Matthew 6:13 - Yak'usda Ooghuni

¹³ ꞋInkꞌez ntsiꞌ-un, ꞌen chꞌa neghinli. ꞋEt yakꞌuz kꞌuneꞌ ꞌintꞌen-un ꞌintꞌoh, ꞌinkꞌez be ilhtus-i cha, bé dintiꞌ-i cha, ꞌi ꞌilhiz wheni ꞌi tsꞌiyawh nchꞌeꞌ ꞌuntꞌoh. ꞋEt ndo honeh.’

Matthew 6:13 Iomraidhean Croise

Genesis 22:1

ꞋEt njan hukwꞌelhꞌaz ꞌet ꞌuhooja, Yakꞌusda (Elohim), Abraham yoolhdzai ꞌinkꞌez ꞌuyulhni, “Abraham!” ꞋEt Abraham ꞌutni, “Njan ꞌustꞌen.”

Matthew 26:41

Tankꞌus níntꞌi-un whuchꞌa howinli ꞌinkꞌez tenadinli! ꞌalha dune yughi whuz unꞌa hukwaꞌ ninzun, ꞌet hoontsꞌi ooyustꞌe tetsun.”

Matthew 28:20

Khuni nohtlꞌa dísꞌai-i, tsꞌiyawh hikꞌuneꞌ ootꞌen-un hubodoolhꞌeh. ꞋInkꞌez soo zulhtsꞌai, dzin whula toh lhaooduja de, ꞌet whutsꞌun ꞌahoolhyiz nohbulh ꞌútistꞌelh wheꞌ hoontꞌoh.” ꞋEt ndo honeh.

Matthew 5:37

ꞋEt kꞌus ndiz unꞌa njan dúdoohtni, ꞌet ꞌawet ‘A,’ dahni, ‘A,’ ꞌuntꞌoh. ꞋInkꞌez ‘ꞋAwúndooh,’ dahni de cha, ‘ꞋAwúndooh,’ ꞌuhoontꞌoh. ꞋEt ꞌutsꞌun unꞌa ꞌudahni de, ꞌet ntsiꞌ-un tsꞌu ha dutídoh whe ꞌuntꞌoh.”

Matthew 6:10

Whe lerwe inli-un, whusahooltsꞌit. Hukwaꞌ ninzun te, ndo honeh. Ndi yun kꞌut ꞌinkꞌez yakꞌuz cha, ndúhoneh.

John 17:15

ꞋAw ndi yun kꞌut whuchꞌa nabónlelh-un, ꞌet iloh ntsꞌu húkwaꞌ dusni, ꞌet hoontsꞌi ntsiꞌ-un, ꞌen chꞌa soo cho bughonleꞌ, ꞌet ntsꞌu húkwaꞌ dusni.

1 Corinthians 10:13

ꞋEt ndet whe netsudule dunene ubóolhdzih, whuz unꞌa za nohni cha nohóolhdzai. ꞋEt hoontsꞌi Yakꞌusda ꞌaw nela dootnih ꞌaitꞌoh. Ndet whe netsudule nohóolhdzih, ꞌet dáwhultsuk ulhtus-i be whulh áhyin, ꞌet za Yakꞌusda ba sooꞌ whutatꞌelh. ꞋEt nohóolhdzih de, ꞌet de Yakꞌusda whuchꞌa tilhdoh ꞌinkꞌez nohbaꞌ whutilelh.

1 Corinthians 14:16

ꞋEt nyunchꞌoh nyughi ꞌi be za khuni be yailhduk, ꞌet Yakꞌusda dílhtiꞌ whe yailhduk de, ꞌet whe ꞌilhoghun tꞌeoonuszunne butoh usda-un, ndi khuni diztiꞌ-i be yailhduk de, nyuditsꞌo de, ꞌet de ntsꞌenꞌa ndo honeh dooniꞌ, daja dini-un ꞌaw tꞌeoonuszun ꞌet huwa.

2 Corinthians 1:20

ꞋEt Yakꞌusda yé netsꞌu nahizya-i, ꞌi tsꞌiyawh, “A” ni, ꞌinkꞌez ꞌen be, “Ndo honeh” tsꞌutni. ꞋEt wheni negha Yakꞌusda uzdólhtiꞌ.

Galatians 1:4

ꞋEn ꞌuja nelubeshi gha huwaꞌ dudulti. ꞋEt whe ndi yun kꞌut ntsiꞌ-i yuchꞌa naneoozdla. Yakꞌusda neBá, ꞌet whuz unꞌa hukwaꞌ ninzun.

1 Thessalonians 1:10

ꞋInkꞌez ooYeꞌ, yakꞌuz tsꞌu hainya-un, ꞌen cha ooba sulhꞌi. Jesus ꞌen ꞌuntꞌoh. ꞋEn yaidlane butoh dunaidilhti ꞌinkꞌez Yakꞌusda ye nebulh hunilchꞌe-i negha tikulh-i, ꞌi chꞌa neulhyis-un, ꞌen ꞌuntꞌoh.

2 Thessalonians 3:3

ꞋEt hoontsꞌi neMoodihti ootꞌa níuznootan hubaꞌ hoontꞌoh. ꞋEn ulhtus-i be núdulhya nohulhtsi. ꞋInkꞌez ndun ntsiꞌ-un, ꞌen chꞌa nohghunli.

1 Timothy 1:17

ꞋEt ꞌandit ndun ꞌilhiz wheni whulerwe unli-un, ꞌen ba tsꞌodilhtiꞌ. ꞋEn ꞌukꞌenus diztiꞌ-un unli. ꞋEn ꞌuntꞌoh dalhtisa ꞌinkꞌez ꞌaw tsꞌooꞌen ꞌaitꞌoh. ꞋEn za Yakꞌusda whunih-un unli. ꞋEn ꞌilhiz wheni ba tsꞌodilhtiꞌ. ꞋEt ndo honeh.

Hebrews 11:36

ꞋUyoonne cha ꞌenne bughu hudlo ꞌinkꞌez whulohne bubuhoolhtsas. ꞋInkꞌez whulohne tlꞌoolh be bubuhulhghel ꞌinkꞌez ꞌabahanla.

1 Peter 5:8

Duba whahtnih ꞌinkꞌez soo cho huwahli! Netsudule, nohchꞌaz ditni-un, ndi khuna-iti, lion tsꞌutni, ꞌi kꞌunꞌa nohtunudúlgho. Nintaꞌ butalhꞌelhne, ꞌenne bukunúta.

2 Peter 2:9

Mbene Yakꞌusda énuljutne, ꞌenne lubeshi ꞌuhulhꞌen whutsꞌó nintꞌi, ntsꞌenꞌa whuchꞌa nabutálelh-un, ꞌet neMoodihti tꞌeooninzun. ꞋInkꞌez tsꞌihꞌun lheꞌítꞌohne, ꞌenne cha ndet dzin buba nahutiyeh-un, ꞌet whutsꞌun bubeꞌ whuyah-un, ꞌet buboontun.

1 John 3:8

ꞋUdechoo whutsꞌun netsudule lubeshi ꞌulhꞌen. Mbe lubeshi ꞌulhꞌen, ꞌen netsudule uniyalh-un ꞌúntꞌoh. Njan ꞌet huwa Yakꞌusda ooYeꞌ ndi yun kꞌut nusúya whe netsudule be ꞌutꞌen musai yoolhtselh ha.

Revelation 1:18

Khuna-un ꞌustꞌoh. Dasúsai inleꞌ ꞌinkꞌez sunilhꞌen, ꞌilhiz ꞌinkꞌez ꞌilhiz wheni khusna. ꞋEt ndo honeh! Hades ꞌinkꞌez yatsꞌadlah-un whulugli nusdle.

Revelation 19:1

ꞋEt njan hukwꞌelhꞌaz whudustsꞌo ndo yakꞌuz tsꞌe tube lhane ꞌuwhultus whe njan duhútni, “Yakꞌusda uzdólhtiꞌ! Be uzdujih-i, ꞌinkꞌez ye diztiꞌ-i, ꞌinkꞌez ye úncha-i, ꞌinkꞌez ye úlhtus-i, ꞌohwhi tsꞌiyawh neMoodihti Yakꞌusda oobaꞌ yintꞌoh.

Revelation 19:4

ꞋEt ndunne nat whunizyat ꞌon ꞌat dine ꞌutso whudilhdzulhne, ꞌinkꞌez nyowhi dunghi ꞌusjiz-i nacháhunildil ꞌinkꞌez Yakꞌusda dukwꞌutsꞌuzda cho diztiꞌ-i, ꞌi yukꞌusda whe, hibut dugwutsi be nachahunildil ꞌinkꞌez hitsꞌun teniꞌ hunalhdzin whe nduhútni, “ꞋEt ndo honeh! Yakꞌusda ntsꞌidílhtiꞌ!”

Revelation 2:10

Ndet la whe dzoh nutihzut-un, ꞌawet nilhdukw nohghu whutáltsꞌulh. Whénoolhjut junih! Soo zúlhtsꞌai! ꞋAwet nilhdukw whulohne netsudule ꞌanohtilelh. ꞋEt whe ootálhdzih. ꞋEt whunizyat dzin ꞌet dzoh nutihdeh. ꞋEt yaitahdlah whutsꞌun ꞌet nohba ꞌalha ꞌuhoontꞌoh zaꞌ hótꞌeꞌ. ꞋEt hukwꞌelha ꞌilhiz khutihnalh-un nohghá whuntasꞌalh. ꞋOn ꞌun whuchꞌa oonúlhde, ꞌet cha nohgha whútasꞌalh.

Revelation 21:4

ꞋInkꞌez Yakꞌusda bunatsul tooꞌ buna kꞌet whunaitilhdoh. Yatsꞌadlah-un cha ꞌetsul ꞌuwhutanelh. Tsꞌodi tsinli-un ꞌinkꞌez tsꞌutso-un cha ꞌetsul ꞌuwhutanelh. ꞋAw ꞌon ꞌun hukwꞌe tsꞌunduda-un cha hootáloh. Whutsꞌo daꞌ ꞌuhoontꞌoh-un tsꞌiyawh gak whuzdliꞌ ꞌet huwa.”

Revelation 3:10

Nohdásniꞌ dzoh nusahde-un soo whulh nudalhyaꞌ. Whuz unꞌa skꞌuneꞌ zahtꞌen. ꞋEt huwa ndi yun kꞌut ndulcho whe dune dzoh nutidoh-un whusaóotiltsꞌulh ubootálhdzih ha. ꞋEt whutso whuchꞌa nanohtásdlelh.

Revelation 3:14

“ꞋEt keyoh Laodicea dune Yakꞌusda ba ꞌilhunaoodulhne bulizas, ꞌen ootsꞌó kꞌeinges. Njan ndudini: Mbe la ndó honeh-un, ꞌinkꞌez oonalh ꞌúwhutꞌen-un cha, ꞌinkꞌez ootꞌa niuznintan-un cha ꞌinkꞌez tsꞌihꞌun unꞌa ꞌuntꞌoh-un cha. Ndi Yakꞌusda ꞌuyinla-i ꞌen ꞌudechoo whéꞌ whudilhꞌen-un ꞌuntꞌoh, ꞌen ꞌutni:

Revelation 5:13

ꞋInkꞌez ndai ꞌusjiz ndo yakꞌuz ꞌuntꞌoh-i, ndi yun kꞌut cha, ꞌinkꞌez ndi yun ootꞌah tsꞌe cha, ꞌinkꞌez dai la yatoo kꞌut hoonli-i, ꞌenne tsꞌiyawh njan nduhútni whe ubudustsꞌo, “Tsꞌuhóontꞌiꞌ te bé neꞌtsꞌulꞌen-i, be uzdiztiꞌ-i, be hóotꞌen-i, ꞌinkꞌez tsꞌiyantsuk ookꞌuneꞌ whutꞌen-i cha, mbe la kwꞌutsꞌuzda cho diztiꞌ-i kusda-un, ꞌinkꞌez ꞌusbaiyaz hizilhghi-i cha, ꞌilhiz ꞌinkꞌez ꞌilhiz wheni buchꞌeꞌ yoleꞌ.”