꞋEt de la dune hoonli undunidzitne hoonli be bulaꞌ ooneh.

1 Thessalonians 2:6

Nohni kꞌus ꞌuyoonne cha nedutalhtiꞌ hukwa lhtsꞌetíꞌen, Christ ooba whelꞌaꞌne tsinli ꞌinkꞌez netlꞌa honꞌai ꞌet huwa be hóolhtus-i, ꞌi be nohando ꞌutsꞌintꞌoh.

1 Timothy 6:18

Tsꞌihꞌun unꞌa ꞌuhootꞌen budoniꞌ. Bula hoonli whe ꞌutꞌen unzoo-i ꞌuhoolhꞌen. ꞋAhoolhyiz ꞌuyoonne hiye ndunidzit-i, ꞌi be bulaꞌ hutitꞌelh-un huba lhahúdootꞌeꞌ. Soo hoontꞌiꞌ whe lhtaꞌtsꞌoolyelh.

Philemon 1:7

Sulhutsin nyun ngha Yakꞌusda oochꞌeꞌne budzi donáꞌuja. ꞋEt be nékꞌetsꞌinsiꞌ-i ꞌintꞌi-i, ꞌi gha tube tsꞌuhóontꞌiꞌ ꞌinkꞌez sóo kꞌunuznutꞌah chaꞌ ꞌi gha tsꞌutꞌi.

Hebrews 13:16

ꞋEt hoonzoo-un ꞌuwhulhꞌen ꞌinkꞌez tsꞌiyawh ꞌalhgoh lhla ꞌahtꞌen, ꞌet khun whunaoodoolhnoh junih. ꞋEt whuz unꞌa Yakꞌusda gha whutꞌaih-un, tsꞌiyawh ꞌet tube hóontꞌiꞌ.

1 Peter 4:11

Mbene dune yatilhdukne, ꞌenne Yakꞌusda khuni be yahoolhduk hubaꞌ hoontꞌoh. Mbene ꞌuyoonne dune ba neꞌútꞌenne, ndai hiye ulhtus-i Yakꞌusda bugha íninꞌai be ꞌuyoonne laꞌ hootꞌen. ꞋEt huwa tsꞌiyanne Jesus Christ ꞌen be Yakꞌusda hidólhtiꞌ. Jesus Christ ꞌilhiz wheni ꞌinkꞌez ꞌilhiz wheni, ꞌen ꞌon nus uzdólhtiꞌ ꞌinkꞌez oobaꞌ hoontꞌoh-un, tsꞌiyawh ꞌen oochꞌeꞌ ꞌuhoontꞌoh. ꞋEt ndo honeh.